ខេត្តបាត់ដំបង ៖ កិច្ចប្រជុំសាមញ្ញលើកទី១៦ របស់ក្រុមប្រឹក្សាខេត្តបាត់ដំបងអាណត្តិទី២ បានប្រព្រឹត្ត ទៅកាលពីថ្ងៃទី ១០ ខែកញ្ញា នៅសាលាប្រជុំក្រុមប្រឹក្សាខេត្ត ក្រោមអធិបតីភាព ឯកឧត្តម អ៊ុក វង្ស ប្រធានក្រុមប្រឹក្សាខេត្ត ហើយក៏មានវត្តមានឯកឧត្តម អភិបាលអភិបាលរងនៃគណៈ អភិបាល អញ្ជើញចូលរួមផងដែរ។
កិច្ចប្រជុំបានអនុម័តសេចក្តីព្រាងរបៀបវីរៈ កិច្ចប្រជុំសាមញ្ញលើកទី១៦ ព្រមទាំងពិនិត្យ និងអនុម័ត លើសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១៥ កាលពីថ្ងៃទី១២ ខែសីហា និងស្តាប់របាយការណ៍ សកម្មភាពការងារ របស់គណកម្មាធិការ ពិគ្រោះយោបល់ កិច្ចការស្ត្រី និងកុមារប្រចាំខែសីហា របស់លោកជំទាវ អ៊ីវ តារា ប្រធាន គ.ក.ស.ក ខេត្ត បានគូសបញ្ជាក់ពីសកម្មភាព លទ្ធផលការងាររបស់សមាជិក គ.ក.ស.ក មកពីមន្ទីរអង្គភាព នានា ដូចជាការងារកិច្ចការនារី ស្នងការដ្ឋាននគរបាលខេត្ត ការងារអភិវឌ្ឍន៍ជនបទ ការងារ អប់រំយុវជន និងកីឡា និងការងារសុខាភិបាលជាដើម សម្រេចបានលទ្ធផលគួរកត់សំគាល់។ ទន្ទឹមនិងនោះក៏មានបញ្ហាប្រឈម មានដូចជា មានសិស្សមួយចំនួនឈប់ច្រើន និងមួយចំនួន ទៀតបោះបង់ការសិក្សា ពាក់ព័ន្ធទៅនិងកត្តាជាច្រើន មត្តេយ្យសិក្សាសហគមន៍គុណភាព បង្រៀននៅមានកំរិត មូលហេតុផ្លាស់ប្តូរគ្រូៗច្រើនពេក ប្រាក់ឧបត្ថម្ភតិច និងខ្វះបន្ទប់រៀន ឲ្យបានសមស្រប អំពើហឹង្សាកើតឡើងច្រើន ដោយគ្រឿងស្រវឹង គ្រឿងញៀន និង ល្បែងស៊ី សង ការយល់ដឹងរបស់ប្រជាពលរដ្ឋ នៅមានកម្រិតក្នុងការធ្វើចំណាកស្រុក ស្ត្រីនៅតំបន់ដាច់ ស្រយាល នូវចំណេះដឹងផ្នែកសុខភាព។
សូមមន្ទីរអប់រំ ជម្រុញពង្រឹងគុណភាពបង្រៀន និងរៀនជាបន្តទៀត សូមអាជ្ញាធរមូល ដ្ឋាន ជម្រុញប្រជាពលរដ្ឋ ចូលរួមសហការ ក្នុងសកម្មភាពអប់រំផ្សព្វផ្សាយ ពីច្បាប់ទាក់ទង និងអំពើហឹង្សា សូមឲ្យមន្ទីរការងារនិងបណ្តុះវិជ្ជាជីវៈ និងមន្ត្រីមូលដ្ឋាន ជួយសហការផ្សព្វ ផ្សាយ ពីការធ្វើចំណាកស្រុក ដោយសុវត្ថិភាពដល់ប្រជាពលរដ្ឋជាបន្តទៅទៀត។
ក្រោយពីការពិភាក្សា និងអនុម័តលើសេចក្តីព្រាងរបាយការ ប្រចាំខែសីហា របស់រដ្ឋបាលខេត្តរួចមក ឯកឧត្តម អ៊ុក វង្ស បានកោតសរសើរ និងវាយតម្លៃខ្ពស់ ចំពោះសកម្មភាព ដ៏មមាញឹក របស់រដ្ឋបាលខេត្ត សម្រេចបានលទ្ធផលជាច្រើនជូនដល់ប្រជាពលរដ្ឋ ទោះបីនៅ មានចំណុចខ្វះខាតខ្លះៗក៏ដោយ ក៏គណអភិបាលខេត្តពុះពារ សម្រេចបានទៅតាម ផែនការ ដែលបានគ្រោងទុកដែរ៕
