ភ្នំពេញ៖ មន្ដ្រីមន្ទីរសាធារណៈការ និងដឹកជញ្ជូនរាជធានីភ្នំពេញបានឲ្យដឹងថា ក្រោយពីបានរៀបចំវេទិការសាធារណៈ ផ្សព្វផ្សាយគម្រោងអភិវឌ្ឍន៍ប្រឡាយបេតុងស្ទឹងមានជ័យរដ្ឋបាល រាជធានីភ្នំពេញសម្រេចថានឹងសាងសង់ប្រឡាយបេតុងស្ទឹងមានជ័យឆាប់ៗនេះ ដើម្បីរំដោះទឹកលិចនៅផ្លូវលេខ ២០០៤។
ការរៀបចំវេទិការសាធារណៈ ផ្សព្វផ្សាយគម្រោងអភិវឌ្ឍន៍ប្រឡាយបេតុងស្ទឹងមានជ័យនេះបានធ្វើឡើងនៅព្រឹកថ្ងៃទី៦ ខែតុលា ឆ្នាំ២០១៧ នៅវត្តចង្ក្រាន្តតាព្រហ្មស្ទឹងមានជ័យ ដែលរៀបចំដោយរដ្ឋបាលរាជធានីភ្នំពេញ និងមានការចូលរួមដោយលោក មាន ចាន់យ៉ាដា អភិបាលរងរាជធានីភ្នំពេញ ដើម្បីស្ដាប់មតិយោបល់របស់ប្រជាពលរដ្ឋជិត ៦០០ខ្នងផ្ទះ ដែលកំពុងរស់នៅលើប្រឡាយស្ទឹងមានជ័យ។
លោក មាន ចាន់យ៉ាដា បានថ្លែងថា ពេលនេះរាជធានីទទួលបានសំណូមពរ និងមតិយោបល់របស់ប្រជាពលរដ្ឋចំនួន១៥នាក់ ដែលតំណាងមកពីសហគមន៍ទាំង៨ ដែលរស់នៅតាមប្រឡាយស្ទឹងមានជ័យ ហើយពេលនេះយើងក៏បានពិភាក្សាគ្នានិងបានសម្រេចជាលទ្ធផលរួមគ្នាបានយ៉ាងល្អជូនដល់ប្រជាពលរដ្ឋ ចំពោះការឯកភាពក្នុងការស្ដារប្រឡាយនេះឡើងវិញ។
មន្ដ្រីមន្ទីរសាធារណៈការ និងដឹកជញ្ជូនរាជធានីភ្នំពេញបានបន្ថែមថា រដ្ឋបាលរាជធានីភ្នំពេញ បានឯកភាពសំណើររបស់ប្រជាពលរដ្ឋចំនួន ៨សហគមន៍ ស្មើនឹង ៥៦២ខ្នងផ្ទះ ដែលកំពុងរស់នៅលើប្រឡាយស្ទឹងមានជ័យ ដើម្បីធ្វើការអភិវឌ្ឍន៍លំនៅដ្ឋាននៅនឹងកន្លែង ហើយអាជ្ញាធរនឹងសាងសង់ប្រឡាយបេតុងប្រវែង ១៣៥០ម៉ែត្រ ទទឹង ៨ម៉ែត្រ ផ្លូវបេតុងអមប្រឡាយទទឹង ៦ម៉ែត្រ និងម្ខាងទៀតទទឹង ១ម៉ែត្រទៅ៤ម៉ែត្រ៕
