ខេត្តបាត់ដំបង ៖ លោក គិម វណ្ណៈ វរមន្ត្រីថ្នាក់លេខ ៤ ត្រូវបានតែងតាំង ឲ្យកាន់មុខតំណែងជា អភិបាលនៃគណអភិបាល ស្រុកសង្កែ ខេត្តបាត់ដំបង កាលពីថ្ងៃទី១០ ខែសីហា ក្រោម អធិតបតីភាព ឯកឧត្តម ច័ន្ទ សុផល អភិបាលនៃគណអភិបាលខេត្តបាត់ដំបង។
ក្នុងរបាយការរបស់លោក ឡុង សុភឺន អភិបាលរងស្រុក បានគូសបញ្ជាក់លើ សភាព ការទូទៅ ក៏ដូចជាសភាពការសន្តិសុខសង្គម សភាពការគ្រោះធម្មជាតិ ការងារបង្កបង្កើនផល ការគ្រប់គ្រងរដ្ឋបាល ព្រមការអភិវឌ្ឍន៍ លើគ្រប់វិស័យក្នុងស្រុក ដោយសង្កត់ធ្ងន់ លើការ អនុវត្តគោនយោបាយ ភូមិ ឃុំ មាន សុវត្ថិភាពដែលមានលក្ខណៈសម្បត្តិ ៩ យ៉ាង។ ស្រុកសង្កែក្នុងរយៈពេលអន្តរកាលនេះមានសន្តិសុខសណ្តាប់ធ្នាប់ល្អបង្គួរ គ្រោះថ្នាក់ដោយ ក្មេងទំនើងចោរលួចឆក់ប្លន់មានការថយចុះ គួរកត់សំគាល់។ សមិទ្ធិផលទាំងនេះ អាស្រ័យ ដោយការខិតខំ របស់រដ្ឋបានគ្រប់ថ្នាក់ សមត្ថកិច្ចគ្រប់ផ្នែក និងដោយមានការចូលរួម ពី ប្រជាពលរដ្ឋគ្រប់មជ្ឈដ្ឋានដែរ។
ក្នុងប្រសាសន៍ឯកឧត្តម ច័ន្ទ សុផល បានបញ្ជាក់ថាការតែងតាំងមុខតំណែងលោក គិម វណ្ណៈ ជាអភិបាលស្រុងសង្កែនាពេលនេះ គឺជាការបំពេញនូវរចនាសម្ពន្ធ័ដឹកនាំ គ្រប់គ្រង និងការទទួលខុសត្រូវលើការងារគ្រប់វិស័យ នៅថ្នាក់ក្រោមជាតិ ហើយជាភារកិច្ចបន្ត ដឹកនាំ ពីលោក សួន សាវ៉េត អភិបាលស្រុកសង្កែ ដែលបានទទួលមរណៈភាព។ ខ្ញុំសូមកោតសរសើរ ចំពោះរដ្ឋបាលស្រុក មន្ត្រីរាជការគ្រប់សមត្ថកិច្ចពាក់ព័ន្ធ និងលោកមេឃុំទាំងអស់ ដែលបាន ខិតខំប្រឹងប្រែងបំពេញតួនាទីភារកិច្ច ក្នុងការដឹកនាំគ្រប់គ្រង ចាត់ចែង និងអនុវត្តការងារ លើ គ្រប់វិស័យដោយទទួលលទ្ធផលយ៉ាងល្អប្រសើរ។ ជាភារកិច្ចបន្ត លោកអភិបាលស្រុកទើប តែងតាំងថ្មី ត្រូវខិតខំបញ្ជេញឲ្យអស់ពីសមត្ថភាព ទេពកោសល្យ និងគំនិតច្នៃប្រឌិតខ្ពស់រស់ រវើក ត្រូវមានគណនេយ្យភាពចំពោះក្រុមប្រឹក្សារបស់ខ្លួន ក្នុងស្មារតីយកចិត្តទុកដាក់ដឹកនាំ និងទទួលខុសត្រូវខ្ពស់។
ក្នុងអាណត្តិទី៥នេះ រាជរដ្ឋាភិបាល បានប្រកាន់យកគោលការនៃការចាត់ចែងការងារ តាមបែបវិមជ្ឈការ និងវិសហមជ្ឈការ ដែលជាគោលការនៃការគ្រប់គ្រងរដ្ឋបាលដ៏មាន ប្រសិទ្ធភាពសំរាប់ប្រើប្រាស់ជាគោលដៅយូរអង្វែងក្នុងការអភិវឌ្ឍន៍ ប្រពន្ធរដ្ឋបាលសាធារណ ប្រកបដោយតម្លាភាព។ ឯកឧត្តមបានផ្តល់អនុសាសន៍ល្អៗជាច្រើន ក្នុងគោលដៅជម្រុញ ការដឹកនាំគ្រប់គ្រងចាត់ចែងការងារ ពហុវិស័យ ក្នុងរដ្ឋបាលស្រុកសង្កែឲ្យកាន់តែមានភាពល្អ ប្រសើរជាបន្តទៀត ៕
