រាជធានីភ្នំពេញ ៖ ថ្លែងនៅក្នុងពិធីបិទទ្វារទឹកទំនប់វ៉ារីអគ្គីសនីសេសានក្រោម២ កាលពីព្រឹកមិញ សម្តេច ហ៊ុន សែន បានរិះគន់ខ្លាំងៗ ចំពោះអ្នកវិភាគនយោបាយមួយចំនួនដែលតែងតែវិភាគ ខុសការពិត ខណៈដែលសមត្ថភាពពួកគេមិនបានស្មើ នឹងកូនប្រុសទាំង៣របស់សម្តេចផង ។
សម្តេច ហ៊ុន សែន បានផ្ញើរសារទៅកាន់អ្នកវិភាគខ្លះ ដែលមានងារជាបណ្ឌិត ហើយពេលមាន បញ្ហាអ្វីបន្តិច ត្រូវតែប្រជុំសភា ។ សម្តេចបញ្ជាក់ថា ការប្រជុំសភាទាល់តែប្រជុំសម្រេចថា ធ្វើសង្គ្រាមឬអត់ ដូច្នេះមិនមែនស្អីបន្តិចចេះតែប្រជុំសភាទេ ។
សម្តេច ហ៊ុន សែន បានបន្ថែមថា ត្រូវស្គាល់មុខងារសភាឲ្យច្បាស់ និងត្រូវស្គាល់មុខងារ នាយករដ្ឋមន្ត្រី ឲ្យច្បាស់ផងដែរ ។ ក្រុមអស់លោកកុំគិត សមត្ថភាព របស់អស់លោក មិនទាន់បានស្មើកូនរបស់ខ្ញុំទេ ខ្ញុំសូមប្រដៅ លោកគ្មានបណ្ឌិតយោធា ដូចកូនហ៊ុន សែន ទេ ។ កូនហ៊ុន សែន ៣នាក់ ប្រៀបធៀបជ្រើសមួយទៅ ។ បើខ្លួនឯងល្ងង់ណាស់ ទៅរៀន ឡើងវិញទៅ ។ ខ្លួនកាន់បក្សនយោបាយហើយ ខ្លួនដើរវិភាគ ហើយវិភាគមិនដែលត្រូវទៀត ៕
