បន្ទាយមានជ័យ ៖ យោងតាមរបាយការណ៍របស់សមត្ថកិច្ចកងរាជអាវុធហត្ថស្រុកអូរជ្រៅខេត្តបន្ទាយមានជ័យបានឲ្យដឹងនៅព្រឹកថ្ងៃទី២២ខែកញា២០១៧នេះថាកាលពីនៅថ្ងៃទី ១៨ខែកញ្ញាឆ្នាំ២០១៧កន្លងទៅនោះ សមត្ថកិច្ចថៃបានចាប់ខ្លួនពលករ កម្ពុជាចំនួន០៩នាក់នៅចំណុច ឧទ្យានជាតិថាប់ឡានទី៣ខ្នងងម៉ាន់ តំបន់ខូកគ្រះឆាយស្រុកខនបុរី ខេត្ត នគររាជសីម៉ា ខណៈដែលពលករកម្ពុជា កំពុងតែកាប់ឈើ និងជញ្ជូនឈើនៅក្នុងដែនឧទ្យានជាតិ របស់ព្រះរាជាណាចក្រថៃ រហូតមកដល់ថ្ងៃទី២០ខែ កញ្ញា ឆ្នាំ២០១៧សមត្ថកិច្ចថៃដដែលបានបន្តចាប់ខ្លួនពលរដ្ឋខ្មែរបានបន្ថែមទៀតចំនួន៩នាក់ នៅចំណុចដូចខាងលើសរុប១៨នាក់ ដែលត្រូវបានចាប់ខ្លួនដោយសមត្ថកិច្ចរបស់ថៃ ។
ប្រភពបានបង្ហើបមកថា ពលករកម្ពុជាចំនួន១៨នាក់នោះបានឆ្លើយសារភាពនៅចំពោះមុខសមត្ថកិច្ចថៃថាក្រុមរបស់ពួកគាត់ មានគ្នាទាំងអស់ចំនួន៤៥នាក់ហើយបានរត់គេចខ្លួនអស់ចំនួន២៧នាក់តាមច្រកធម្មជាតិស្រុកអារញ្ញខេត្តស្រះកែវ ដែលប្រឈមនិងខេត្តបន្ទាយមានជ័យ ។ ពលករទាំង១៨នាក់ដែលរងគ្រោះនោះបានបន្តថាកាលពីថ្ងៃទី១៤ខែកញ្ញាឆ្នាំ២០១៧ពួកគាត់ត្រូវបានមេខ្យល់កម្ពុជារៀបចំស្បៀងទុកជូនពួកខ្លួនចំនួន៤៥នាក់ដើម្បីធ្វើសកម្មភាពឡើងទៅប្រទេសថៃ ជាមួយគ្នានេះ មានមេខ្យល់ជនជាតិថៃចំនួន២នាក់ ជាអ្នកនាំផ្លូវ នៅទឹកដីថៃហើយ បច្ចុប្បន្នសមត្ថកិច្ចថៃកំពុងរុករកមេខ្យល់ថៃនោះទៀតផងដែរ ។ ប្រភពថា ពលករចំនួន៤៥នាក់នោះ បានធ្វើដំណើចេញទៅកាប់ឈើក្រញូងនិងជញ្ជូនឈើតាមច្រកសេះងាប់ ក្នុងតំបន់(ភ្នំឆ័ត្រ) ស្ថិតនៅក្នុងភូមិ ចំការគរឃុំស្វាយចេក ស្រុកស្វាយចេក ខេត្តបន្ទាយមានជ័យ ដែលមានព្រំប្រទល់ជាប់នឹងភូមិខ្វៅរ៉ៃ ឃុំតាប់ផាយ៉ា ស្រុកតាប់ផាយ៉ា ខេត្តស្រះកែវ ប្រទេសថៃ។
ពាក់ពន្ធ័និងករណីខាងលើមានប្រភពច្បាស់ការពីក្រុមអ្នករកស៊ីដឹកជញ្ជូនឈើក្រញ៉ូងតាមខ្សែបន្ទាត់ព្រំដែនខ្មែរថៃបានបង្ហើបមកថា មេខ្យល់ដែលតែងតែដឹកជញ្ជូនពលករឲ្យចូលកាប់ឈើក្រញ៉ូងនោះគឺជាមន្ត្រីយោធាតំបន់ផ្នែកសឹករងស្រុកអូរជ្រៅទៀតផង ហើយមន្ត្រីយោធារូបនោះបានធើ្វសកម្មភាពជាច្រើនឆ្នាំហើយដែរ គេសង្ស័យថា លោកឧត្តមសេនីយ៏ ត្រី យោធាម្នាក់ទំនងជាដឹងរឿងករណីនេះច្បាស់ប៉ុន្តែហាក់ទើសដៃទើសជើង ព្រោះកន្លងទៅ មេយោធារូបនោះក៏មានរឿងច្រើនបង្គួរលើករណីឈើក្រញ៉ូងដូចគ្នានេះដែរ តែព័ត៌មានមិនត្រូវបានបែកធ្លាយច្រើន ។
យ៉ាងក៏ដោយនៅថ្ងៃទី២២កញ្ញានេះលោកឧត្តមសេនីយ៍ ភ្លន់ តារាមេបញ្ជាការតំបន់សឹករងខេត្តបន្ទាយមានជ័យ អ្នកសារព័ត៌មានយើង មិនអាចសុំឲ្យលោកប្រតិកម្មលើករណីខាងលើបាននៅឡើយទេ ព្រោះមិនអាចទាក់ទងបាន។
ដោយឡែក លោក វរសេនីយ៏ ឯក បោន បិនមេបញ្ជាការបញ្ជាការដ្ឋានកងរាជអាវុធហត្ថខេត្តបន្ទាយមាន័យ នារសៀលថ្ងៃដដែលនេះ លោលមិនអាចធើ្វការអធិប្បាយជុំវិញករណីខាងលើបានទេ ដោយលោកប្រាប់ថាមានភារកិច្ចផ្ទាល់ខ្លួន។ ចំណែកលោកឧត្តមសេនីយ៍ទោ ពេជ្យ វណ្ណា ប្រធានការិយាល័យទំនាក់ទំនាក់ព្រំដែនកម្ពុជាថៃ ទៀតសោត នៅព្រឹកដដែលនេះក៏មិនអាចស៊ំកិច្ចអន្តរាគមន៏បានយ៉ាងណានោះនៅឡើយទេ ជុំវិញករណីពលរដ្ឋកម្ពុជាត្រូវសមត្ថកិច្ចថៃចាប់ខ្លួន ខណៈឆ្លងដែនខុសច្បាប់ទៅកាប់ឈើនៅដីនោះ ៕