ឯកឧត្ដម ជាម ប៉េអា អគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃ និងជាប្រធានសម្របសម្រួលគម្រោង LASED ថ្នាក់ជាតិ មានប្រសាសន៍ថា គម្រោង LASED II (២០១៦-២០២១)នេះ នឹងប្រើប្រាស់ឥណទានធនាគារពិភពលោក 25.06 លានដុល្លារ និងថវិកាបដិភាគរបស់រាជរដ្ឋាភិបាល 1.8 លានដុល្លារ ។
ឯកឧត្តម មានប្រសាសន៍យ៉ាងដូច្នេះ នៅក្នុងកិច្ចប្រជុំបច្ចេកទេសលើកទី១ របស់គម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ចជំហ៊ានទី២ (LASED II) នៅសាលមហោស្រពខេត្តក្រចេះ ដោយមានវត្តមានចូលរួមពីឯកឧត្តម ខណ្ឌ ចំណាន អភិបាលរងខេត្តក្រចេះ និងសិក្ខាកាមមកពីខេត្តចំនួន៥ ក្នុងនោះមាន ត្បូងឃ្មុំ កំពង់ស្ពឺ កំពង់ធំ កំពង់ និងខេត្តក្រចេះ សរុបប្រមាណជាងជាង ២០០នាក់ កាលពីព្រឹកថ្ងៃទី១២ ខែកញ្ញា ឆ្នាំ២០១៧ ។
ឯកឧត្តម ជាម ប៉េអា មានប្រសាសន៍បញ្ជាក់ថា ការប្រើប្រាស់ឥណទានធនាគារពិភពលោក 25.06 លានដុល្លារ និងថវិកាបដិភាគរបស់រាជរដ្ឋាភិបាល 1.8 លានដុល្លារ គឺដើម្បីធ្វើការចែកដី ១៧០៤២ហត ដល់ ៥១៤១គ្រួសារ នៅ១៤ទីតាំងក្នុងខេត្តក្រចេះ ត្បូងឃ្មុំ កំពង់ស្ពឺ កំពង់ធំ និងកំពង់ឆ្នាំង និងបំពាក់ហេដ្ឋារចនាសម្ព័ន្ធសំខាន់ៗជាច្រើន ដូចជា ផ្លូវជនបទ អណ្តូងទឹក អគារសហគមន៍ ប៉ុស្តិសុខភាព អគារសិក្សា ផ្ទះគ្រូបង្រៀន។ល។ ព្រមទាំងសកម្មភាពដទៃទៀត សំដៅទ្រទ្រង់ជីវភាពរស់នៅរបស់ពួកគាត់ ។
មានប្រសាសន៍បើកកិច្ចប្រជុំនាព្រឹកនោះ ឯកឧត្តម ខ័ណ្ឌ ចំណាន លើកឡើងថា ខេត្តក្រចេះ គឺជាខេត្តមួយក្នុងចំណោមខេត្តបី ដែលបានអនុវត្តន៍គម្រោងដំណាក់កាលសាកល្បង ឬ LASED I ចាប់តាំងពីឆ្នាំ២០០៨មក ដែលមានគោលដៅចំនួន៥ឃុំ ដោយនៅស្រុកចិត្របុរី មាន៤ឃុំ និងនៅស្រុកព្រែកប្រសព្វ មានមួយឃុំ និងបានបញ្ចប់រួចរាល់ជាស្ថាពរនៅឆ្នាំ ២០១៣ ។
ឯកឧត្តម មានប្រសាសន៍បញ្ជាក់ថា គម្រោង LASED II គឺផ្ដោតសំខាន់ទៅលើការបង្កើតជីវភាពរស់នៅ និងភាពជាម្ចាស់របស់អ្នកទទួលផលផ្ទាល់ ៕
