បន្ទាប់ពី ឯកឧត្តម ឃួង ស្រេង បានឡើងមកកាន់តំណែង ជាអភិបាលរាជធានីភ្នំពេញ មិនបានប៉ុន្មានខែផង ធ្វើអោយប្រជាពលរដ្ឋក្នុងរាជធានីភ្នំពេញ មានការចាប់អារម្មណ៍យ៉ាងខ្លាំង ចំពោះចំណាត់ការរបស់ឯកឧត្តម និងមានមន្ត្រីមួយចំនួន ក៏ហាក់មិនមានការមិនពេញចិត្តផងដែរ។
តាមប្រភពប្រជាពលរដ្ឋមួយចំនួនដែលរស់នៅក្នុងរាជធានីភ្នំពេញ ហើយចូលចិត្តមកហូបកាហ្វេជុំគ្នានៅតាមភោជនីយដ្ឋាននានានៅក្នុងរាជធានីភ្នំពេញ បានជជែកគ្នាថា គួរអោយកោតសរសើរ ឯកឧត្តម ឃួង ស្រេង ដែលបានឡើងមកកាន់តំណែង ជាអភិបាលរាជធានីភ្នំពេញ ភ្លាម ហ៊ានចាត់ការចំណតរថយន្ត លក់ឡៃឡុងនៅម្តុំផ្សារចាស់ និងជុំវិញទីលានប្រជាធិបតេយ្យភ្លាម ហើយចាត់ការបានសម្រេចទៀត។ នេះពិតជាមិនធម្មតា ព្រោះថា ម្ចាស់រថយន្តដែលយកមកលក់នោះ សុទ្ធតែមិនធម្មតាទេ អ្នកខ្លះ កាន់អំណាចតាំងតែពី ឯកឧត្តម ឃួង ស្រេង មិនទាន់កើតផង។ បើនិយាយអោយចំអភិបាលក្រុងប៉ុន្មាននាក់ ហើយគេមិនហ៊ានប៉ះពាល់ទីតាំងនេះទេ (ទីតាំងចតរថយន្តម្តុំផ្សារចាស់) គឺទើបតែឯកឧត្តម ឃួង ស្រេង ម្នាក់ប៉ុណ្ណោះ ។ នេះយើងនិយាយពីចំណាត់ការ ចំពោះចំណតរថយន្ត ចំណែកឯចំណាត់ការចំពោះអ្នកមានលុយ មានអំណាច ដែលពូកែចាក់ដីលុបបឹង លប់ប្រឡាយយកធ្វើជាកម្មសិទ្ធិផ្ទាល់ខ្លួនវិញ មួយរយៈពេល នេះគេសង្កេតឃើញ ឯកឧត្តម អភិបាល ធ្វើរឿងក្តៅបន្តិចហើយ មិនថាប៉ះចំដីអ្នកធំណានោះទេ សូម្បីតែដីលោក ជំទាវ ស៊ុយ សុផាន នៅខណ្ឌច្បារអំពៅ ក៏ ឯកឧត្តម ឃួង ស្រេង បញ្ជាអោយកាយប្រឡាយវិញដែរ ។ ដែលទង្វើទាំងអស់នេះ ធ្វើអោយ ប៉ះពាល់យ៉ាងខ្លាំងចំពោះមន្ត្រីដែលធ្លាប់បានទទួលផលប្រយោជន៍ពីការដែលបិទភ្នែកបិទច្រមុះអោយគេចាក់លុបដីបឹងប្រឡាយ។ ជាពិសេស លោក សាំ ពិសិដ្ឋ ប្រធានមន្ទីសាធារណៈការ និងដឹកជញ្ជូនរាជធានីភ្នំពេញតែម្តង។
ពាក់ព័ន្ធនឹងលោក សាំ ពិសិដ្ឋ បើស្តាប់សំដីលោកពូម្នាក់កំពុងអង្គុយ ក្បែរនោះបាននិយាយថា បើនិយាយពីឈ្មោះ សាំ ពិសិដ្ឋ នោះវិញ មិនដឹងជាចេះជំនាញអ្វីអោយពិតប្រាកដនោះទេ ផ្នែកសំណង់ក៏មិនមែន ផ្នែកសាធារណការក៏មិនមែន បើផ្នែកស្ថាបត្យកម្មឬអាស៊ីទិច នោះ ប្រហែលជាអាចចេះខ្លះៗ ព្រោះឮថារាល់គម្រោងសាងសង់ស្ពានអាកាស ក្នុងរាជធានីភ្នំពេញ គឺសុទ្ធតែលោក សាំ ពិសិដ្ឋ ជាអ្នកគូសប្លង់ តែច្បាស់មិនច្បាស់យើងអត់ដឹងទេ ហេងស៊យជួលពួកម៉ៅការសំណង់ចិន អោយគូសអោយផងមិនដឹង?
តាមសម្តីក្រុមប្រជាពលរដ្ឋដដែលនិយាយថា អញ្ចឹងបានជាគម្រោងសាងសង់របាំងពុះចែកទ្រូងផ្លូវ នៅតាមបណ្តាស្តុបមួយចំនួន នៅក្នុងទីក្រុងភ្នំពេញធ្វើឡើងដូចកូនក្មេងដែលមិនបានចូលសាលារៀនសោះ! យើងពិនិត្យរបាំងពុះចែកទ្រូងផ្លូវនៅស្តុបពេលយើងជិះពីត្បូង មកដល់ភ្លើងស្តុប នៅខាងស្តាំរាងធំបន្តិចទៅមកពីជើងក៏អញ្ចឹង ដែរទៅខាងស្តាំ គឺរៀងវៀចបន្តិចទៅ ហ្អីដល់ពេលឆ្លងទៅដល់ខាងមុខស្រាប់តែរបាំងថ្មធំ នៅចំផ្លូវដែលយើងត្រូវធ្វើដំណើរតែម្តង នេះសម្រាប់យើងប្រជាពលរដ្ឋធ្លាប់ដឹង ចុះសម្រាប់អ្នកធ្វើតំណើរឆ្លងកាត់ម្តងម្កាល មិនបុចំថ្មនឹងទេឬអី ?
ប្រជាពលរដ្ឋម្នាក់ទៀតនិយាយថា មិនថាតែអ្នកអត់ដឹងទេ អាអ្នកដឹងក៏ធ្លាប់បុកដែរ ខ្ញុំឃើញតែញយ ពិសេសស្តុបផ្សារដែប៉ូ និងស្តុបទេពផន ។ ហើយបើនិយាយពីមធ្យោបាយ បញ្ចៀសការកកស្ទះចរាចរណ៍វិញ សូម្បីតែកូនប្រុសខ្ញុំទើបតែរៀនត្រឹមថ្នាក់ទី៧ ក៏និយាយថាមិនសមរម្យដែរ វាថាមិនចាំបាច់អីយើងទៅលើករបាំងពុំចែកទ្រូងផ្លូវ ដាក់អោយវាចវេអញ្ចឹងទេ ក៏យើងគួរច្រឹបចញ្ចើមផ្លូវតាមកែងៗ ដែលតម្រូវអោយគេបត់ស្តាំ អោយបានធំទូលាយទៅ វាលែងស្ទះបាត់ទៅហើយ តែនេះបែរជាទុកចិញ្ចើមផ្លូវអោយគេចតម៉ូតូឡាន សម្រាប់ចូលទិញឥវ៉ាន់ ពីហាងនៅជាប់ស្តុបនោះទៅវិញ ឬមួយជាប់ពាក់ព័ន្ធនឹងផលប្រយោជន៍?
ដោយឡែក បើតាមប្រភពពីមន្ត្រីមួយរូបដេលបំរើការងារនៅមន្ទីសាធារណៈការ និងដឹកជញ្ជូនរាជធានីភ្នំពេញបានប្រាប់ក្រុមអ្នកសារព័ត៌មាន ក្នុងលក្ខ័នមិនបញ្ចេញឈ្មោះថា៖ ចំពោះលោក សាំ ពិសិដ្ឋ ដែលឡើងមកកាន់តំណែងជានាយកមន្ទីសាធារណៈការ នេះគឺ មានការប្រទាំងប្រទើសគ្នា យ៉ាងខ្លាំងរវាងលោក កែប ចុតិមា លោក ត្រាំ អ៊ីវតឹក សម្តេច អគ្គមហាសេនាបតីតេជោ នាយករដ្ឋមន្ត្រី លោក ពេជ្យ ប៊ុនជិន រដ្ឋមន្ត្រីក្រសួងមុខងារសាធារណៈ ។ ប៉ុន្តែមិនដឹងថា យ៉ាងម៉េចបានជា លោក សាំ ពិសិដ្ឋ អាចឡើងមកកាន់តំណែងនេះ (នាយកមន្ទីសាធារណៈការ និងដឹកជញ្ជូនរាជធានីភ្នំពេញ) ហើយពេលមកធ្វើជាប្រធានភ្លាម រាល់គម្រោងសាង់សង់មិនថាស្ពានអាកាស ផ្លូវថ្នល់ លូទឹក សួនច្បារទេ គឺត្រូវបានលោកសិដ្ឋក្តាប់ទាំងអស់។ ជាពិសេសលោកសិដ្ឋពូកែគូសប្លង់ និងរៀបចំគម្រោងសាងសង់សំណង់ផ្សេងៗ របស់រដ្ឋដែលគម្រោងខ្លះមិនត្រូវអោយកើតមានសោះ លោកសិដ្ឋអាចធ្វើអោយកើតឡើងបានដូចជាស្ពានថ្មើជើង នៅមុខសាលា បឋមសិក្សាជម្ពូវ័ន្ត ជាដើម។ ឥឡូវនេះឮសូរថាលោក សាំ ពិសិដ្ឋ កំពុងសិក្សាធ្វើស្ពានអាកាសរង្វង់មូលចោមចៅទៀតហើយ។ ដែលកន្លែងនេះ មិនសមធ្វើស្ពានអាកាសនោះទេ ព្រោះផ្លូវនៅទីនោះ មានតែបួនទិស ដូច្នេះយើងគួរធ្វើភ្លើងស្តុប ល្អជាងអ្នកមកពីផ្លូវជាតិលេខ៣ អាចមកត្រង់ចំផ្លូវសហព័ន្ធរុស្សីបាន អ្នកមកពីផ្លូវវេងស្រេង អាចទៅចំផ្លូវជាតិលេខ ៤ បានរួចហើយ យើងដាក់ភ្លើង សញ្ញាព្រួញ ឆ្វេងស្តាំមុនក្រោយដូចបណ្តាស្តុបសំខាន់ៗក្នុងក្រុងបានហើយនេះអស់លុយតិចផង។ ប៉ុន្តែបើធ្វើអញ្ចឹង អាការស៊ីគម្រោងវាបានតិច ទើបលោកសិដ្ឋ ត្រូវរិះរកគ្រប់វិធីសាស្ត្រ ដើម្បីធ្វើយ៉ាងណាអោយបានគម្រោងធំៗឡើង។
ប្រភពដដែលបានបន្ថែមថា ៖ ដោយចំពោះការដាក់របាំង ពុំចែកទ្រូងផ្លូវវិញ បើការដាក់ចំមុខផ្ទះ ឬមុខហាង សាលារៀន គឺ លោកសិដ្ឋបញ្ជាអោយកូនចៅ ដាក់បិទទាំងអស់ ហើយបើម្ចាស់ផ្ទះណា ឬក៏ក្រុមហ៊ុនណា ពិបាកក្នុងការបត់ឡាន ឬម៉ូតូចូល ត្រូវមកជួបជាមួយប្រធានមន្ទីដើម្បីសុំដក ពីរ ឬ បី កង់ចញវិញ អញ្ចឹងស៊ីសស៊ូសយ៉ាងតិចបំផុត មួយកង់ ត្រូវចំណាយ ២០០$ បើមិនអញ្ចឹងទេគឺដាក់បិទផ្ជិតតែម្តង មិនខុសអីនឹងម្ចាស់ផ្ទះដែលត្រូវគេមករៀបរឺហ្គ្រែ ឬលូទឹក នៅចំពីមុខផ្ទះនោះទេ បើចង់អោយគេខិតទៅចំហៀងផ្ទះ ត្រូវចំណាយយ៉ាងតិច ៥០០$ ។ អញ្ចឹងហើយបានជាគេអង្គុយលើតំណែងជា ប្រធានមន្ទីរបានហ្នឹងយ៉ាងនេះ។
ជុំវិញព័ត៌មានខាងលើនេះ ក្រុមអ្នកសារព័ត៌មានយើងបានព្យាយាម សុំជួបសម្ភាសន៍ ជាមួយលោក សាំ ពិសិដ្ឋដែរ ប៉ុន្តែមិនអាចជួបបានព្រោះ ជំនួយការថាបើគ្មានការអនុញ្ញាត ឬណាត់ជួបជាមួយលោកនាយកទេ គឺមិនអនុញ្ញាតអោយចូលជួបឡើយ ៕
