ភ្នំពេញ ៖ នៅថ្ងៃទី២៤កញ្ញានេះក្រសួងពាណិជ្ចកម្មនិងក្រសួងបរិស្ថានបានប្រញ៉ាប់ប្រញ៉ាល់ចេញលិខិតបដិសេធថាខ្លួនមិនដូឈ្មោះរម្យនីដ្ឋានបូកគោដែលជាកេរ្តិ៍តំណែលតាំងពីអតីព្រះមហាកក្សត្រនោះទេ!!។ក្រសួងបរិស្ថានរបស់លោកសាយសំអាល់ បានចេញមុខបំភ្លឺចំពោះការសម្រេចផ្លាស់ប្ដូរឈ្មោះនេះ ដោយបញ្ជាក់ថា ឈ្មោះប្រវត្តិសាស្ត្ររបស់តំបន់ រមណីយដ្ឋាន ភ្នំបូកគោ មិនត្រូវបានផ្លាស់ប្ដូរឡើយ ដោយត្រូវរក្សានូវឈ្មោះប្រវត្តិសាស្ត្ររបស់ខ្លួនដូចដើម។ “រមណីយដ្ឋានភ្នំបូកគោ ដែលមានទីតាំងស្ថិតនៅក្នុង «ឧទ្យានជាតិព្រះមុនីវង្សបូកគោ» នៅតែរក្សាឈ្មោះប្រវត្តិសាស្ត្ររបស់ខ្លួនដដែល ដោយមិនមានការផ្លាស់ប្ដូរទៅឈ្មោះផ្សេងឡើយ។ ឧទ្យានជាតិព្រះមុនីវង្សបូកគោ ដែលមានទីតាំងស្ថិតនៅក្នុងភូមិសាស្ត្រខេត្តកំពត ព្រះសីហនុ និងខេត្តកំពង់ស្ពឺ មានផ្ទៃក្រឡាសរុបចំនួន១៥៤៤៥៨ហិកតា ត្រូវបានបង្កើតឡើងនៅឆ្នាំ១៩៩៣ ហើយក្រសួងបរិស្ថាន មានតួនាទីគ្រប់គ្រង ការពារ និងអភិរក្សធនធានធម្មជាតិ។
ក្នុងលិខិតបំភ្លឺចេញនៅថ្ងៃទី២៤ ខែកញ្ញានេះ ក្រសួងពាណិជ្ជកម្ម បានបញ្ជាក់ថា ក្រសួងបានអនុញ្ញាតឲ្យក្រុមហ៊ុន ប្តូរឈ្មោះសាខាក្រុមហ៊ុន សុខា អូតែល «ឋានសួគ៌បូកគោ» ទៅជាឈ្មោះ «សុខាឋានសួគ៌» តែក្រសួងថា មិនមានសិទ្ធិអនុញ្ញាតឲ្យក្រុមហ៊ុនផ្លាស់ប្តូរឈ្មោះរមណីយដ្ឋានឋានសួគ៌បូកគោទេ។
ការប្ដូរឈ្មោះរមណីយដ្ឋានភ្នំបូកគោ ដែលជារមណីយដ្ឋានប្រវត្តិសាស្ត្រ ស្ថិតក្នុងឧទ្យានជាតិព្រះមុនីវង្ស ទៅជាឈ្មោះរបស់ឯកជននៅពេលនេះ បានធ្វើឲ្យមានប្រតិកម្មយ៉ាងខ្លាំងពីសំណាក់មហាជននៅក្នុងឱកាសទិវាបុណ្យភ្ជំបិណ្ឌ។ តាមរយៈហ្វេសប៊ុករឿងនេះបានធ្លាយដល់នាយករដ្ឋមន្ត្រីសម្ដេចតេជោ ហ៊ុន សែនដោយលោក បានហៅការឈ្មោះ ឬស្លាកសញ្ញាថ្មីនេះថា ជាស្លាកសញ្ញាអត់ច្បាប់ ហើយបញ្ជាឲ្យអភិបាលខេត្តកំពត ធ្វើការរុះរើជាបន្ទាន់ឲ្យបានមុនម៉ោង១១ព្រឹក ថ្ងៃទី២៣ ខែកញ្ញា ឆ្នាំ២០១៧នេះ។
សម្ដេចបានសរសេរបង្ហោះនៅលើទំព័រហ្វេសប៊ុកផ្ទាល់ខ្លួនយ៉ាងដូច្នេះថា “សូមអរគុណបងប្អូនជនរួមជាតិ ដែលបានឲ្យខ្ញុំដឹងពីការដូរឈ្មោះរមណីយដ្ឋានភ្នំបូកគោ ទៅជាឈ្មោះផ្សេង ដែលរាជរដ្ឋាភិបាល និងអាជ្ញាធរគ្រប់លំដាប់ថ្នាក់មិនបានដឹង និងមិនបានអនុញ្ញាត។ ខ្ញុំបានបញ្ជាឲ្យអភិបាលខេត្តកំពត ទៅដកហូតចេញនូវស្លាកសញ្ញាអត់ច្បាប់ ចេញឲ្យបានមុនម៉ោង១១ថ្ងៃនេះ។ តំបន់ប្រវត្តិសាស្ត្រ ត្រូវតែរក្សាឈ្មោះដើមជាដាច់ខាត”។
ក្រោយពីផ្ទុះរឿងរសើបនេះនៅព្រលប់ថ្ងៃទី២៣ ខែកញ្ញា ឆ្នាំ២០១៧ក៏ មានបែកធ្លាយលិខិតមួយច្បាប់ចុះថ្ងៃទី១ ខែកញ្ញា ឆ្នាំ២០១៧នោះ របស់ក្រសួងពាណិជ្ជកម្មចុះហត្ថលេខាដោយលោករដ្ឋមន្ត្រីប៉ាន់សូសក្ក័បញ្ជាក់ពីភាពស្របច្បាប់ នៃការសុំដូរឈ្មោះរមណីយដ្ឋានភ្នំបូកគោ ទៅជា រមណីយដ្ឋាន សុខា ឋានសួគ៌ ពីសំណាក់ក្រុមហ៊ុន សុខា អូតែល របស់អ្នកឧកញ៉ា សុខ គង់។
លិខិត បានបញ្ជាក់ថា ក្រុមហ៊ុន សុខា អូតែល ដែលមានអ្នកឧកញ៉ា សុខ គង់ ជាប្រធានក្រុមប្រឹក្សាភិបាល បានស្នើក្រសួងពាណិជ្ជកម្ម ក្នុងការប្ដូរនាមករណ៍សាខារបស់ក្រុមហ៊ុន ពីនាមករណ៍ចាស់ «សាខាក្រុមហ៊ុន សុខា អូតែល “ឋានសួគ៌ បូកគោ”» ទៅជានាមករណ៍ថ្មី «សាខាក្រុមហ៊ុន សុខា អូតែល “សុខា ឋានសួគ៌”»។
យ៉ាងណាក៏ដោយ ក្នុងលិខិតដដែលបញ្ជាក់បន្ថែមថា ក្រសួងពាណិជ្ជកម្ម ទទួលចុះបញ្ជីនូវការប្ដូរនាមករណ៍សាខារបស់ក្រុមហ៊ុន សុខា អូតែល – Sokha Hotel Co., Ltd ប៉ុន្តែក្រុមហ៊ុនត្រូវទទួលខុសត្រូវទាំងស្រុងចំពោះមុខច្បាប់ ប្រសិនបើមានការតវ៉ាណាមួយទាន់ទងនឹងការផ្លាស់ប្ដូរនេះ។ក្នុងលិខិតអនុញ្ញាតដដែលនោះ ក្រសួងពាណិជ្ជកម្មក៏បានចម្លងជូនក្រសួងសេដ្ឋកិច្ច ក្រសួងការងារ អគ្គនាយកដ្ឋានពន្ធដារ នាយកដ្ឋានផែនការ ស្ថិតិ និងព័ត៌មានពាណិជ្ជកម្ម សាលាខេត្តកំពត និងមន្ទីរពាណិជ្ជកម្មកំពតផងដែរ។
បានសេចក្តីថាគឺដឹងគ្រប់គ្នាអត់តែនាយករដ្ឋមន្ត្រីតែប៉ុណ្ណោះ?។ក្នុងសេចក្ដីប្រកាសព័ត៌មានចុះថ្ងៃទី២៣ ខែកញ្ញា រដ្ឋបាលខេត្តកំពត មិនត្រឹមតែអះអាងថា មិនបានដឹងអំពីការផ្លាស់ប្ដូរឈ្មោះនេះទេ ប៉ុន្តែ បានបញ្ជាក់ថា មិនគាំទ្រដាច់ខាតចំពោះការផ្លាស់ប្ដូរឈ្មោះនេះ។បើចឹងម៉េចមិនប្រតិកម្មតាំងពីដើមខែកញ្ញាមក?។
ទាក់ទងលិខិតថ្ងៃទី១កញ្ញានេះក្រសួងពាណិជ្ជកម្មបញ្ជាក់ថា ក្នុងលិខិតមួយចុះថ្ងៃទី០១ ខែកញ្ញា គឺក្រសួងអនុញ្ញាតឲ្យក្រុមហ៊ុនប្តូរឈ្មោះសាខារបស់ខ្លួននោះ ក្នុងគោលបំណងបញ្ជាក់ថា ក្រុមហ៊ុន សុខា អូតែល មានសាខាធ្វើអាជីវកម្មនៅតាមខេត្ត ហើយចំពោះការលើកស្លាក គឺត្រូវលើកនៅលើអគារទីស្នាក់ការសាខាក្រុមហ៊ុនប៉ុណ្ណោះ ដើម្បីងាយស្រួលដល់សមត្ថកិច្ចបំពេញបែបបទពន្ធដារ និងនីតិវិធីនានា។(មើលទៅដូចកួតចឹង!!)
