កំពង់ចាម៖លោក លីម ប្រុស មេឃុំគៀនជ្រៃមកពីគណបក្សសង្គ្រោះជាតិ ត្រូវបាននគរបាលចាប់ឃុំខ្លួនបណ្តោះអាសន្នតាមបញ្ជាព្រះរាជអាជ្ញាខេត្តកំពង់ចាម កាលពីថ្ងៃទី ២១ កញ្ញា នៅស្នងការដ្ឋាននគរបាលខេត្តកំពង់ចាម ក្រោមការចោទប្រកាន់ថា បានប្រើអំពើហិង្សា និងប្រមាថអាយុជីវិត ។លោក លីម ប្រុស អាយុ៤៥ឆ្នាំ ត្រូវបានរងការចោទប្រកាន់ថា បាន ប្រើប្រាស់អំពើហិង្សាដោយចេតនា លើឈ្មោះ ទូច ផល្លា អាយុ ៣៨ ឆ្នាំ និងប្រពន្ធឈ្មោះ ប៉ិច ស្រី នៅក្នុងជម្លោះពាក្យសំដីដោយផ្តើមដំបូងពីករណីម៉ូតូខូចនៅកណ្តាលផ្លូវ។
សមត្ថកិច្ចរាយការណ៍ថា លោកមេឃុំ លីម ប្រុស បានវាយមួយដៃចំកណ្តាលថ្ងាសទៅលើជនរងគ្រោះឈ្មោះ ទូច ផល្លា នៅក្នុងទំនាស់ពាក្យសំដីលើការសាងសង់រោងការកូន។ លោកមេឃុំដែលស្ថិតនៅក្នុងអាការៈស្រវឹងផងនោះ ក៏បានជេរប្រមាថគំរាមកំហែងលើឈ្មោះ ប៉ិច ស្រី មិនឲ្យលើករោងការកូនបាននោះទេ បើហ៊ានលើក គឺដាក់ទង់សហើយ។
ក្រោយពីទទួលបានពាក្យបណ្តឹងពីជនរងគ្រោះលើករណីនេះ ព្រះរាជអាជ្ញាអមសាលាដំបូងខេត្តកំពង់ចាម បានចេញដីកាឃាត់ខ្លួន លោក លីម ប្រុស ភ្លាមៗ នឹងបាននាំទៅឃុំខ្លួនជាបណ្តោះអាសន្ន នៅស្នងការដ្ឋាននគរបាលខេត្តកំពង់ចាម មុនពេលបញ្ជួនខ្លួនទៅកាន់តុលាការដើម្បីចោទប្រកាន់ជាផ្លូវការ។
សូមបញ្ជាក់ថា នេះគឺជាករណីទីមួយហើយ ដែលមានការចាប់ខ្លួនមេឃុំគណបក្សសង្គ្រោះជាតិ ស្ថិតនៅក្នុងតំណែង មេឃុំ-ចៅសង្កាត់មួយចំនួនទៀត កំពុងស្ថិតនៅក្រោមការឃ្លាំមើលនិងការចាប់កំហុសផងដែរ។
មន្ត្រីគណបក្សសង្គ្រោះជាតិប្រចាំស្រុកកំពង់សៀម កំពុងពឹងពាក់មេធាវីនៅអង្គការអាដហុក ដើម្បីជួយការពារក្តីនេះនិងមានការសុំសម្របសម្រួលគ្នាក្រៅតុលាការផងដែរ។សូមបញ្ជាក់ដែរថា នៅក្នុងការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី ៤ ឆ្នាំ២០១៧ កន្លងទៅនេះ គណបក្សសង្គ្រោះជាតិបានឈ្នះតំណែងមេឃុំ-ចៅសង្កាត់ប្រមាណជា៤៨៩ឃុំ-សង្កាត់ក្នុងចំណោម ១៦៤៦ ឃុំ-សង្កាត់ នៅទូទាំងប្រទេស ៕