បន្ទាប់ពីពេលថ្មីៗកន្លងទៅនេះ រឿងស្អុយអាសោចពុករលួយ របស់លោក កែត ស៊ីវីនី ប្រធានផ្សារដើមគរ ដែល បានបែកធ្លាយ ដោយសារតែបុគ្គលិក និងសន្តិសុខផ្សារបានចោទប្រកាន់ថា បានកិបកេងប្រាក់ខែពួកគេ ពី ៧ ម៉ឺនទៅ ២៥ ម៉ឺនរៀល រួចធ្វើ របាយការណ៍បំប៉ោងគំរោងដាក់ជូនទៅថ្នាក់លើថា បើកប្រាក់ខែចាប់ពី ៣០ ម៉ឺនទៅ ៤៥ ម៉ឺនរៀល ជូនពួក សន្តិសុខ និងបុគ្គ លិក ហើយត្រូវបានកាសែតក្នុងស្រុកផ្សព្វផ្សាយយ៉ាងព្រោងព្រាត ។
យោងតាមលិខិតរបស់បុគ្គលិក និងសន្តិសុខផ្សារដើមគរ បានធ្វើការចោទប្រកាន់លោក កែត ស៊ីវីនី ថា បានប្រព្រឹត្ត អំពីពុក រលួយ និងបានយកឈ្មោះមន្ត្រី នៅសាលារាជធានីភ្នំពេញ មកគម្រាមកូនចៅក្រោមឱវាទ នៅពេលដែលពួកគេ និយាយរឿង ប្រាក់ខែ ។
តាមប្រភពពីក្រុមសន្តិសុខផ្សារបានឱ្យដឹងថា ៖ តាមការណែនាំរបស់លោកអភិបាលខណ្ឌទួលគោក បានឱ្យលោក ប្រធានផ្សារ ដើមគរ បើកប្រាក់ខែឱ្យបុគ្គលិក និងសន្តិសុខនៅក្នុងផ្សារដើមគរ ក្នុងចំនួន ៣០ ម៉ឺនរៀលទៅ ៤០ ម៉ឺនរៀល តែលោកប្រធាន ផ្សារបើកឱ្យតែពី ៧ ម៉ឺនទៅ ២៥ ម៉ឺនរៀល តែប៉ុណ្ណោះ ទៅតាមឋានានុក្រម ។ ជាមួយនេះដែរ បានកឹបកេង ប្រាក់ដែលប្រមូល បានពីអាជីវករ លក់នៅលើដងផ្លូវដោយធ្វើរបាយការណ៍ទៅថ្នាក់លើពីប្រាក់ខែសន្តិសុខធម្មតា ក្នុង ១ ខែ ចំនួន ៧ ម៉ឺនរៀល ដាក់ ៣០ ម៉ឺនរៀល អនុប្រធានសន្តិសុខ ១០ ម៉ឺនរៀល ធ្វើរបាយការណ៍ដាក់ ៣៥ ម៉ឺនរៀល ប្រធានក្រុមសន្តិសុខ បានប្រាក់ ខែ តែ ២៥ ម៉ឺនរៀល ដាក់ក្នុងរបាយការណ៍ចំនួន ៤៥ ម៉ឺនរៀល ។ ក្រុមសន្តិសុខទាំងអស់ មាន ចំនួន ៥២ នាក់ ដូច្នេះ តើប្រ ធាន ផ្សារដើមគរលោក កែត ស៊ីវីនី កឹបកេងប្រាក់បានប៉ុន្មានលានរៀលក្នុងមួយខែៗ ?។
យោងតាមប្រភពខាងលើបានបញ្ជាក់ថា ៖ ចំណូលរបស់ផ្សារដើមគរ ក្នុងមួយខែៗ ដែលបានមកពីការទាត់កញ្ច្រែង ល្អី អាជីវករលក់ដូរលើដងផ្លូវ ជុំវិញផ្សារនេះរាប់សិបលានរៀល ។ ក្រៅពីនេះ នៅមានការកាត់ចិញ្ចើមផ្លូវឱ្យអាជីវករលក់ យកប្រាក់ និងធ្វើតូបយកប្រាក់ ជាប្រចាំឆ្នាំទៀត ដូចជាតូបជាង ២០ នៅជាប់មហោស្រពចេនឡាជាដើម ក្នុងមួយឆ្នាំ ៥០០ ដុល្លារ ។ តើលោកប្រធានយកប្រាក់ទៅណា ? ។
ក្រុមសន្តិសុខបានសំណូមពរឱ្យថ្នាក់លើជួយអន្តរាគមន៍ដំឡើងប្រាក់ខែ ទៅតាមការណែនាំរបស់សាលាខណ្ឌទួលគោក ផង ។ ប៉ុន្តែទោះជាមានការបែកធ្លាយរឿងអាស្រូវ ពុករលួយ ស្អុយរហ៊ុំប៉ុណ្ណឹងហើយ ក៏មកដល់ពេលនេះ បុគ្គលិក និងសន្តិ សុខដែល អាក់អន់ចិត្ត ពុំទាន់ឃើញខាងអធិការកិច្ច ឬមន្ត្រីប្រឆាំងអំពើពុករលួយ ចុះធ្វើការស្រាវជ្រាវ និងចាត់ការលើលោក កែត ស៊ីវីនី នៅឡើយទេ ។ ដោយឡែក ប្រភពពីសាលារាជធានីភ្នំពេញ បានឱ្យដឹងថា ៖ គេបានឃើញលោក កែត ស៊ីវីនី ក៏ខ្នះខ្នែងរត់ឆ្វេច ឆ្វាច ឡើងចុះសាលារាជធានីភ្នំពេញ សឹងរាល់ថ្ងៃផងដែរ ដើម្បីស្វែងរកអន្តរាគមន៍ ពីអ្នកមានអំណាចក្នុង សាលារាជធានីដើម្បី បានបន្តអង្គុយនៅលើកៅអី ប្រធានផ្សារដើមគរនេះបន្តទៅទៀត ។
តែទោះបីជាយ៉ាងណា គេសង្ឃឹមនិងជឿជាក់ថា លោក ប៉ា សុជាតិវង្ស ពិតជានឹងចេញមុខវះកាត់ និងរកយុត្តិធម៌ ក៏ដូចជាដោះ ស្រាយការលំបាករបស់បងប្អូនអាជីវករ លក់ដូរនៅផ្សារដើមគ ដែលកំពុងរងការគាបសង្កត់រាល់ថ្ងៃ ពីសំណាក់ លោកប្រធាន ផ្សារ កែត ស៊ីវីនី នេះជាមិនខាន ៕