ភ្នំពេញ៖ លោកស្រី កែវ សុធារី ត្រូវបានដកចេញពីតួនាទីអគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ នៅក្រសួងធម្មការ និងសាសនាតែនៅ ដោយរក្សាទុកក្របខ័ណ្ឌ និងឋានន្ដរស័ក្ដនៅដដែល។ យោងតាមព្រះរាជក្រឹត្យចុះថ្ងៃទី១តុលាឆ្នាំ២០១៧ ដែលចេញដោយសម្ដេចវិបុលសេនាភក្ដី សាយ ឈុំប្រមុខរដ្ឋស្ដីបញ្ជាក់ថា «ត្រាស់បង្គាប់ បញ្ចប់ភារកិច្ចលោកជំទាវ កែវ សុធារី ពីអគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ នៅក្រសួងធម្មការ និងសាសនា ដោយរក្សាទុកក្របខ័ណ្ឌ និងឋានន្ដរស័ក្ដិនៅដដែល»។
មានការកត់សម្គាល់ថា៖ លោកស្រី កែវ សុធារី បានធ្វើឡើងក្រោយពីមានពាក្យប្ដឹង និងមានការមិនពេញចិត្តយ៉ាងច្រើនពីសំណាក់ថ្នាក់ដឹកនាំ និងមន្ដ្រីក្នុងក្រសួង ដោយបូករួមទាំងប្រធានមន្ទីរក្រសួងធម្មការទូទាំងប្រទេស ដោយសារតែលោកស្រី កែវ សុធារី បានកាត់របរ និងស៊ីដាច់លុយ របស់ពួកគេយ៉ាងច្រើន។
មន្ដ្រីទាំងនេះបានបញ្ជាក់ទៀតថា លោកស្រី កែវ សុធារីកាលនៅក្នុងតួនាទីជាអគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ នៅក្រសួងធម្មការធ្លាប់រងការចោទថាបានប្រព្រឹត្តអំពើពុករលួយ ជាមួយប្ដីរបស់ខ្លួន ដែលមានតួនាទីក្នុងការិយាល័យ ដោយមានការកាត់លុយនៅមន្ទីរ និងប្រធាននាយកដ្ឋាននានាអស់រាប់សិបលានរៀលនិងឃុបឃឹតជាមួយប្រធានមន្ទីរធម្មការតាមបណ្តាខេត្ត ។ការដកតួនាទីជាអគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ ពីលោកស្រី កែវ សុធារីក្នុងសម័យលោកទេសរដ្ឋមន្ដ្រី ហ៊ឹម ឆែមជា រដ្ឋមន្ដ្រីក្រសួងធម្មការ និងសាសនាទទួលបានការសាទរពីក្រុមមន្ដ្រីក្នុងក្រសួង៕
