ភ្នំពេញ៖ ដើម្បីរក្សាបាននៅគុណភាពម្ហូបអាហារសម្រាប់ប្រជាពលរដ្ឋយកទៅ បរិភោគ មានសុខភាព ល្អ នៅក្នុងសង្គមគ្រួសារ នោះ មន្ដ្រី សាខាកាំកុងត្រូល នៅ ផែស្ងួតចុងទីភ្នំពេញ បានដឹកនាំក្រុមការងារមន្ត្រីក្រោមឱវាទ សហការជាមួយមន្ទីរពាណិជ្ជកម្ម ចុះត្រួតពិនិត្យទំនិញ នៅផ្សារនាគមាស ខណ្ឌ ទួលគោក ដើម្បីពិនិត្យមើលកាលបរិច្ឆេទនៅលើសំបកវេចខ្ចប់របស់ទំនិញ នឹងរកសារធាតុគីមីកក្នុងទំនិញ កាលពីថ្ងៃទី ២៦ កញ្ញា ឆ្នាំ២០១៧។
លោក គង់ វុទ្ធី អនុប្រធានសាខាកាំកុងត្រូលផែស្ងួតចុងទីភ្នំពេញ បានបញ្ជាក់ថា៖ ការចុះពិនិត្យទំនិញនៅផ្សារនាគមាសនេះក្រុមការងាររបស់លោកបានយកទំនិញចំនួន ៥៩មុខ ពីក្រុមអាជីវករផ្សារ ទៅពិនិត្យក្នុងឡានឡាប៉ូពិសោធន៍ស្វែងរកសារធាតុគីមីភ្លាមៗតែម្តង ហើយជាក់ស្តែងបានពិនិត្យរកឃើញមានសារធាតុគីមីនៅក្នុងទំនិញចំនួន ២មុខរួមមាន ជីរណា ១២,៥kg. ស្ពៃបូកគោ ១៦,៥គីឡូក្រាម សរុបទាំងអស់ចំនួន ២៩គីឡូក្រាម ត្រូវបានក្រុមការងាររបស់លោកដកហូតយកទៅដុតបំផ្លាញចោល នឹងបានហៅម្ចាស់ទំនិញទាំង២មុខនោះមកធ្វើកិច្ចសន្យាបញ្ឈប់ការលក់ទំនិញដែលមានលាយសារធាតុគីមីតទៅទៀត។
លោក គង់ វុទ្ធី ក៏បានណែនាំដល់ក្រុមអាជីវករទាំងអស់ ដាក់តាំងលក់ផលិតផលអោយត្រូវតាមលក្ខណះបច្ចេកទេស ដោយញែកចេញពីគ្នារវាងគ្រឿងប្រើប្រាស់ដែលមានផ្ទុកសារធាតុពុលនិងម្ហូបអាហារ ហាមការដាក់តាំងផលិតផលភេសជ្ជៈត្រូវកំដៅថ្ងៃ និងការដាក់លក់ផលិតផលហួសកាលបរិច្ឆេទជាដើម។ ហើយលោកបានអំពាវនាវដល់ អាជីវករ អ្នកចែកចាយ លក់ដុំ លក់រាយ អ្នកផលិត នាំចូលចែក ចាយ ត្រូវតែមានប្រភពច្បាស់លាស់សិនមុននឹងទទួលលក់ ហើយបញ្ចប់ការលាយបន្ថែមនូវសារធាតុគីមីហាត់ទៅលើផលិតផលម្ហូបអាហារដែលធ្វើអោយប៉ះពាល់ដល់សុខភាពអ្នកប្រើប្រាស់។
ចំពោះប្រតិបត្តិការខាងលើនេះ គឺប្រជាពលរដ្ឋក៏ដូចជាអាជីវករផ្សារបានសម្តែងទឹកចិត្តរីករាយ នឹងគាំទ្រចំពោះសកម្មភាពរបស់មន្ត្រីកាំកុងត្រូលដែលតែងតែចុះពិនិត្យទំនិញផ្សេងៗតាមបណ្តាផ្សារនឹងហាង និងស្តាម៉ាត នានាក្នុងរាជធានីភ្នំពេញ រកសារធាតុគីមី ដើម្បីការពារសុវត្ថិភាពម្ហូបអាហារក៏ដូចជាការពារសុខភាពរបស់ពួកគាត់ផងដែរ៕
