ភ្នំពេញ៖ លោកឃឹម សារឹទ្ធ រដ្ឋលេខាធិការក្រសួងវប្បធម៌និងវិចិត្រសិល្បៈ បានបញ្ជាក់ថា៖ ការធ្វើពិធីបុណ្យភ្ជុំបិណ្ឌ ក្រៅវត្តអារាមនេះ ឧទ្ទិសកុសលដល់វិញ្ញាណក្ខន្ធ ប្រជាជនខ្មែរ ស្លូតត្រង់ នៅសារមន្ទីរទួលស្លែងនេះ គឺមានរយៈពេល ១៧ ឆ្នាំហើយ ដែលសម្តេចតេជោ និងកិត្តិព្រឹទ្ធបណ្ឌិត បាន ប្រគល់ភារកិច្ចជូន លោកស្រីឧបនាយករដ្ឋមន្ត្រីម៉ែន សំអន នាព្រឹកថ្ងៃទី ១៨ កញ្ញា ឆ្នាំ២០១៧ ។
លោកបានបន្តថា៖ ការដែលយើងធ្វើពិធីបុណ្យភ្ជុំបិណ្ឌ នៅសារមន្ទីរទួលស្លែង មុនបុណ្យភ្ជុំបិណ្ឌធំនោះ ដោយសារ តែជនរងគ្រោះដែលបានស្លាប់ក្នុងសម័យប៉ុលពត ដោយអ្នកខ្លះមានសាច់ញាតិ និងអ្នកខ្លះគ្មានសាច់ញាតិ ហើយដួងព្រលឹងរបស់ពួកគាត់នៅវិលវល់ក្នុងគុកទួលស្លែងនេះ។
ក្នុងឱកាសនោះដែរ លោករដ្ឋលេខាធិការ បានចោទជាសំណួរថាហេតុអ្វីបានជាយើងធ្វើពិធីនេះក្នុងគុកទួលស្លែង? ហើយលោកបញ្ជាក់ថា ដោយសារតែទួលស្លែងនេះ មិនមែនជាទីវត្តអារាមទេ ដូច្នេះបើមិនមែនជាវត្តយើងត្រូវនិមន្តព្រះសង្ឃពីវត្តដើម្បីមកធ្វើបុណ្យ ហើយបើយើងនិមន្តព្រះសង្ឃចំថ្ងៃបុណ្យភ្ជុំបិណ្ឌធំ គឺមិនអាចនិមន្តព្រះសង្ឃមកបានទេ ប៉ុន្តែព្រះសង្ឃល្មមៗអាចនិមន្តមកបាន តែ ករណីនេះសុទ្ធព្រះសង្ឃធំៗ ទាល់តែយើងធ្វើពិធីមុនទើបអាចនិមន្តមកបាន”។ “ប្រសិនបើយើងធ្វើចំថ្ងៃពិធីបុណ្យភ្ជុំបិណ្ឌធំនោះ មន្ត្រីរាជការ បងប្អូនសាច់ញាតិមិត្តជិតឆ្ងាយ មិនអាចមកចូលរួមក្នុងពិធីបុណ្យក្នុងសារមន្ទីរទួលស្លែងបានទេ ពីព្រោះពិធីបុណ្យនៅទួលស្លែងជាបុណ្យសាធារណៈ ហើយនៅពេលនេះមានបងប្អូនមួយចំនួន បានធ្វើដំណើរទៅស្រុកកំណើរអស់ច្រើនផងដែរ ប៉ុន្តែទោះជាយ៉ាងណាយើងបានពន្យារពេលដល់ថ្ងៃនេះ ក៏នៅតែមានបងប្អូនមកចូលរួម ដើម្បីបញ្ជូនកុសលផលបុណ្យដល់អ្នកស្លាប់ទាំងអស់”។ លោកឃឹម សារឹទ្ធ បានថ្លែងបញ្ជាក់យ៉ាងដូច្នេះ។
ការធ្វើពិធីបុណ្យនៅទួលស្លែងនេះ អ្នកស្រុកឥឡូវមិនដូចពីដើមទេ កាលពីស្រុកពីដើមឃើញគេធ្វើបុណ្យចេះតែនាំមកធ្វើបុណ្យនឹងគេដែរ ប៉ុន្តែស្រុកឥឡូវនេះ បើមនុស្សមិនពេញចិត្ត មិនសប្បាយចិត្ត គេមិនមកធ្វើបុណ្យជាមួយយើងទេ ដូច្នេះពួកគាត់មានអត្ថន័យខ្ពង់ខ្ពស់ណាស់ ហើយការធ្វើបុណ្យនៅទួលស្លែងនេះ ពិតជាមានន័យសំខាន់និងស័ក្តិសិទ្ធិណាស់ ។ ដូច្នេះយើងបានយកពួកគាត់មកធ្វើជាក្រុមគ្រួសារ រឿងអ្វីដែលពួកគាត់ដែលស្លាប់ទៅមិនសប្បាយចិត្ត ហើយនេះគឺជារឿងដែលល្អបំផុតនិងពេញបរិបូរណ៍។
លោករដ្ឋលេខាធិការ បានបញ្ជាក់ថា “ខ្ញុំគិតថាប្រសិនបើមានសម្តេចតេជោ គឺជានាយករដ្ឋមន្ត្រី ត្រូវតែធ្វើពិធីបុណ្យនេះជារៀងរាល់ឆ្នាំ ដើម្បីបង្ហាញដល់យុវជនជំនាន់ក្រោយ ថាអំពីពួកគាត់បានស្លាប់យ៉ាងវេទនា ។ លោកក៏បានស្រង់ប្រសាសន៍សម្តេចនាយករដ្ឋមន្ត្រីមកបញ្ជាក់ថា ក្នុងនាមជាគាត់ជានាយករដ្ឋមន្ត្រី ដែលធ្លាប់បានថ្លែងថា ទុក្ខលំបាករបស់ពលរដ្ឋ គឺជាទុកលំបាករបស់គាត់ ហើយខ្ញុំសង្ឃឹមថាសម្តេចតេជោ នៅតែជានាយករដ្ឋមន្ត្រី នៅទីនេះក៏នឹងមានធ្វើពិធីបុណ្យរហូត”។
ក្នុងឱកាសនោះដែរ លោកឆាយ វិសុទ្ធ ប្រធានការិយាល័យគ្រប់គ្រងសារមន្ទីរទួលស្លែង បានបញ្ជាក់ថា មន្ទីរស២១នេះ ជាមន្ទីរឃុំឃាំងមនុស្សចុងក្រោយ ក្នុងរបបវាលពិឃាត ដែលភាគរយនៃការរួចខ្លួនពីស្លាប់ មានតិចតួចបំផុត។ អ្នកជាប់ឃុំនៅទីនេះ មានតែការសម្រេចចុងក្រោយគឺសម្លាប់ចោលតែប៉ុណ្ណោះ ប៉ុន្តែមុនឈានដល់ការកាប់សម្លាប់ អ្នកទោសទាំងអស់ បានទទួលនូវទោសទណ្ឌកម្មយ៉ាងធ្ងន់ធ្ងរបំផុត ហើយអ្នកដែលខ្មែរក្រហមសម្លាប់ត្រូវបានកសាងឯកសារធ្វើចាប់បង្ខំទៅដល់ជនស្លូតត្រង់ តាមរយៈការវាយនឹងរម្ពាត់ ខ្សែតីយ៍ ដកក្រចក ឆក់ខ្សែភ្លើង។
លោកបានដកស្រង់សម្តីរបស់ជនរងគ្រោះម្នាក់ដែលបានរួចផុតជីវិតរហូតដល់សព្វថ្ងៃនេះ មកបញ្ជាក់ថា ពួកគាត់បានរងនូវទារុណកម្មយ៉ាងខ្លាំង ដោយយកខ្សែភ្លើងមកឆក់ រហូតមានអ្នកខ្លះបាត់ត្រចៀកមិនអាចស្តាប់សំឡេងបាន។ លោកបានថ្លែងថា អ្នកទោសក្នុងគុកទួលស្លែង មានប្រមាណជិត២ម៉ឺននាក់ត្រូវបានសម្លាប់ ប៉ុន្តែសារព័ត៌មានជាតិ អន្តរជាតិមួយចំនួនបានផ្សាយថា តួលេខនេះ គឺជាបំប៉ោង ប៉ុន្តែតួលេខនេះមិនមែនជាការបំប៉ោងទេ ក្នុងករណីកាត់ទោសលោកកាំង ហ្គេចអ៊ាវ ហៅឌុច ក្នុងសំណុំរឿង០០១ ក្នុងរយៈពេលប៉ុន្មានឆ្នាំចុងក្រោយ ត្រូវបានរកឃើញអ្នករងគ្រោះប្រមាណ១២.០០០នាក់ ហើយជាក់ស្តែងយើងឃើញស្តូបនៅទីនេះស្រាប់ ដែលមានចាឈ្មោះទាំង១២.០០០នាក់ ប៉ុន្តែនៅពេលដែលយើង បន្តដំណើរក្តីសំណុំរឿង០០២ ករណីនួនជា អៀងសារី ខៀវសំផន និងថ្នាក់ដឹកនាំធំៗជាច្រើនទៀត បានបន្តរកឃើញឈ្មោះជនរងគ្រោះផ្សេងទៀតដែលអាចយកជាការបាន រហូតដល់១៨.០០០នាក់ សមស្របតាមតួលេខដែលរាជរដ្ឋាភិបាលស្នើឡើងកាលពីឆ្នាំ១៩៧៩ គឺជាការត្រឹមត្រូវ ដោយក្នុងនោះមានជនបរទេសជាច្រើនសាសន៍ត្រូវបានសម្លាប់ដែលភាគច្រើនជាជនជាតិវៀតណាម ។
សូមបញ្ជាក់ថា៖ លោកស្រីឧបនាយករដ្ឋមន្ត្រី ម៉ែន សំអន ប្រធានក្រុមការងារថ្នាក់ជាតិ ចុះជួយរាជធានីភ្នំពេញ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីក្រុងពាលី និងសូត្រមន្ត នៅសារមន្ទីរជាតិទួលស្លែង ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធ អ្នកមានគុណ និងជូនចំពោះយុទ្ធជនអង់អាចក្លាហាន ដែលពលីជីវិត ដោយសារការពារទឹក ដីមាតុភូមិ ព្រមទាំងឧទ្ទិសកុសលដល់វិញ្ញាណក្ខន្ធ ប្រជាជនខ្មែរស្លូតត្រង់ រាប់លាននាក់ដែលបានបាត់បង់ជីវិត យ៉ាងអយុត្តិធម៌ នៅក្នុងរបបប្រល័យពូជសាសន៍ ប៉ុល ពត នារសៀលថ្ងៃទី១៧ និងព្រឹកថ្ងៃទី១៨ ខែកញ្ញា ឆ្នាំ២០១៧៕