បាត់ដំបង ៖ កិច្ចប្រជុំពិភាក្សារវាងគណប្រតិភូ គណកម្មាសិទ្ធិមនុស្ស ទទួលពាក្យបណ្តឹង និងអង្កេត គណកម្មការទី១ នៃព្រឹទ្ធសភាដឹកនាំដោយឯកឧត្តម គង់ គាំ ប្រធានគណកម្មាជាមួយរដ្ឋបាលខេត្តបាត់ដំបង អំពីបញ្ហាការដោះស្រាយពាក្យបណ្តឹង ប្រជាពលរដ្ឋក្នុងខេត្តបានប្រព្រឹទ្ធទៅកាលពី ពេលកន្លងទៅនេះ នៅសាលាខេត្តបាត់ដំបង។
ឯកឧត្តម ច័ន្ទ សុផល អភិបាលនៃគណអភិបាលខេត្តបាត់ដំបង បានគូសបញ្ជាក់ពីសភាពការ រួម ក៏ដូចជាស្ថានភាពការងារមួយចំនួនជុំវិញសកម្មភាព នៃការដឹកនាំការអភិវឌ្ឍន៍លើគ្រប់វិស័យ បាន និងកំពង់រីកចំរើន ប្រកបដោយនិរន្តរភាព បរិស្ថានសោភ័ណភាព បៃតងស្រស់បំព្រង ទាក់ទាញភ្ញៀវ ទេសចរចូលមកទស្សនា មានការកើនឡើងជារៀងរាល់ឆ្នាំ ហើយរដ្ឋបាលខេត្តបានសុំចុះបញ្ជី ផ្នែកខ្លះ នៃក្រុងបាត់ដំបង ជាបេក្ខភាពទីក្រុងបិតិកភ័ណ្ឌ របស់អង្គការយូណេស្កូ ទៀតផង។
ចំពោះពាក្យបណ្តឹងប្រជាពលរដ្ឋ ទទួលបាន ៨២ ករណី ក្នុងនោះពាក្យបណ្តឹង ស្ថិតក្នុងសមត្ថ កិច្ច ៤៤ករណី ពាក្យបណ្តឹងស្ថិតនៅក្នុងយន្តការគណកម្មាធិការ សុរិយោដីខេត្ត ៣២ ករណីពាក្យបណ្តឹងស្ថិតនៅក្នុងសមត្ថកិច្ចតុលាការ ៦ ករណី។ ទំនាស់ដីធ្លីទាំងនោះកើតមាននៅតាមបណ្តាស្រុក មួយចំនួនមានស្រុក បវេល ថ្មគោល សំពៅលូន ភ្នំព្រឹក សំឡូត រតនៈមណ្ឌល និងស្រុក គាស់ក្រឡ។ បណ្តឹងទាំងអស់នេះ សុទ្ធជាទំនាស់ស្រួចស្រាវ ត្រូវបានគណកម្មការ សុរិយោដីខេត្ត ស្ថាប័ណ្ណពាក់ព័ន្ធ បាននិងកំពង់យកចិត្តទុកដាក់ ធ្វើការដោះស្រាយជាបន្តបន្ទាប់។ ចំណែការចុះអនុវត្តការដោះស្រាយ ទំនាស់អាជ្ញាធរខេត្ត បានរៀបចំក្រុមការងារ ៨ ក្រុម បានចុះដោះស្រាយភូមិក្រពើសែសិប និងចំណុច ទាំងប្រាំ ស្រុកបវេល ឃុំឆ្នាល់មាន់ ព្រះផុសស្រុកគាស់ក្រឡ ឃុំតាតោក ស្រុកសំឡូត ឃុំអន្លុងអុ តាមឺុន ស្រុកថ្មគោល និងក្រុងបា់តដំបង។ ចំពោះការដោះស្រាយទំនាស់ បាននិងកំពង់ដំណើរការ ដោយកន្លែងខ្លះបានសម្របសម្រួល ជិតបញ្ចប់ទំនាស់ និងកន្លែងខ្លះទៀតកំពង់ដំណើរការ ស្រាវជ្រាវ ប្រមូលពត័មានឯកសារនៃករណីទំនាស់ហើយក៏នៅមានបញ្ហាប្រឈមមួយចំនួនដែលម្ចាស់បណ្តឹង មិនទាន់សុខចិត្ត ព្រមទទួលយកលទ្ធផល ឬការសម្របសម្រួលដោះស្រាយជូននៅឡើយ។
ឯកឧត្តម គង់ គាំ បានកោតសរសើរដល់ការខិតខំ របស់រដ្ឋបាលខេត្ត ក្នុងកិច្ចការពារកសាង អភិវឌ្ឍន៍ ក្នុងខេត្តមានការរីកចំរើនគ្រប់វិស័យ រហូតធ្វើឲ្យក្រុងបាត់ដំបងទទួលបានពានរង្វាន់ស្តីពី និរន្តភាព នៃទីក្រុងអាស៊ាន និងទទួលបានរង្វាន់ជ័យលាភី ចំណាត់ថ្នាក់លេខ ១ផ្ការំដួល ៣ទង ក្នុង ចលនាប្រឡងប្រណាំងទីក្រុងស្អាតទូទាំងប្រទេស។ ឯកឧត្តមក៏បានសំដែងការអបអរផងដែរ ចំពោះ ដំណោះស្រាយជូនដល់ប្រជាពលរដ្ឋ បានជាបន្តបន្ទាប់។ ចំពោះបញ្ហានៅសេសសល់ សូមរដ្ឋបាល ឲ្យអស់លទ្ធភាព ជាបន្តទៀតជូនដល់ប្រជាពលរដ្ឋយើង៕