ភ្នំពេញ៖ គណៈបញ្ជាការឯកភាពរាជធានីភ្នំពេញដឹកនាំដោយលោក ឃួង ស្រេង អភិបាលរាជធានីភ្នំពេញ នៅរសៀលថ្ងៃទី២៥ កញ្ញានេះបានបើក ប្រជុំមួយ ដើម្បីដាក់ផែនការរៀបចំសណ្តាប់ធ្នាប់លើបណ្តោយផ្លូវ១១ខ្សែនៅកណ្តាលក្រុង ខណៈ ផ្លូវទាំងនេះកំពុងត្រូវបានគេរំលោភយកមកប្រើប្រាស់ជាប្រយោជន៍ផ្ទាល់ខ្លួនមិនស្តាប់តាមការណែនាំរបស់អាជ្ញាធររាជធានីភ្នំពេញ។
កិច្ចប្រជុំនេះធ្វើឡើងដោយមានការចូលរួមពីលោកនាយឧត្តសេនីយ៍ជួន សុវណ្ណ អគ្គស្នងការរងនគរបាលជាតិនិងជាស្នងការនគរបាលរាជធានី លោករ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និជាមេមេបញ្ជាការកងរាជអាវុធហត្ថរាជធានីភ្នំពេញ អភិបាលខណ្ឌទាំង១២ មន្ទីរចំណុះអោយរដ្ឋបាលរាជធានីភ្នំពេញនិងមន្ត្រីពាក់ព័ន្ធមួយចំនួនទៀត។
នាយករដ្ឋបាលរាជធានីលោក ហួត ហៃ ក្នុងឱកាសនៃកិច្ចប្រជុំនោះបានលើកឡើងពីរបាយការណ៍មួយចំនួនស្តីពីបញ្ហាសណ្តាប់ធ្នាប់របៀប រៀបរយលើផ្លូវទាំង១១ខ្សែដែលរដ្ឋបាលរាជធានីភ្នំពេញបានដាក់ចេញជាផ្លូវអតិភាព ក្នុងការរៀបចំសណ្តាប់ធ្នាប់មុនគេ ។ ទោះបីជាយ៉ាងណាក្តី ក្នុងរបាយការណ៍នោះ នៅបានបញ្ជាក់ថា លើផ្លូវទាំង១១ខ្សែនេះ ការរៀបចំសណ្តាប់ធ្នាប់លើផ្លូវទាំង១១ខ្សែនេះ នៅមានការរំលោភនៅឡើយ ដែលតម្រូវអោយរដ្ឋបាលរាជធានីភ្នំពេញ ត្រូវមានវិធានការបន្ត៕