គិតទៅគេហៅថាបុណ្យព្រេងវាសនាពីអតីតជាតិពិតជាមានមែនហើយបានសម្តែងអោយយើងមើលឃើញ និងភ្នែកពិតៗតែម្តង។
តាមប្រភពពត៌មានពីមន្ត្រីរាជការដែលបម្រើការងារនៅមន្ទីររៀបចំដែនដីនគរូបនីយកម្មសំណង់ និងសុរិយោដីរាជធានីភ្នំពេញបានលួចបង្ហើបប្រាប់អ្នកសារពត៌មានយើងក្នុងលក្ខ័ណ្ឌមិនបញ្ចេញឈ្មោះថា នេះគេហៅថាជាបុណ្យព្រេងវាសនាពីអតីតជាតិពិតប្រាកដមែន ដូចជាលោក សារិន វណ្ណា ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីរាជធានីភ្នំពេញ យ៉ាងអញ្ចឹងបើយើងនិយាយពីសមត្ថភាព ឬចំណេះដឹងនោះគឺហាក់បីដូចជាមិនអស្ចារ្យប៉ុន្មានទេ ហើយបទពិសោធន៍ការងារក៏មិនលើសគេប៉ុន្មានទេ តែបែរជាមានឱកាសបានធ្វើជាប្រធានមន្ទីរ ហើយធ្វើព្យុះធ្វើភ្លើងពេញមន្ទីរគ្មាននរណាហ៊ានតមាត់ឡើយ ។
ប្រភពដែលដដែលបន្តថាលោក វណ្ណា បានឡើងធ្វើជាប្រធានមន្ទីរនេះ (មន្ទីររៀបចំដែនដីនគរូបនីយកម្ម សំណង់ និងសុរិយោដីរាជធានីភ្នំពេញ) គឺដោយសារលោកបានធ្វើជាអ្នកមើលការខុសត្រូវចំពោះការសាងសង់ផ្ទះរបស់ព្រះឥន្ទ្រ (ផ្ទះសម្តេចហ៊ុនសែន) នៅវិមានឯករាជ្យ និងនៅកំពុងសោម ។ ទើបមានបុណ្យបានឡើងធ្វើជាប្រធានមន្ទីរបែបនេះទៅ។
ដោយឡែក ប្រភពពីមន្ត្រីផ្សេងទៀតបាននិយាយថាៈ បច្ចុប្បន្នការដឹកនាំរបស់លោក សារិន វណ្ណា ហាក់បីដូចជាតឹងរឹងយ៉ាងខ្លាំងចំពោះកូនចៅសូម្បីតែពេលទំនេរកូនចៅអង្គុយជជែកគ្នាលេងពីនេះពីនោះ ក៏អត់បានដែរ ហើយបើការងារណាដែលមានផលប្រយោជន៍បន្តិចបន្ទួចគឺលោក វណ្ណា ប្រមូលអោយលោក ស៊ូ ដែលជាតៃកុងឡានរបស់គាត់ជាអ្នកកាន់ឯកសាររត់ការ។ ហើយបើឯកសារណាសំខាន់ៗដូចជា សុំច្បាប់សាងសង់ បុរី ខុនដូ សណ្ឋាគារ លក់ផ្តាច់ គឺចាំបាច់ត្រូវម្ចាស់មកជួបជាមួយលោក វណ្ណា ផ្ទាល់ ទើបឯកសារនោះធ្វើបាន បើមិនអញ្ចឹងទេ គឺត្រូវលោក វណ្ណា ចារមកវិញថាស្នាមមេដៃមើលក្រយ៉ៅអត់ឃើញ ហើយបើមកជួបលោកប្រធានមន្ទីរ គឺត្រូវជួយបក្សយ៉ាងតិចបំផុត 20% នៃតម្លៃដី ឬផ្ទះ ដែលលក់ បានបើមិនអញ្ចឹងទេ ឯកសារនោះត្រូវខុសអញ្ចេះ ខុសអញ្ចុះ មិនចេះចប់។ អញ្ចឹងហើយបានជាប្រជា ពលរដ្ឋគ្រប់រូបពេលដែលចុះពីជួបលោក វណ្ណា វិញម្នាក់ៗធ្វើមុខដូចជា ខឹងនរណាម្នាក់ទះកំភ្លៀងយ៉ាង អញ្ចឹង។
ប្រភពដដែលបានបញ្ជាក់ទៀតថាចំពោះការិយាល័យ ច្រកចេញចូលតែមួយ គឺមានហើយ ប៉ុន្តែពេលធ្វើឯកសារដាក់ជូនលោក ប្រធានពិនិត្យ សម្រេចភាគច្រើនគឺខុសលុះត្រាតែម្ចាស់មកជួបចង់កន្លះម៉ោងឯណោះទើបគាត់ (លោក សារិន វណ្ណា) យល់ព្រមចុះហត្ថលេខា។
ដោយឡែក ចំពោះករណីទំនាស់ដីធ្លីវិញ បើតាមសម្តីរបស់អង្គរក្សរបស់ ឯកឧត្តម អ្នកតំណាងរាស្ត្រ មកពីគណបក្សប្រជាជនកម្ពុជា មួយរូប ដែលមានបញ្ហាវិវាទដីធ្លី បន្តិចបន្ទួចជាមួយអ្នកជាប់ព្រំ គឺត្រូវធ្វើចរិកថោកជាងឆ្កែទៀត ទើបជួបលោក សារិន វណ្ណា បាន ។ អង្គរក្សដដែលនិយាយទៀតថាសូម្បីតែរឿងមេរបស់ខ្ញុំ (អង្គរក្សអ្នកតំណាងរាស្ត្រ) ត្រូវចំណាយពេលព្យាយាមមកជួបជាមួយលោក ប្រធានមន្ទីរស្ទើរតែ 20ដង ទើបលោកប្រធានមន្ទីរអនុញ្ញាតអោយជួបម្តង ។ បើមិនអញ្ចឹងទេ ត្រូវមកអង្គុយចាំនៅមុខបន្ទប់រាប់ម៉ោងពេលខ្លះលោក ប្រធានចេញមកគាត់ឆ្លើយថា ចាំថ្ងៃក្រោយទៅពេលនេះគាត់ត្រូវទៅជួបសចៅហ្វាយក្រុង ពេលខ្លះគាត់ថារដ្ឋមន្ត្រីហៅ ពេលខ្លះគាត់ថា ដល់ម៉ោងទៅផ្ទះហើយ ទំរាំតែបានចូលជួបម្តងគឺត្រូវចំណាយពេលរាប់ខែ ពេលបានជួបហើយនោះគឺថាលោកប្រធានរូបនោះ (លោក សារិន វណ្ណា)គាត់គ្មានយល់មុខតំណាងរាស្ត្រឡើយ។
ពាក់ព័ន្ធ និងពត៌មានខាងលើនេះ អ្នកសារពត៌មានយើងបានសុំជួបជាមួយលោក សារិន វណ្ណា ដែរតែត្រូវបានជំនួយការលោក អោយមកជួបជាមួយគណនេយ្យមន្ទីរវិញ។ ដូច្នេះយើងនឹងព្យាយាមជួបជាមួយ លោក វណ្ណា ម្តងទៀត ដើម្បីអោយបានពត៌មានច្បាស់ជាពិសេសរឿងទំនាស់ដីគរុភ័ណ្ឌវត្តព្រះធម្មត្រ័យ ហៅវត្តព្រៃស និងឮដំណឹងថាការចេញប័ណ្ណកម្មសិទ្ធិដីអោយ លោ ហ៊ុន ប៊ុនធឿន ហៅតាលាង នៅភូមិទំនប់ សង្កាត់ ភ្នំពេញថ្មី ខណ្ឌសែនសុខ ដោយមិនមានការជូនដំណឹង ៕
