ភ្នំពេញ៖ ឯកអគ្គរដ្ឋទូតវៀតណាម បានស្នើដល់កម្ពុជា ធ្វើកិច្ចសហប្រតិបត្តិការឲ្យបានល្អប្រសើរ ជាមួយនឹងទូតថ្មីបន្តទៀត លើការងារជាច្រើនវិស័យ ជាមួយរាជរដ្ឋាភិបាលកម្ពុជាបច្ចុប្បន្ននេះ ហើយសង្ឃឹមថា កិច្ចសហប្រតិបត្តិការកម្ពុជានិងវៀតណាម នឹងស្ថិតស្ថិរជាអមតៈ ។
លោក ចាប សុធារិទ្ធ នាយកខុទ្ទកាល័យឧបនាយករដ្ឋមន្ត្រីម៉ែន សំអន បានបញ្ជាក់ឲ្យដឹង នៅរសៀលថ្ងៃទី១៨ កញ្ញា ឆ្នាំ២៩១៧ នេះថា៖ លោក THACH DU ឯកអគ្គរដ្ឋទូត នៃសាធារណរដ្ឋសង្គម និយមវៀត ណាម ប្រចាំព្រះរាជាណាចក្រកម្ពុជា ដែលបានចប់អាណត្តិ និងជម្រាបលា បានសម្លឹងមើលឃើញថា ប្រទេសកម្ពុជានាពេលបច្ចុប្បន្ននេះ មានការរីក ចម្រើនយ៉ាងឆាប់រហ័ស និងទំនាក់ទំនងកិច្ចសហ ប្រតិបត្តិការ លើគ្រប់វិស័យ រវាងប្រទេសទាំងពីរ កាន់តែរីកចម្រើនឡើងជាលំដាប់។
លោកនាយកខុទ្ទកាល័យ ក៏បានស្រង់សម្តីលោក THACH DU មកបញ្ជាក់បន្ថែមថា ប្រទេសកម្ពុជា បានកាត់បន្ថយភាពក្រីក្រ និងមានការអភិវឌ្ឍសេដ្ឋកិច្ចខ្ពស់។ ក្នុងឱកាសនោះ លោក THACH DU បានថ្លែងបញ្ជាក់អំពីជំហរបស់រដ្ឋាភិបាលវៀតណាម នៅតែជិតស្និទ្ធជាមួយនឹងកម្ពុជា និងបន្តគាំទ្រនូវគោលនយោបាយរបស់កម្ពុជា គ្រប់និន្នាការទាំងអស់។
លោកទូតវៀតណាម ក៏បានមានប្រសាសន៍ថា “ខ្ញុំសុំស្នើឲ្យមន្ត្រីកម្ពុជាទាំងអស់ ធ្វើកិច្ចសហប្រតិបត្តិការ ជាមួយនឹងទូតថ្មី ដែលនឹងមកជំនួសខ្ញុំ នាពេលខាងមុខនេះ ឲ្យដូចខ្ញុំ ដែលបានធ្វើការងារជាមួយរាជរដ្ឋាភិបាលកម្ពុជាបច្ចុប្បន្ននេះ ហើយសង្ឃឹមថា កិច្ចសហប្រតិបត្តិការកម្ពុជានិងវៀតណាម នឹងស្ថិតស្ថិរជាអមតៈ”។
លោកស្រីម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានមានប្រសាសន៍ថ្លែងអំណរគុណចំពោះរដ្ឋាភិបាលវៀតណាម ដែលតែងតែជួយដល់កម្ពុជា គ្រប់កាលៈទេសៈ ទាំងផ្នែកសេដ្ឋកិច្ច ទេសចរណ៍ ជាដើម ។ លោកស្រីឧបនាយករដ្ឋមន្ត្រី បានថ្លែងបន្តថា កម្ពុជា-វៀតណាម គឺជាប្រទេសមានភូមិផងរបងជាមួយគ្នា និយាយជារួមប្រទេសយើងទាំងពីរ មិនអាចខ្វះគ្នាបាននោះទេ និងនិយាយដោយឡែក គឺកិច្ចសហប្រតិបត្តិការ និងការរួមគ្នាដោះស្រាយនូវរាល់បញ្ហាប្រឈមនានា ដើម្បីឲ្យមានសុខសុវត្ថិភាព និងការអភិវឌ្ឍ៕
