ក្រចេះ៖ មន្ត្រីសាខាកាំកុងត្រូលខេត្ត ដឹកនាំដោយលោក លាង បូរ៉ា ប្រធានសាខាខេត្តក្រចេះ សហកាជាមួយកម្លាំងចម្រុះប្រចាំច្រកទ្វារអន្តរជាតិព្រំដែនត្រពាំងស្រែ ដោយចុះអនុវត្តន៍ផ្ទាល់ពីក្រុមការងាររថយន្តមន្ទីរពិសោធន៍ចល័តរបស់អគ្គនាយកដ្ឋានកាំកុងត្រូល បានធ្វើការពិនិត្យទំនិញ បន្លែ ផ្លែឈើ និងសាច់ ដែលអាជីវករនាំចូលពីប្រទេសវៀតណាម ។
ក្នុងសកម្មភាពនៃការចុះត្រួតពិនិត្យទំនិញបន្លែផ្លែឈើធ្វើឡើង នាព្រឹកថ្ងៃទី២៧ ខែកញ្ញា ឆ្នាំ២០១៧ ដោយធ្វើផ្ទាល់ជាមួយក្រុមអាជីវករដឹកតាមរម៉កម៉ូតូ កម្លាំងជំនាញបានយកបន្លែ ផ្លែឈើ ជាច្រើនប្រភេទសរុបរហូតដល់ទៅ១៨មុខ រួមមាន ស្ពៃ ត្រសក់ ជាដើម។
ដោយធ្វើការពិនិត្យវិនិច្ឆ័យជាមួយនឹងម៉ាស៊ីនបច្ចេកវិទ្យាទំនើប និងអនុវត្តន៍ផ្ទាល់ដោយមន្ត្រីជំនាញបច្ចេកទេសឡាបូ រយៈពេលជាច្រើនម៉ោងនៅនឹងកន្លែងជាក់ស្តែង ។ ជាលទ្ធផលក្រោយធ្វើការពិនិត្យបន្លែ ផ្លែ ឈើទាំងនោះ មិនមានផ្ទុក់នូវសារធាតុគីមី ឬសារធាតុផ្សំអ្វីនៅក្នុងនោះឡើយ ។
ជាមួយគ្នានោះ ក្នុងថ្ងៃដដែល មន្ត្រីសាខាកាំកុងត្រូលខេត្ត បានបន្តចុះត្រួតពិនិត្យគុណភាពទំនិញ បន្លែ ផ្លែឈើ ត្រី សាច់គ្រប់ប្រភេទ នៅក្នុងផ្សារស្រុកស្នួល ដោយមានការចូលរួមពីលោក គង់ គីមនី អភិបាលស្រុកស្នួល ដើម្បីស្វែងរកសារធាតុពុល និងគីមី ឆ្លងកាត់តាមការពិនិត្យវិនិច្ឆ័យដោយម៉ាស៊ីនបច្ចេកវិទ្យាទំនើបរបស់អគ្គនាយកដ្ឋានកាំកុងត្រូល បានរកឃើញសារធាតុម្យ៉ាងនៅក្នុងផ្អក់ត្រីប្រា ផ្ទុកលាក់ច្រើនពេក ជាប្រភេទ សារជាតិហ្វម៉ាលីន ដែលបណ្តាលឲ្យខ្សោយក្រលៀន ។ ក្រៅពីនោះ មន្ត្រីជំនាញ បានយកមុខទំនិញ១៩មុខផ្សេងទៀត ដើម្បីធ្វើតេស្តរកសារធាតុពុលឲ្យកាន់តែច្បាស់លាស់ និងបង្កើនភាពជឿជាក់កាន់តែខ្លាំងសម្រាប់អ្នកប្រើប្រាស់ចុងក្រោយ ។
ក្រោយពីមន្ត្រីជំនាញកាំកុងត្រូល បានធ្វើការណែនាំ និងយកសំណាកបន្លែ ផ្លែឈើ ត្រី សាច់ ទៅពិនិត្យហើយនោះ អភិបាលស្រុកស្នួល លោក គង់ គីមនី និងលោក លាង បូរ៉ា ប្រធានសាខាកាំកុងត្រូលខេត្តក្រចេះ បានមានប្រសាសន៍លើកឡើងប្រហាក់ប្រហែលគ្នាទៅនឹងការយល់ដឹងរបស់ក្រុមអាជីវករ អ្នកលក់ចែកចាយបន្ត ដែលអាជីវករទាំងនោះ បាននិយាយទាំងទឹកមុខសប្បាយរីករាយថា ពួកគាត់បានដឹងច្បាស់អំពីផលប៉ះពាល់នៃការលក់ដូរនូវរបស់របរដែលមានផ្ទុកនៅសារធាតុគីមី និងជាតិពុល ។
ចំណែកលោកអភិបាលស្រុកស្នួល និងលោកប្រធានសាខាកាំកុងត្រូលខេត្ត ក៏បានសម្តែងការត្រេកអរផងដែរ ជាមួយនឹងការយល់ដឹងរបស់ប្រជាពលរដ្ឋក្នុងមូលដ្ឋាន។
ជាពិសេសលោកទាំងពីរ បានបញ្ជាក់ថា ការចុះត្រួតពិនិត្យនឹងការណែនាំននេះ មិនមែនធ្វើដើម្បីបង្ហាញ់តែម្តងនោះទេ ពោល គឺធ្វើការណែនាំនឹងចុះត្រួតពិនិត្យជាប្រចាំនៅគ្រប់ទីផ្សារ ច្រកព្រំដែន និងសាលារៀនផងដែរ ។ ព្រោះនេះ ជាកត្តព្វកិច្ចត្រូវតែធ្វើ និងដើម្បីសុខភាពពលរដ្ឋ និងកាត់បន្ថយភាពក្រីក្រដោយប្រយោលជាមួយនឹងរាជរដ្ឋាភិបាល ៕