ខេត្តស្ទឹងត្រែង៖ លោក ហែម សុមុន្នី ហៅ(ម៉ៅ)នាយនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃមិនត្រឹមតែមិនបានដកខ្លួនចេញពីខេត្តមកចូលអង្គភាពតាមបញ្ជាអគ្គស្នងការនគរបាលជាតិប៉ុណ្តោះទេ លោក ហែម សុមុន្នី ហៅ(ម៉ៅ)ត្រូវបានគេដឹងគ្រប់គ្នាថា៖ គាត់គឺជាមេខ្លោងខាងចេញមុខរត់ការដឹកបទល្មើសឈើនៅខេត្តស្ទឹងត្រែងផ្តាច់មុខនិងបំពានច្បាប់ អនុវត្តខុសពីតួនាទី ភារកិច្ចខ្លួនជាមន្ត្រីអនុវត្តច្បាប់និងបង្ក្រាបបទល្មើសទៅវិញ.? គេនៅចាំបានថា៖ លោកឧត្តមសេនីយ៍ឆាយ គឹមខឿន នាយសេនាធិការអគ្គស្នងការនគរបាលជាតិ បានចេញបទបញ្ជាអោយនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ត្រូវដកមកកាន់កន្លែងវិញតាំងពីថ្ងៃទី១៧ ខែកុម្ភះ ឆ្នាំ២០១៧ មកម្លេះ។ ក្នុងនោះលោកឆាយ គឹមខឿន នាយសេនាធិការអគ្គស្នងការនគរបាលជាតិបានថ្លែងយ៉ាងដូច្នេះថា៖«ជម្រាបជូនឯកឧត្តម អស់លោកស្នងការរាជធានី-ខេត្តទាំងអស់មេត្តាជ្រាបថា តាមបញ្ជាឯកឧត្តម នាយឧត្តមសេនីយ៍អគ្គស្នងការ សូមអោយឯកឧត្តម អស់លោក រាយការណ៍មកភ្លាម ថាតើកម្លាំងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដែលបានចុះតាមបណ្តាខេត្តនោះបានដកត្រឡប់មកវិញអស់ឬនៅ.?បើសិនមិនបានដកទេហៅមកព្រមាន ឬត្រូវចាប់បង្ខំអោយដក បើមិនព្រមដកប្រើប្រាស់កម្លាំងបញ្ជារបស់ខេត្តនាំខ្លួនមកស្នងការជាបន្ទាន់» ។ ផ្ទុយទៅវិញលោក ហែម សុមុន្នីហៅ(ម៉ៅ)មិនព្រមដកមកកន្លែងវិញ ហើយថែមទាំងជាមេខ្លោងរត់ការអោយមានការចរាចរណ៍ដឹកជញ្ជូនបទល្មើសឈើនៅខេត្តស្ទឹងត្រែងចេញរាល់យប់មកកាន់ខេត្តក្រចេះ។
គេបានបង្ហើបថា៖ ពីមុនក៏ដូចបច្ចុប្បន្នលោក ហែម សុមុន្នី ហៅ(ម៉ៅ)រត់ការអោយឈ្មួញឈើយកលុយបង់អោយខាងសមត្ថកិច្ចជំនាញជាច្រើនស្ថាប័នដើម្បីដឹកឈើចេញពីស្រុកសៀមប៉ាង មកចូលខេត្តនិងបន្តទៅទឹកដីខេត្តក្រចេះ ដោយមធ្យោបាយដឹកជញ្ជូនឈើមានប្រភេទឡាន បាឡែន ហាយឡែនឌ័រ ធុនត្រា សាំយ៉ុង និងរថយន្តធុនធំមានម្តងម្កាល។ រយះពេលជិត១ខែនេះលោក ហែម សុមុន្នី ហៅ(ម៉ៅ)រត់ការដឹកឈើចេញរាល់យប់ទទួលជោគជ័យ បន្ទាប់ពីសមត្ថកិច្ច អាជ្ញាធរ ជំនាញពាក់ព័ន្ធទទួលយកសំណូករត់ការ។ គេបង្ហើបបន្តថា៖ ពីមុនមានសមត្ថកិច្ច អាជ្ញាធរ ជំនាញជិត៣០ស្ថាប័នឬកន្លែងត្រូវបង់លុយ តែបច្ចុប្បន្ននេះការបង់លុយរត់ការច្រើនជាងលើកមុន ខណះមានសមត្ថកិច្ច អាជ្ញាធរ ជំនាញបំបែកគ្នាយកលុយ ដូចជាធ្លាប់បង់តែម្នាក់ គេបំបែកទៅជាបង់អោយ២នាក់ ជាល្បិចរបស់សមត្ថកិច្ច អាជ្ញាធរ ជំនាញបំបែកខ្លួនរកលុយ។
ដោយឡែក សមត្ថកិច្ចពីក្រហែងមេឃខាងលើទៅមិនសូវបានលុយរត់ការច្រើនដូចមានសមត្ថកិច្ច អាជ្ញាធរ ជំនាញនៅខេត្តទេ ស្របពេលយកលុយរបៀបលាក់លៀម ករណីខ្វះព័ត៍មាន អ្នករត់ការប្រាប់ចំនួនឡានឈើចេញម្តងៗគេគេងទុកខ្លះ ជាក់ស្តែងឡានសាំយ៉ុង១យប់ចេញ៥គ្រឿង ឡានបាឡែនចេញ២គ្រឿង ធុនត្រាចេញ២គ្រឿង គេប្រាប់សរុបទាំងអស់ត្រឹមតែ៣គ្រឿងប៉ុណ្ណោះ ព្រោះលោក ហែម សុមុនី្ន ហៅ(ម៉ៅ)ដឹងច្បាស់ថា អ្នកមកពីលើមិនហ៊ានដាក់ប៉ុស្តិរាប់ក្បាលឡាន ហើយសមត្ថកិច្ចខេត្តក៏មិនទៀងត្រង់ ក៏បង្ខំយកលុយតាមតួលេខអ្នករត់កុហកតែប៉ុណ្ណោះ។
ពីមុន មួយឡានសាំយ៉ុងត្រូវចំណាយលុយរត់ការអោយសមត្ថកិច្ច អាជ្ញាធរ ជំនាញ អស់ត្រឹម៣០០០ដុល្លារទៅ៣៥០០ដុល្លារ តែរាល់ថ្ងៃដល់៤០០០ដុល្លារឬលើសពីនេះ សម្រាប់ពីស្រុកសៀមប៉ាងឆ្លងកាត់ខេត្តនិងបន្តចូលទឹកដីខេត្តក្រចេះ។ លោក ហែម សុមុនី្ន ហៅ(ម៉ៅ)មេខ្លោងរត់ការដឹកជញ្ជូនបទល្មើសឈើកំពុងប្រើប្រាស់ឥទ្ធិពលលោកប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងសម្រាប់ធ្វើការងារបទល្មើសឈើ តែគេពុំដឹងថា៖ លោកផ្កាយ៣ ចាន់ វ៉ាន់ធឿនមេប៉ូលីសប្រឆាំងបទល្មើសសេដ្ឋកិច្ចធំជាងគេនៅក្រសួងមហាផ្ទៃ ដឹងទេថាកូនចៅខ្លួន«ហែម សុមុន្នី»ធ្វើអោយជះឥទ្ធិពលអាក្រក់ដល់កិត្តិយសរបស់លោកនិងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ខណៈគាត់មិនដកខ្លួនមកកាន់អង្គភាពវិញ ហ៊ានប្រឆាំងបញ្ជាលោកឧត្តមសេនីយ៍ឆាយ គឹមខឿន នាយសេនាធិការអគ្គស្នងការនគរបាលជាតិ រហូតដល់គឃ្លើននិងច្បាប់ចេញមុខរត់ការដឹកជញ្ជូនបទល្មើសឈើ.? គេធានាថា៖ បើបទល្មើសដឹកជញ្ជូនឈើមិនបានកើតឡើងនូវអំពើពុករលួយជាលក្ខណះប្រព័ន្ធទេនោះ ងាយនឹងបង្ក្រាប និងចាប់ខ្លួន លោក ហែម សុមុន្នី ហៅ(ម៉ៅ)ដោយបទល្មើសរត់ការជូនឡានឈើកើតឡើងលក្ខណះជាក់ស្តែង។ ព្រោះគេដឹកតាមឡានបាឡែន ហាយឡែនឌ័រ ធុនត្រា សាំយ៉ុង និងរថយន្តធុនធំមានម្តងម្កាល គឺយកមកស្តុកឬទំលាក់នៅម្តុំអូរព្រះ អូរគ្រៀង ស្រុកសំបូរ ខេត្តក្រចេះដើម្បីលើកដាក់ឡានយីឌុបបន្តទៅវៀតណាមតាមស្រុកស្នួល។
គេមានជំនឿថា៖ លោកផ្កាយ៣ ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចនឹងចាត់វិធានការលើបុគ្គលនេះគឺលោក ហែម សុមុន្នី ហៅ(ម៉ៅ)ដើម្បីអនុវត្តបទបញ្ជានាយឧត្តមសេនីយ៍អគ្គស្នងការនគរបាលជាតិ ដូចអ្វីដែលលោឧត្តមសេនីយ៍ឆាយ គឹមខឿន នាយសេនាធិការអគ្គស្នងការនគរបាលជាតិលើកឡើងអោយស្នងការនគរបាលខេត្តនាំខ្លួនអ្នកបំពានបទបញ្ជាឬល្មើសច្បាប់.? ។ ជុំវិញសេចក្តីរាយ ការណ៍ របស់ប្រជាពល រដ្ឋខាងលើនេះភ្នាក់ងារសារព័ត៌មានយើងមិនអាចស្វែងរកសុំការបំភ្លឺពីលោក ហែម មុន្នីបាននៅ ឡើយទេ៕
