ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ជនរួមជាតិខ្មែរទាំងអស់ ចូលរួមទប់ទល់រាល់ឧបាយកលទុច្ចរិត និងការប៉ុនប៉ងតាមគ្រប់រូបភាព ក្នុងគោលបំណងធ្វើឱ្យ ប្រទេសកម្ពុជា ធ្លាក់ក្នុងភាពវឹកវរ និងអស្ថិរភាព ជាថ្មីម្តងទៀត។តាមរយៈសារលិខិត ផ្ញើជូនចំពោះជនរួមជាតិខ្មែរ ដើម្បីអបអរសាទរ ដល់ទិវាសន្តិភាពអន្តរជាតិ នៅ ថ្ងៃទី២១ ខែកញ្ញា ឆ្នាំ២០១៧ ។
«ក្នុងស្មារតីថែរក្សាសន្តិភាពរបស់ជាតិយើង ទូលព្រះបង្គំ សូមអំពាវនាវដល់ជនរួមជាតិទាងអស់ ចូលរួមក្នុងការថែរក្សាសន្តិភាព ពង្រឹងឯកភាពជាតិ អនុវត្តវប្បធម៌សន្ទនា គោរពច្បាប់ ដោះស្រាយបញ្ហាដោយសន្តិវិធី និងទប់ស្កាត់រាល់ឧបាយកល និងការប៉ុនប៉ងតាមគ្រប់រូបភាព ដែលមានគោលបំណងធ្វើឱ្យ ប្រទេសធ្លាក់ក្នុងសភាពវឹកវរ និងអស្ថិរភាព»។
សម្តេចតេជោ ហ៊ុន សែន ក៏បានបញ្ជាក់ផងដែរថា រាជដ្ឋាភិបាលកម្ពុជា មានការប្តេជ្ញាចិត្តយ៉ាងម៉ឺងម៉ាត់ក្នុងការការពារសន្តិភាពនេះ ព្រោះថាសន្តិភាពដែលយើងបានមកនេះ គឺជាសេចក្តីសុខរួមសម្រាប់យើងទាំងអស់គ្នា។