បាត់ដំបង ៖ កិច្ចប្រជុំផ្សព្វផ្សាយនិតិវិធី ស្តីពីការចុះត្រួតពិនិត្យលើ ការប្រើប្រាស់មន្ត្រីរាជការជាគ្រូបង្រៀន និងផ្នែករដ្ឋបាលគ្រូបជាប់កិច្ចសន្យា គ្រូបង្រៀនថ្នាក់ ២ វេន និងគ្រូបង្រៀនថ្នាក់គួរ បានប្រព្រឹត្តទៅ កាលពីថ្ងៃទី ១៧ ខែសីហា នៅសាលាខេត្តបាត់ដំបង ក្រោមអធិបតីភាពឯកឧត្តម ថោ សេដ្ឋាណា អនុរដ្ឋលេខាធិការនៃក្រសួងមុខងារសាធារណៈ។
លោក ជាម ច័ន្ទសោភ័ណ អភិបាលរងខេត្តបាត់ដំបង បានបញ្ជាក់ថាវិស័យអប់រំក្នុងខេត្តបាត់ដំបង គិតត្រឹមខែកក្កដា មានមន្ត្រីជាគ្រូបង្រៀនចំនួន ៨៦០០នាក់ ស្ត្រី ៤៤២៧នាក់ មានគ្រូ ជាប់កិច្ចសន្យា៣០៩នាក់ គ្រូបង្រៀនថ្នាក់ ២វេន និងថ្នាក់គួរចំនួន ២០៥នាក់។ ក្រោមការដឹកនាំរបស់ រាជរដ្ឋាភិបាល បានដាក់ចេញនូវគោលនយោបាយនិង យុទ្ធសាស្ត្រចតុកោណដំណាក់កាលទី៣ គួបផ្សំជាមួយការខិតខំ អនុវត្តយ៉ាងសកម្ម របស់អាជ្ញាធរគ្រប់លំដាប់ថ្នាក់ បានធ្វើឲ្យខេត្តបាត់ដំបង សម្រេចបានស្នាដៃលិចធ្លោជាច្រើន មានដូចជា ធានារក្សាបាននូវសន្តិសុខសុវត្ថិភាព និងសណ្តាប់ សាធារណៈ ល្អប្រសើរ ធ្វើឲ្យប្រជាពលរដ្ឋ កាន់តែមានជំនឿ និងចូលរួមជាមួយ អាជ្ញាធរដែនដី និង សមត្ថកិច្ចគ្រប់លំដាប់ថ្នាក់ ក្នុងការអភិវឌ្ឍន៍មូលដ្ឋានជាដើម។
ឯកឧត្តម ថោ សេដ្ខាណា បានគូសបញ្ជាក់ថា ការចុះស្រង់ទិន្នន័យ ការប្រើប្រាស់គ្របខ័ណ្ឌ មន្ត្រីរាជការ ជាគ្រូបង្រៀន និងផ្នែករដ្ឋបាល គ្រូជាប់កិច្ចសន្យា ក្នុងពេលនេះ គឺជាការពិនិត្យឡើងវិញ ពីតម្រូវការជាក់ស្តែង នៃការប្រើប្រាស់ មន្ត្រីរាជការ ជាគ្រូបង្រៀន និងផ្នែករដ្ឋបាល និងគ្រូបង្រៀន ជាប់កិច្ចសន្យា ហើយនិងជាការអនុវត្ត គោនយោបាយជាយុទ្ធសាស្ត្រ ចតុកោណ របស់រាជរដ្ឋាភិបាល គឺការងារអភិបាលកិច្ច។ក្នុងយុទ្ធនាការ ចុះត្រួតពិនិត្យការប្រើប្រាស់គ្របខ័ណ្ឌ មន្ត្រីរាជការគ្រូបង្រៀន និងផ្នែករដ្ឋបាល និងគ្រូបង្រៀនជាប់កិច្ចសន្យា នៅតាមគ្រឹះស្ថានសិក្សាទាំងអស់ក្នុងខេត្តបាត់ដំបង យើងនេះ មេត្តាជួយគាំទ្រ និងសហការឲ្យបានល្អ ធ្វើយ៉ាងណាដើម្បីឲ្យយុទ្ធនាការនេះ សម្រេចបាន ជោគជ័យជាស្ថាពរ ស្របតាមទិសដៅរបស់រាជរដ្ឋាភិបាលកម្ពុជាយើង ៕
