បន្ទាយមានជ័យ ៖ ល្បែងស៊ីសងខុសច្បាប់បានចាប់ផ្តើមដុះដាលសារជាថ្មីនៅទឹកដីជាយដែនខ្មែរថៃ ក្រុងប៉ោយប៉ែត ក្រោយពីដំណើរការបោះឆ្នោតឃ៊ំសង្កាត់បានបញ្ចប់ផុតទៅ នាសព្វថ្ងៃនេះ បនល្បែងស៊ីសងខុសច្បាប់និងស្របច្បាប់បានកំពុង ប្រណាំងប្រជែងគ្នាគ្រប់ច្រកល្ហកក្នុងមូលដ្ឋាន ហើយទន្ទឹមនិងនេះ មជ្ឈដ្ឋាននាបាននាលើកឡើងថាគោលនយោបាយ ភូមិឃុំមានសុវត្ថភាពរបស់ រាជរដ្ឋាភិបាលបានបរាជ័យទាំងស្រុង ដោយសារតែភាគពាក់ពន្ធ័សមត្ថកិច្ចតួរអង្គបង្ក្រាបបានចូលដៃចូលជើងជាមួយក្រុមឈ្មួញល្បែងទាំងនោះ ទៀតតផង ។
សេចក្តីរាយការណ៏បានបង្ហើបមកថា សមត្ថកិច្ចខ្លះមានហ៊ុនខ្យល់ និងខ្លះទៀតបើកល្បែងស៊ីសងដោយខ្លួនឯងតែម្តង ។ ទន្ទឹមនិងនេះមាន ប្រភពព័ត៌មានបានឲ្យដឹងថា បនល្បែងស៊ីសង អនឡាញជាច្រើនកន្លែងនៅក្រុងប៉ោយប៉ែតកំពុងតែបើកលេងយ៉ាង គគ្រឹកគគ្រេងហើយសមត្ថកិច្ចមូលដ្ឋានគ្មានវិធានការ បង្ក្រាបឡើយហើយថ្មីៗនេះ ក៏មានលេចឮរឿងអាស្រូវថា មានថៅកែអនឡាញ ស្ទើភ្លើងខ្លះមិនបើកប្រាក់ខែអោយបុគ្គលិករបស់ខ្លួនទៀតផង។
ករណីនេះប្រភពបានបញ្ជាក់ថា: ថៅកែអនឡាញដែលមានរឿងអាស្រូវនោះ ត្រូវគេស្គាល់ឈ្មោះថា ឈ្មោះ ប៊ុនឡុង ជាអតីត ជាបុគ្គលិក ស្លុតវីគី កាស៊ីណូ ហ្គ្រែនដាយមិនស៊ីធី បានមកជួលបន្ទប់ជាន់ទី៤នៃ កាស៊ីណូហូលីដេ ផាលេសផ្លាស ដែលស្ថិតនៅក្នុងភូមិ ក្បាលស្ពាន១ សង្កាត់ប៉ោយប៉ែតនិង ក្រុងប៉ោយប៉ែត(ក្នុង១បន្ទប់តំលៃ៣ម៉ឺនបាតក្នុង១ខែ)ហើយបុគ្គលិក ចំនួន៥នាក់នោះក្នុងម្នាក់ៗ ប្រាក់ខែទទួលបានចំនួន១១០០០បាតក្នុង១ខែ។
ប្រភពបានឲ្យដឹងទៀតថា ក្រៅពីនោះក៏មានទីតាំងបនល្បែងអនឡាញជាច្រើនទៀតដោយខ្លះបានជួលសណ្ឋាគាបើកហើយខ្លះទៀតជួលផ្ទះអ្នកមានឋានធំ បើកបនល្បែង ជាក់ស្តែង សព្វថ្ងៃនេះ សណ្ឋាគាដែលជួលឲ្យជនជាតិចិនបើកបនល្បែងអនឡាញខុសច្បាប់នោះ ត្រូវបានគេស្គាល់ថា សណ្ឋាគារ យីហោ ហូលី ណា ដែលមានទីតាំងនៅភូមិគីឡូម៉ែត្រលេខ៤សង្កាត់ផ្សារកណ្តាល ក្រុងប៉ោយប៉ែត។ដែលជារបស់លោក ឧកញ្ញា សានស៊ានហូ បច្ចុប្បន្នជាអភិបាលស្រុកអូរជ្រៅ និងកំពុងតែល្បីថាជិតក្លាយជាអភិបាលក្រុងប៉ោយប៉ែតក្នុងពេលឆាប់ៗនេះទៀតផង។ ចំណែកមួយកន្លែងទៀតគឺភូមិគ្រឹះរបស់លោកវរសេនីយ៏ឯក ម៉ែនភិរម្យមេបញ្ជាការរង បញ្ជាការដ្ឋាន កងរាជអាវុធហត្ថខេត្ត បន្ទាយមានជ័យ ដែលមានទីតាំងនៅភូមិគីឡូម៉ែត្រលេខ៤សង្កាត់ផ្សារកណ្តាលក្រុងប៉ោយប៉ែត ប្រភពលួចបង្ហើបមក ថា ភូមិគ្រឹះខាងលើបានជួលអោយជនជាតិចិនស្នាក់នៅនិង បើកល្បែងអនឡាញខុសច្បាប់ផងដែរ។ ពោលគឺជួលក្នុង១ខែមានតំលៃ៧០០០ដុល្លា ហើយពេលខ្លះ គេឃើញមានកម្លាំងកងរាជអាវុធហត្ថដែលជាកម្លាំងជាតិ ជួយដឹកជញ្ជូនភ្ញៀវឲ្យជនជាតិចិននោះទៀតផង។
ប្រភព បានបង្ហើបអោយដឹងទៀតថា មិនមែនមានតែមេបញ្ជាការរង ខេត្តបន្ទាយមានជ័យតែម្នាក់នេះទេដែលពាក់ព័ន្ធនិងបនល្បែងអនឡាញនេះ គឺនៅមានច្រើនទៀត ។ ពលរដ្ឋថាសូម្បីតែ លោក វណ្ណ លីហោ ដែលជាមេបញ្ជាការរងប៉េអឹម ខេត្តបន្ទាយមានជ័យដែលគេដឹងថាជាក្មួយថ្លៃ របស់ ឯកឧត្តមសេងទៀងនោះ សព្វថ្ងៃក៏កំពុងធ្វើព្យុះភ្លៀង កាងសង្វៀនជល់មាន់នៅប្លុកកាស៊ីណូហ្គោលឌិនក្រោន របស់ប្អូនប្រុសលោក កុក អាន គឺ កុក មីន ។
ដោយឡែក លោកវរសេនីយ៏ ទោ ប៊ុនណាំអៀង ហៅ បារាំង ដែលទើបតែឡើងឋានះ ជាមេបញ្ជាការរងទទួលបន្ទុក ផ្នែកភស្តភានិង ហិរញ្ញវត្ថុ នោះ ក៏មានពាក់ព័ន្ធនិងការបើកបនល្បែង អនឡាញ ខុសច្បាប់ យីហោ HBO ផ្ញើខ្លួននៅក្នុងអគារ ដ៏ខ្ពស់នៅម្តុំផ្សារដើម ពុទ្រា អគារនេះត្រូវបានគេស្គាល់ថា ជារបស់លោក បោនប៊ិនមេបញ្ជាការប៉េអ៊ឹម ខេត្តបន្ទាយមានជ័យតែម្តង។ហើយនៅលើអគារនោះដែរ ក៏មានអនឡាញរបស់លោកនីណារ៉ូ ហៅណូ មេបញ្ជាការរងមូលដ្ឋានកងរាជអាវុធហត្ថ ក្រុងប៉ោយប៉ែត ទទួលបន្ទុកសន្តិសុខ ផងដែរ។
ក្រៅពីនេះ នៅមានកន្លែង អនឡាញរាយរង២កន្លែងទៀត លួចបើកនៅក្នុងភូមិក្បាលស្ពាន១និងក្បាលស្ពាន២ដែលជាប់សាច់ញាតិ និងមានភាគហ៊ុនជាមួយមន្ត្រីកងរាជអាវុធហត្ថផងដែរ។ដែលបញ្ហាទាំងនេះធ្វើឲ្យប្រជាពលរដ្ឋក្នុងមូលដ្ឋានកើតក្តី ព្រួយបារម្ភ ពីអសន្តិសុខនិងសុវត្ថភាព ព្រោះទីក្រុងប៉ោយប៉ែតទាំងមូល ពោពេញសំបូរទៅដោយល្បែងស៊ីសង ខុសច្បាប់រីកពាស់ពេញគ្រប់ទីកន្លែង ។ ពាក់ពន្ធ័និងបនល្បែងនេះ កន្លងមកពួកគាត់ក៏ធ្លាប់ បានរាយការណ៍ជូនសមត្ថកិច្ចទាំងនគរបាលនិងកងរាជអាវុធហត្ថក្រុងផងដែរតែគ្មានអ្នកបង្ក្រាប ព្រោះខ្លាចប៉ះពាល់ដល់កិតិយសក្តិលោកធំ ដែលធើ្វជាខ្នងបង្អែកឲ្យ បើកលេងយ៉ាងរំភើយដដែល។ចំណែកមជ្ឈដ្ឋាននានាបានលើកឡើងថា មូលហេតុដែលគោលនយោបាយភូមិឃុំមានសុវត្ថភាពរបស់រាជរដ្ឋាភិបាលបរាជ័យ នោះ ក៏ព្រោះតែភាគច្រើនបនល្បែងស៊ីសងទសំងនោះ ជាប់ពាក់ព័ន្ធជាមួយសមត្ថកិច្ចមាន ភាគហ៊ុននិងបើកខ្លួនឯងតែម្តង។
តែទោះជាយ៉ាងនេះក្តី កន្លងទៅថ្មីៗនេះ គេនៅចាំបានថា ឯកឧត្តមសៅ សុខា អគ្គមេបញ្ជា ការរងកងយោពលខេមរភូមិន្ទ និងជាមេបញ្ជាការកងរាជអាវុធហត្ថ លើផ្ទៃប្រទេស ពោលគឺ ឯកឧត្តម តែងតែបានក្រើនរំលឹក ដល់មន្ត្រី កងរាជអាវុធហត្ថទាំងអស់ ត្រូវតែនៅអោយឆ្ងាយ កុំពាក់ព័ន្ធនិងបទល្មើសផ្សេងៗ ពិសេសល្បែងស៊ីសង ចោរឆក់ប្លន់ជាដើម ករណីនេះគេសង្ឃឹមថា ឯកឧត្តមសៅ សុខា មុខជា ចេញមុខឈឺឆ្អាល លើបញ្ហាអសកម្មនេះជាក់ជាមិនខាន ដើម្បីក៊ំឲ្យមន្ត្រីការពារជាតិក្លាយជាជន កាងបនល្បែង និងប្រព្រឹតល្មើសនិងផ្លូវច្បាប់ ៕
