ភ្នំពេញ៖ នារសៀលថ្ងៃទី០១ ខែតុលានេះ មន្ត្រីរាជការធ្វើការនៅច្រកទ្វារព្រំដែនអន្តរជាតិបាវិត ជាប់ប្រទេសវៀតណាម ក្នុងក្រុងបាវិត ខេត្តស្វាយរៀង ជាពិសេស មន្ត្រីនគរបាលអន្តោប្រវេសន៍ បាននាំគ្នាបញ្ចេញប្រិតកម្មដោយសរសេរលិខិតប្តឹងដល់សម្តេចអគ្គមហាសេនាបតីតេជោ ហ៊ុល សែន និងសុំឲ្យចាត់វិធានការចំពោះសកម្មភាពខុសច្បាប់របស់នគរបាល ប្រធានច្រកទ្វារអន្តរជាតិបាវ៉ិតដែលចាត់តាំងក្មួយប្រុសឲ្យដើរកៀបសង្កត់ទារលុយ។
គណនីហ្វេសប៊ុកមួយឈ្មោះ សម្លេងប្រជាជនបាវិត បានបង្ហោះលិខិតសរសេរដោយដៃមួយ ចុះថ្ងៃទី០១ ខែតុលា នេះបានលើកឡើងថា ពួកគេមិនអាចទទួលយកបាននូវសកម្មភាពដ៏ឆ្គាំឆ្គងរបស់លោកឧត្តមសេនីយ៍ត្រី ខាត់ សារ៉ាត់ ប្រធានច្រកទ្វារព្រំដែនអន្តរជាតិបាវិត ដែលបានប្រើក្មួយប្រុសបង្កើតរបស់ខ្លួនឲ្យដើរទាមទារលុយពីមន្ត្រីនគរបាលគ្រប់ផ្នែកកំពុងធ្វើការនៅទីនោះ។
លិខិត បានសសេរ ថា «ដោយខ្ញុំបាទ នាងខ្ញុំ ជាមន្ត្រីរាជការបម្រើការនៅច្រកទ្វារព្រំដែនអន្តរជាតិបាវិត ទាំងអស់មានការកើតទុក្ខមិនសុខចិត្តចំពោះទង្វើរបស់លោក ខាត់ សារ៉ាត់ ដែលជាប្រធានច្រកទ្វារព្រំដែនអន្តរជាតិបាវិត ដែលបានបញ្ជាឲ្យក្មួយប្រុសបង្កើតរបស់គាត់ឈ្មោះ ប្រាក់ ពេញ ដែលនៅវ័យក្មេង ទើបតែចូលបម្រើការងារជាមន្ត្រីអន្តោប្រវេសន៍
មិនទាន់មានបទពិសោធន៍ ឲ្យមកគ្រប់គ្រងលើមន្ត្រីអន្តោប្រវេសន៍ទាំងអស់នៅច្រកទ្វារព្រំដែនអន្តរជាតិបាវិត ដោយមានអាកប្បកិរិយាក្អេងក្អាងជាទីបំផុត។ ឈ្មោះ ប្រាក់ ពេញ (ដោយអាងជាក្មួយមេ)បានដើរទាមទារឯកសារគ្រប់ផ្នែក មិនថាឡើយផ្នែកបែបបទ ផ្នែកច្បាម ឲ្យតែការងារទាក់ទងនឹងលុយ គឺគេគំរាមយកលុយគ្រប់ផ្នែកទាំងអស់ដោយគ្មានញញើតច្បាប់ឡើយ»។
លិខិត បានសំណូមពរ ថា «អាស្រ័យហេតុដូចបានជម្រាបជូនខាងលើ សូមសម្តេចតេជោ និង [សម្តេចកិត្តិព្រឹទ្ធបណ្ឌិត] ដែលជាឪពុកម្តាយរបស់ប្រជាជនទូទាំងប្រទេស ក៏ដូចជាមន្ត្រីរាជការទាំងអស់ មេត្តាជួយអន្តរាគមន៍ និងដោះស្រាយដល់ពួកយើងដោយក្តីអនុគ្រោះ»។
នៅលើទំព័រហ្វេសប៊ុករបស់គណនីឈ្មោះ សម្លេងប្រជាជនបាវិតនេះ ក្រៅពីបង្ហោះសារ និងលិខិតសរសេរដោយដៃ ក៏មានបង្ហោះភ្ជាប់ជាមួយនូវរូបរបស់លោក ប្រាក់ ពេញ ក្នុងឯកសណ្ឋានជាមន្ត្រីនគរបាលជាតិ ពាក់ស័ក្តិ៣ និងអមដោយរូបថត ក្រុមមន្ត្រីនគរបាលអន្តោប្រវេសន៍ឈរត្រៀបត្រានៅមុខកន្លែងធ្វើការរបស់ពួកគេ។