មណ្ឌលគិរី៖ កាលពីដើមឆ្នាំ២០១៧មានការបង្ក្រាបបទល្មើសព្រៃឈើដ៏នៅតំបន់អូរហ៊ុចខេត្តមណ្ឌលគិរីហើយរកឃើញមន្ត្រីគ្រាក់ៗក្នងខេត្តមួយចំនួនឃុបឃឺតបើឲ្យយួនលួចចូលកាប់បានធ្វើឲ្យសមត្ថកិច្ចមួយចំនួននៅតាមបន្ទាត់ព្រំដែនខ្លាចញញើតខ្លះៗដែរ។ប៉ុន្តែថ្មីៗមានសេចក្តីរាយការណ៍ថាមានសមត្ថកិច្ច២រូប ដែល មានតួនាទីការពារនៅប៉ុស្តិ៍របៀងការពារ ព្រំដែនក្បាលដំរី ក្នុងស្រុកពេជ្រាដា មិនដឹងថាគាត់អាងស្អីទេគឺនៅតែមានឃុបឃិតជាមួយជនជាតិវៀតណាម បើកឲ្យមានការកាប់ឈើហ៊ុបនៅក្បែរប៉ុស្តិ៍ក្បាលដំរី ឆ្លងដែនទៅប្រទេសវៀតណាមយ៉ាងគគ្លើនឌឺក្រុមបង្ក្រាបរបស់នាយឧត្តមសេនីយ៍សៅសុខានិងអគ្គស្នងការនគរបាលជាតិ ។
ប្រភពពីមន្ត្រីជំនាញ២រូបសុំលាក់ឈ្មោះបានលួចបង្ហើបឲ្យដឹងថា លោក មុន ភីនី មានតួនាទីជាមេប៉ុស្តិ៍ស្ដីទីនគរបាលការពារ ព្រំដែនក្បាលដំរី និងលោក កែវ សុភ័ក្រ មានតួនាទីជាមេបញ្ជាការកងអនុសេនាតូចលេខ១ ពួកគេបានលួចឃុបឃិត ជាមួយជនជាតិវៀតណាមបើកឲ្យមានការកាប់ឈើក្នុងដែនជម្រកសត្វព្រៃស្រែពក ចេញទៅប្រទេសវៀតណាមតាមច្រក របៀងក្បាលដំរី ដែលពួកគេគ្រប់គ្រងជារឿយៗ ។
កាលពីអំឡុងដើមខែកញ្ញា ពួកគេបានអនុញ្ញាត ឲ្យជនជាតិវៀតណាមចូលមកកាប់ និងដឹកជញ្ជូនឈើចេញទៅប្រទេសវៀតណាម ចំនួន០២រថយន្តកែច្នៃ និងសេសសល់ ឈើហ៊ុបចំនួន១៥ដើម ត្រៀមដឹកចេញទៅវៀតណាម តែត្រូវបានក្រុមមន្ត្រីបរិស្ថាននៃដែនជម្រកសត្វព្រៃស្រែពកបង្ក្រាប បាន កាលពីថ្ងៃទី០៣ កញ្ញា ២០១៧ កន្លងទៅនេះ។គួកត់សម្គាល់ឈើនៅសេសសល់ ដែលមន្ត្រីជំនាញបង្ក្រាបនេះ គឺមាន ចម្ងាយតែ៥០០ម៉ែត្រប៉ុណ្ណោះ ពីប៉ុស្តិ៍ក្បាលដំរី ។
លោក កែវ សុភគ៌ ប្រធានមន្ទីរបរិសា្ថនខេត្តមណ្ឌលគិរីបានឲ្យដឹងថា ឈើហ៊ុបចំនួន១៥ដើម ដែលត្រូវបានបង្ក្រាបនេះ គឺជាប្រភេទឈើផ្ចឹក និងប្រភេទឈើស្រឡៅ បង្ក្រាបដោយកម្លាំងដែនជម្រកសត្វព្រៃស្រែពក និងកម្លាំងនគរបាល ដែលបម្រើការក្នុងដែនជម្រក ពុំមានការចូលរួមសហការពីកម្លាំងយោធា និងនគរបាលនៅ ប៉ុស្តិ៍ក្បាលដំរី នោះទេ ។
ពាក់ព័ន្ធនិងករណីនេះ លោក មុន ភីនី មេប៉ុស្តិ៍ស្ដីទីការពារព្រំដែនក្បាលដំរី និងលោក កែវ សុភ័ក្រ មេបញ្ជាការកងអនុសេនាតូចលេខ១ យើងមិនអាចទំនាក់ទំនងសុំការបំភ្លឺបានទេ ។ ចំណែកលោក អ៊ុក សំណាង ស្នងការ នគរបាលខេត្តមណ្ឌលគិរី ដែលទើបឡើងកាន់ដំណែងថ្មីក្រោយពីផ្ទះរឿងឃុបឃឹតជាមួយយួននៅអូរហ៊ុចបានប្រាប់កាសែតថា លោកមិនសន្និដ្ឋានថា មន្ត្រីរបស់លោក ស្អាតស្អំ ឬយ៉ាងណានោះទេ ប៉ុន្តែក្នុងករណីនេះ បើលោករកឃើញថា លោក មុន ភីនី ពិតជាឃិបឃិតបើកឲ្យមានជំនួញ ឈើឆ្លងដែនតាមប៉ុស្តិ៍ក្បាលដំរីនេះមែន លោកនឹងចាត់វិធានការលើបុគ្គលនេះ តាមវិន័យរបស់កងកម្លាំង(ស៊ិក) ។
ចំណែកលោក ឃិន ម៉េងស្រេង មេបញ្ជាការយោធាខេត្តមណ្ឌលគិរី បានឲ្យដឹងថា ករណីនេះលោកពុំបានដឹងទេ ជុំវិញការនាំឈើចេញទៅប្រទេសវៀតណាម តាមច្រកក្បាលដំរីនេះ ប៉ុន្តែករណីបង្ក្រាបឈើក្បែរប៉ុស្តិ៍ក្បាលដំរី កាលពីពេល ថ្មីៗកន្លងទៅនេះ គឺលោកជាអ្នកបញ្ជារឲ្យកម្លាំងរបស់លោកនៅទីនោះបង្ក្រាបផ្ទាល់តែម្ដង ។
មជ្ឈដ្ឋាននានាក្នុងខេត្តមណ្ឌលគិរី បានរំពឹងថា លោក អ៊ុក សំណាង ស្នងការនគរបាលខេត្តមណ្ឌលគិរី ដែលទើបឡើងកាន់ដំណែងថ្មី និង លោក ឃិន ម៉េងស្រេង មេបញ្ជាការយោធាខេត្តមណ្ឌលគិរី នឹងត្រួតពិនិត្យលើ កងកម្លាំងរបស់លោកនៅតាមបន្ទាត់ព្រំដែនយ៉ាងតឹងរឹង មិនឲ្យមានករណីបទល្មើសព្រៃឈើឆ្លងដែននៅខេត្តមណ្ឌលគិរី កើតឡើងច្រំដែល ដូចពេលកន្លងមកនោះទេ ៕