ក្រចេះ ៖ មេការឈ្មួញឈើ ឧកញ្ញ៉ា សឹង សំអុល ហៅក្រុមអ្នកកាសែត ក្នុងខេត្តក្រចេះប្រមាណ១០០នាក់ ដើម្បីជួបជុំគ្នាចុះអវត្តមាន នៅទាម កាហ្វេក្រោមម្លប់ក្រខប់ ជាប់របងមន្ទីរគណបក្សស្រុកស្នួល ខេត្តក្រចេះ ដើម្បី បើក លុយសម្រាប់បុណ្យភ្ជុំបិណ្ឌម្នាក់២០ម៉ឺនរៀល។តែកាចែកលុយគ្នានេះបង្កឲ្យមានការ ទាស់ពាក្យសម្តីគ្នា រវាង ផ្អើល ដល់ចៅហ្វាយស្រុក ស្នួលបញ្ជាឲ្យកំលាំង ចុះមកពិនិត្យកាលពីថ្ងៃទី១១កញ្ញា។
តាមប្រភពពីអ្នកសារពតិមានបានឲ្យដឹងថា បុរសដើរចែកលុយនោះមានឈ្មោះ ខុន ដែលជាអ្នករត់ការបើកផ្លូវឱ្យរថយន្តយីឌុប និង V1 ដឹកឈើឱ្យលោកឧកញ៉ា សឹង្ហ សំអុល ចេញពីស្រុកពេជ្រាដា និងស្រុកកោះញែក ខេត្តមណ្ដលគិរី ឈរក្រោមស្លាកក្រុមហ៊ុនម៉ាស្ទ័រខេសាន់ ។
ករណីនេះលោក គង់ គឹមនី អភិបាលស្រុកស្នួលដែលទទួលរងការិះគន់ថាឃុបឃឹតជាមួយឈ្មួញឈើក្នុងនាមអាជ្ញាធរមូលដ្ឋាន បានឲ្យកាសែតមួយដឹង ថានេះ ករណីខាងលើនេះ មានប្រជាពលរដ្ឋទូរស័ព្ទការរាយទៅលោកជាច្រើនថាមានមនុស្សមួយក្រុមបង្កភាពរញ៉េរញ៉ៃជជែកឈ្លោះទាស់ទែងគ្នាបង្កឱ្យប៉ះពាល់ដល់សណ្តាប់ធ្នាប់ទើបលោកបញ្ជាទៅកម្លាំងសមត្ថកិច្ចស្រុកទាំងអាវុធហត្ថ នគរបាល និងយោធាចុះទៅមើលកន្លែងនោះ។
ពេលដែលកម្លាំងទៅដល់សួរនាំក៏ទទួលបានព័ត៌មានថា មានមេការឧកញ្ញ៉ារកស៊ីឈើហៅអ្នកកាសែតចែកលុយ ប៉ុន្តែលោកមិនបានដឹង និងឃើញគេចែកលុយអីទេ តែសកម្មភាពក្រុមអ្នកកាសែតទាំងនោះ(មិនដឹងខាងអង្គភាពណាខ្លះទេ) កំពុងឈ្លោះគ្នាបង្កភាពរញ៉េរញ៉ៃរបៀបសត្វសុន ខបានសាច់ដណ្តើមគ្នាស៊ីអញ្ចឹង។
លោកចៅហ្វាយស្រុកស្នួលបញ្ជាក់ថា ចំពោះភាពញរញ៉េរញ៉ៃគ្មានសណ្តាប់ធ្នាប់ មិនគោរច្បាប់របស់ក្រុមអ្នកកាសែតទាំងនេះ លោកនឹងមានវិធានការរដ្ឋបាលឱ្យកម្លាំងស្រាវជ្រាវរកមើលអ្នកណាខ្លះជាអ្នកកាសែតពិតប្រាកដ អ្នកខ្លះជាចោរ និងអ្នកណាខ្លាំងទិញកាតកាសែតមកពាក់ ដែលនាំឱ្យប៉ះពាល់ដល់កេរ្តិ៍ឈ្មោះអ្នកកាសែតមានវិជ្ជាជីវៈត្រឹមត្រូវ។តែសម្រាប់ឈ្មួញលោកចៅហ្វាយស្រុកមិនបាននិយាយថានឹងធ្វើការស្រាវជ្រាវនោះទេបើទោះបីជាលោកអះអាងថា ក្នុងនាមអាជ្ញាធរគណបញ្ជាការឯកភាពស្រុកមានភារកិច្ច ថែរក្សាសុខសុវត្ថិភាពជួនប្រជាពលរដ្ឋ ទប់ស្កាត់ភាពអាណាធិបតេយ្យ រៀបចំសណ្តាប់ធ្នាប់ឱ្យបានល្អប្រសើរតែម្តង។
ចំណែកលោក ស ចំរ៉ុង អភិបាលខេត្តក្រចេះ បានឱ្យដឹង នៅរសៀល ថ្ងៃទី១២ ខែកញ្ញា ឆ្នាំ២០១៧ នេះថា «កាលពីម្សិលមិញពិតជាមានមេការរបស់ឧកញ្ញ៉ា សឹង្ហ សំអុល ចែកលុយឱ្យក្រុមអ្នកកាសែងប្រាកដមែននៅស្រុកឈ្នួល»។
លោកបន្តថា បើតាមការប៉ាន់ស្មានស្ថិតិស្ថាប័នសារព័ត៌មាន នៅខេត្តក្រចេះមានជាង ៨០អង្គភាព អ្នកកាសែតជាង ១០០ឯណោះ។
សូមរំលឹកថា សកម្មភាពរថយន្តយីឌុបដឹកជញ្ជូនពីខេត្តរតនគិរី មណ្ឌលគិរី ឆ្លងកាត់ទឹកដីស្រុកស្នូល ខេត្តក្រចេះ និងស្រុកមេមុត ខេត្តត្បូងឃ្មុំ ចេញទៅវៀតណាម តាមច្រកព្រំដែន ក្រចេះ និងច្រកព្រំដែនក្នុងស្រុកមេមត់ ខេត្តត្បូងឃ្មុំដែលបង្កឡើងដោយឈ្មួញគ្រាក់ឈ្មោះសឹងសំអុល គ្មានមន្ត្រីជំនាញ និង សមត្ថកិច្ចពាក់ព័ន្ធមិនហ៊ានបង្ក្រាបឡើយ ដែលគេជឿថាអាចនឹងមានការចែកលូយដូចឲ្យអ្នកកាសែតដែរ ៕