ភ្នំពេញ៖ សម្តេចតេជោ ហ៊ុន សែននាយករដ្ឋមន្ត្រីនៃកម្ពុជានៅថ្ងៃថ្ងៃទី២០ ខែកញ្ញា ឆ្នាំ២០១៧នេះទទួលបានការប្រកាសគាំទ្រពេញទំហឹងថែមទៀតពីគណបក្សកុំមុយនីសចិន។ លោក លីវ យុនសាន សមាជិកគណៈអចិន្ត្រៃយ៍ការិយាល័យនយោបាយ នៃគណកម្មាធិការមជ្ឈឹមបក្សកុម្មុនីស្តចិន បាន បាននាំមកនូវការផ្តាំផ្ញើសួរសុខទុក្ខ ពីលោកប្រធានាធិបតីចិន ស៊ី ជិន ពីង និងនាយករដ្ឋមន្ត្រី លី ឃឺឈៀងជូនដល់សម្តេចតេជោផងដែរ។ នេះជាដំណើទស្សនកិច្ចទីពីររបស់មន្ត្រីជាំន់ខ្ពស់ចិនបន្ទាប់ពីអនុប្រធាសភាចិនទើបបញ្ចប់ទៅកាលពីប៉ុន្មានថ្ងៃមុននេះ។
សម្តេចតេជោ ហ៊ុន សែន រីករាយស្វាគមន៍ចំពោះដំណើរទស្សនកិច្ចរបស់ លោក លីវ យុនសាន និងគណៈប្រតិភូ ព្រមទាំងបានអរគុណចំពោះការផ្តាំផ្ញើសួរសុខទុក្ខ របស់លោកប្រធានាធិបតីចិន ស៊ី ជិនពីង និង នាយករដ្ឋមន្ត្រី លី ឃឺឈៀង ចំពោះសម្តេច។
សម្តេចតេជោ បានបញ្ជាក់ថា ទំនាក់ទំនងរវាងដៃគូយុទ្ឋសាស្ត្រគ្រប់ជ្រុងជ្រោយ ក្នុងលក្ខណៈជាបងប្អូនរវាងចិន-កម្ពុជាគឺស្ថិតនៅរឹងមាំ ហើយការរីកចម្រើនរបស់កម្ពុជាគឺមិនអាចកាត់ផ្តាច់ពីមិត្តចិនបានឡើយ។ សម្តេចតេជោ បានអរគុណមិត្តចិន ដែលបន្តជួយកម្ពុជាក្នុងគ្រាលំបាករហូតមកដល់ពេលនេះ ក្នុងនោះគឺមានទាំងការគៀងគរអ្នកវិនិយោគគិន មកវិនិយោគនៅកម្ពុជា ជំនួយឥណទាន និងជំនួយឥតសំណងជាច្រើនដើម្បីអភិវឌ្ឍន៍ប្រទេស។
មកទល់ឆ្នាំ ២០១៧ នេះគឺកម្ពុជាទទួលជំនួយមិត្តចិនជាង៤,៨០០លានដុល្លារហើយ។
សម្តេចតេជោ ក៏បានស្នើឲ្យភាគីចិនជួយជំរុញឲ្យទុនសម្រាប់អភិវឌ្ឍន៍ផ្លូវរថភ្លើងល្បឿនលឿន ផ្លូវគមនាគមន៍ជាតិ ព្រលានយន្តហោះនៅខេត្តសៀមរាប នឹងព្រមទាំងពន្លឿនការនាំចូលអង្ករកម្ពុជាទៅកាន់ប្រទេសចិនក្នុងកូតាថ្មី (៣០០,០០០តោន) ឲ្យបានលឿនផងដែរ។ សម្តេចតេជោ ក៏បានស្នើសុំឲ្យជួយជំរុញការកសាងផ្លូវតាមជនបទ សាលារៀន តាមជនបទ និងស្រះទឹកតាមជនបទ…អោយបានឆាប់រហ័សដើម្បីបម្រើសេចក្តីត្រូវការ របស់ពលរដ្ឋជាពិសេស នៅតាមទីជនបទ។
សម្តេចតេជោ ក៏បានអរគុណមិត្តចិនដែលបានផ្តល់ជំនួយ ២លានយាន់ បន្ថែមថ្ងៃនេះ សម្រាប់ប្រើប្រាស់ជាប្រយោជន៍ដល់សង្គមជាតិ។ បន្ទាប់ពីកិច្ចប្រជុំនេះហើយ សម្តេចតេជោ ហ៊ុន សែន និង លោក លីវ យុនសាន បានអញ្ជើញជាអធិបតីនៅក្នុងពិធីចុះហត្ថលេខាលើពិធីសារចំនួន ៦ ហើយបន្ទាប់មក សម្តេចតេជោ បានរៀបចំពិសារអាហារថ្ងៃត្រង់ជូន លោកលីវ យុនសាន និងគណប្រតិភូទាំងអស់ក្នុងបរិយាកាសរីករាយ និងស្និទ្ឋស្នាលក្រៃលែង។
ឯកសារចំនួន០៦ដែលត្រូវបានចុះហត្ថលេខាក្រោមវត្តមានមេដឹកនាំកម្ពុជានិងចិនរួមមាន៖
១៖ អនុស្សរណៈនៃការយោគយល់ ស្តីពី «ការផ្លាស់ប្តូរទស្សនកិច្ចសិក្សា និង ការសហប្រតិបត្តិការ» រវាង គណបក្សកុម្មុយនីស្តចិន និង គណបក្សប្រជាជនកម្ពុជា។
២៖ អនុស្សរណៈនៃការយោគយល់ ស្តីពី «ការជំរុញទំនាក់ទំនងនិងសហប្រតិបត្តិការរវាងអង្គការមិនមែនរដ្ឋាភិបាល នៃសាធារណៈរដ្ឋប្រជាមានិតចិន និងព្រះរាជាណាចក្រកម្ពុជា» រវាង បណ្តាញអង្គការមិនមែនរដ្ឋាភិបាលចិនដើម្បីទំនាក់ទំនងអន្តរជាតិ និងវេទិកាសម្ព័ន្ធសង្គមស៊ីវិល។
៣៖ អនុស្សរណៈនៃការយោគយល់ ស្តីពី «ការអនុវត្តគំរោងលើកកំពស់ជីវភាព» រវាងក្រសួងសុខាភិបាល នៃព្រះរាជាណាចក្រកម្ពុជា និងមូលនិធិចិនដើម្បីសន្តិភាព និងការអភិវឌ្ឍន៍។
៤៖ អនុស្សរណៈនៃការយោគយល់ ស្តីពី «ការអនុវត្តគំរោងលើកកំពស់ជីវភាព»» រវាង ក្រសួងអប់រំ នៃព្រះរាជាណាចក្រកម្ពុជា និង មូលនិធិចិន ដើម្បីសន្តិភាព និងការអភិវឌ្ឍ។
៥៖ អនុស្សរណៈយោគយល់គ្នា ស្តីពី «កិច្ចសហការថតភាពយន្តឯកសារ»រវាងស្ថានីយទូរទស្សន៍មជ្ឈឹមចិន និង ស្ថានីយទូរទស្សន៍ជាតិកម្ពុជា។
៦៖ អនុស្សរណៈយោគយលគ្នា ស្តីពី «ការសហប្រតិបត្តិការសិក្សាលើគំរោងសាងសង់បណ្តាញទូរទស្សន៍ឌីជីថលទូទាំងប្រទេសកម្ពុជា» រវាងក្រសួងព័ត៌មានកម្ពុជានៃព្រះរាជាណាចក្រកម្ពុជា និង ទូទស្សន៍យួណាន នៃសាធារណរដ្ឋប្រជាមានិតចិន៕