ភ្នំពេញ៖ អាជ្ញាធររាជធានីភ្នំពេញ នឹងប្រើធម៌ ក្ដៅ ចំពោះអាជីវករ ណាដែលនៅតែបន្ដ លក់ដូរ ផលិតផល ផាវដែលមានមានសណ្ឋានដូចគ្រាប់បែក។ វិធានការក្ដៅ នេះត្រូវបានលើកឡើង ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ កាលពីរសៀលថ្ងៃទី២៥ខែកញ្ញាឆ្នាំ២០១៧នេះ នៅសាលារាជធានីភ្នំពេញ ក្រោមអធិបតីភាពលោកឃួង ស្រេង អភិបាលរាជធានីភ្នំពេញ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានឲ្យដឹងថា ៖ បញ្ហាផាវដែលមានរាងដូចជាគ្រាប់បែកនេះ កន្លងមករដ្ឋបាលរាជធានីភ្នំពេញ បានធ្វើសេចក្តីជូនដំណឹងដល់គ្រប់អាជីវករ ដែលប្រកបអាជីវកម្មលក់ដូរផាវ មានរាងដូចជាគ្រាប់បែក ត្រូវបញ្ឈប់ការលក់ដូរ ជាបន្ទាន់ និងស្នើដល់បងប្អូនប្រជាពលរដ្ឋ និងអាណាព្យាបាលដែលមានកូនក្មួយតូចៗត្រូវបញ្ឈប់ការប្រើប្រាស់ ហាមកូន ហាមក្មួយមិនឲ្យលេងផាវដែលមានសណ្ឋានដូចជាគ្រាប់បែកនេះទេ ព្រោះវាអាចនឹងបង្កឲ្យមានគ្រោះថ្នាក់ ។
លោកអភិបាលរាជធានី បានណែនាំដល់អាជ្ញាធរមូលដ្ឋាន ត្រូវធ្វើការណែនាំដល់ម្ចាស់ផ្សារទាំងអស់ឲ្យចុះត្រួតពិនិត្យ ហើយក្នុងករណីរកឃើញថាមានអាជីវករណា មិនបានអនុវត្តន៍តាមសេចក្តីណែនាំរបស់ រដ្ឋបាលរាជធានីភ្នំពេញ ដោយនៅបន្តលក់ដូរ ផាវដែលមានរូបរាងសណ្ឋានដូចជាគ្រាប់បែកនេះទៀត គឺត្រូវចាត់វិធានការឲ្យបានតឹងរ៉ឹងជាទីបំផុត ពីព្រោះថាយើងមិនចង់ឲ្យមានសោកនាដកម្មដូចករណីកុមារម្នាក់រងគ្រោះរហូតដល់បាត់បង់ជីវិត ដូចនៅខណ្ឌពោធិ៍សែនជ័យកាលពីប៉ុន្មានថ្ងៃមុនកន្លងមកនេះទេ ។
សាលារាជធានីនឹងចាត់វិធានការច្បាប់ដ៏តឹងរ៉ឹងបំផុត ដោយមិនចង់ឲ្យមានហានិភ័យ ឬក៏ដូចសោកនាដកម្មលើកុមារណាម្នាក់ បន្ដទៀតនោះទេ។