មណ្ឌលគីរី៖ដោយមើលឃើញទុក្ខលំបាក់របស់ប្រជាពលរដ្ឋរស់នៅភូមិពូទុង ឃុំចុងផ្លាស ស្រុកកែវសីមា ឯកឩត្តម ស្វាយ សំអ៊ាង អភិបាលខេត្តបានបញ្ជូនលិខិតស្នើរសុំរបស់ប្រជាពលរដ្ឋ៩០០គ្រួសារ ជូនទៅខុទ្ទកាល័យសម្ដេចតេជោ ហ៊ុន សែនដើម្បីសុំសម្តេចជួយផ្តល់លទ្ធភាព ជួយដល់ប្រជាពលរដ្ឋអាចធ្វើអាជីវកម្មលក្ខណៈគ្រួសារនិងក្រុមសាមគ្គីអាចមានលទ្ធភាពធ្វើអាជីវកម្មក្នុងដីជ្រៅជាងនេះបន្តិចទើបអាចទទួលបានផលព្រោះជំម្រៅបច្ចុប្បន្នដែលក្រសួងបានកំណត់ឲ្យមានត្រឹមតែ ២០ មែត្រប៉ុណ្ណោះ។ តែជម្រៅដីដែលក្រសួងបានកំណត់ គឺពួកគាត់មិនបានទទូលផលកំរ៉ៃអ្វីឡើយ។
ប្រជាពលរដ្ឋដែលរស់នៅកំបន់ខាងលើបានឲ្យដឹងថារបរប្រកបរ៉ែមាសជាលក្ខណៈគ្រួសាររបស់ពួកគាត់ធ្វើតាំងពីអំឡុងឆ្នាំ ១៩៩០ មកម្លេះប៉ុន្តែនៅ ២០១៥ ២០១៦ ក្រសួងរ៉ែ និងថាមពលបានផ្ដល់សិទ្ធវិនិយោគឲក្រុមហ៊ុន រ៉ុង ឆេង ចំនួន២០០០ ហិចតា និងសហគមន៍ចំនួន ៤៣ហិចតា។តាំងពីក្រសួងបានផ្តល់សិទ្ធឲ្យក្រុមហ៊ុនចិននោះមកពួកគាត់មិនអាចរករ៉ែបានឡើយបើតាមការកំណត់ចម្រៅដីរបស់ក្រសួងនោះ ។ជាងនេះទៅទៀតក្រុមហ៊ុន រ៉ុង ឆេង តែងតែជីកចូលដីរបស់ពួកគាត់ថែមទៀត។
ពលរដ្ឋខាងលើបានស្នើសុំដល់សម្ដេចតេជោ ហ៊ុន សែន ក៏ដូចជាលោក ស៊ុយ សែម រដ្ឋមន្ដ្រីក្រសួងរ៉ែ និងថាមពល ឲ្យជួយដោះស្រាយ និងអនុញ្ញាតឲ្យពួកគាត់អាចជីកជម្រៅតាមលទ្ធិភាពរបស់ពួកគាត់ដែលអាចធ្វើទៅបានផងព្រោះពួកគាត់មិនដែលជួបបញ្ហាអ្វី ដូចនៅតំបន់ផ្សេងៗ ដែលជីកកកាយយ៉ាងណាធិបតេយ្យនិងបើកចំហរដោយគ្មានច្បាប់នោះទេ។
ប្រជាពលរដ្ឋក៏ស្នើដល់ថ្នាក់ដឹកនាំ មេត្តាជួយកំណត់ទីតាំងឲ្យបានច្បាស់លាស់បន្ថែមទៀត រវាងដីសហគមន៍របស់ពលរដ្ឋ និងរបស់ក្រុមហ៊ុនចិន រ៉ុង ឆេង ព្រោះកន្លងមកក្រសួងបានកំណត់រួចមកហើយ ប៉ុន្ដែក្រុមហ៊ុនចិនមួយនេះតែងតែបំពានចូលដីរបស់សហគមន៍ញឹកញាយដូចច្នេះពួកគាត់ក៏សូមឲ្យខាងក្រសួងរ៉ែ ជួយកំណត់បន្ថែមជម្រៅដីឲ្យពួកគាត់បាន រស់ផង៕