ភ្នំពេញ៖ លោកព្រឹទ្ធាចារ្យ កោសល្យ គង់ ណៃ បាននាយកពានរង្វាន់សិល្ប: វប្បធម៌ ហ្វូគុអូកា ឆ្នាំ២០១៧ ពីប្រទេសជប៉ុន មកដល់កម្ពុជាហើយនៅរសៀលថ្ងៃទី២៤ ខែកញ្ញា ក្រសួងវប្បធមិនិងវិចិត្រសិល្បៈរៀបចំក្បួនដង្ហែស្វាគមន៍ និងអបអរសាទរជូន ចាប់តាំងពីព្រលានយន្តហោះអន្តរជាតិភ្នំពេញ រហូតដល់សាលមហោស្រពចតុមុខ។
លោក ហាប់ ទូច អគ្គនាយក នៃអគ្គនាយកដ្ឋានបច្ចេកទេសវប្បធម៌ នៃក្រសួងវប្បធម៌ និងវិចិត្រសិល្បៈ បានឲ្យដឹងថា «ក្រោយពីលោកតា គង់ ណៃ ត្រឡប់មកដល់ព្រលានយន្តហោះអន្តរជាតិភ្នំពេញភ្លាម យើងមានរថយន្តសារ៉ែន នាំមុខ រថយន្តក្រុមឆៃយ៉ាំ រថយន្តដង្ហែលោកតា គង់ ណៃ អមដោយចាប៉ីដងវែង និងម៉ូតូស ១០ គ្រឿង រថយន្តតន្ត្រីទិព្វ ក្បួនរថយន្តថ្នាក់ដឹកនាំ ក្បួនរថយន្តសិល្បៈ និងយុវជន»។
ក្នុងពិធីមានពាក្យស្លោកសសេរថា៖«អបអរសាទរ កព្រឹទ្ធាចារ្យ កោសល្យ គង់ ណៃ ទទួលបានពានរង្វាន់សិល្ប: វប្បធម៌ហ្វូគុអូកា ពីប្រទេសជប៉ុន ឆ្នាំ២០១៧» និងមានបដាដែលមានរូប លោកព្រឹទ្ធាចារ្យ កោសល្យ គង់ ណៃ កាន់ចាប៉ីដងវែងផងដែរ។
លោកព្រឹទ្ធាចារ្យកោសល្យ គង់ ណៃ ដែលជាសិល្បករចាប៉ីដងវែងរបស់កម្ពុជា ត្រូវបានគណៈកម្មាធិការពានរង្វាន់ក្រុងហ្វុគុអូកានៃប្រទេសជប៉ុន សម្រេចជ្រើសរើសជាជ័យលាភី នៃពានរង្វាន់សិល្បៈវប្បធម៌ហ្វុគុអូកា ឆ្នាំ២០១៧។
ពានរង្វាន់ ហ្វុគុអូកានេះ បានបង្កើតឡើងនៅឆ្នាំ១៩៩០ ក្នុងគោលបំណងផ្តល់កិត្តិយសដល់បុគ្គល ក្រុម ឬស្ថាប័ននានា ដែលមានស្នាដៃលេចធ្លោ ក្នុងការថែរក្សា និងបង្កើតនូវវប្បធម៌អាស៊ីមួយ ប្រកបដោយ លក្ខណៈពិសេសនិងភាពចម្រុះ សំដៅជំរុញការផ្លាស់ប្តូរវប្បធម៌ទៅវិញទៅមក និងលើកកម្ពស់ការយល់ដឹងអំពីតម្លៃនៃវប្បធម៌អាស៊ី៕