ក្រចេះ៖ រថយន្តស៊ាំយ៉ុងដឹកក្ដាសន្លឹកមួយគ្រឿង បើកបរក្នុងល្បឿនយ៉ាងលឿនបែកកង់ក្រឡាប់ផ្ងារជើងឡើងលើ បណ្តាលឲ្យប្តីប្រពន្ធពីរនាក់ស្លាប់ភ្លាមៗនឹងកន្លែង និងម្នាក់ទៀតរងរបួសស្រាល ។
ហេតុការណ៍នេះកើតឡើងនៅថ្ងៃទី ០៨ ខែកញ្ញា ឆ្នាំ២០១៧ វេលាម៉ោង ១៤នឹង៣០នាទី នៅត្រង់ចំនុចភូមិស្រែត្រែង ឃុំក្បាល់ដំរី ស្រុកសំបូរ ខេត្តចេះ។
ជនរងគ្រោះមានឈ្មោះ តឿ ខា អាយុ ៣២ឆ្នាំ ត្រូវជាប្តីចំណែកឯប្រពន្ធឈ្មោះ ទិច ចិន្ថា អាយុ ២៧ឆ្នាំ រស់នៅភូមិកោគវៀន ឃុំកណ្តុរជ្រុំ ស្រុកពញ្ញាក្រែក ខេត្តត្បូងឃ្មុំ និងម្នាក់ទៀតរងរបួលស្រាល ភេទប្រុស នៅមិនទាន់ដឹងពីអត្តសញ្ញាណនៅឡើយទេ ។ រីឯរថយន្តសាំយ៉ុង ពណ៌ស ពាក់ស្លាកលេខ2G-0510ភ្នំពេញ ធ្វើដំណើរក្នុងទិសដៅពីជើងទៅត្បូង ពីខេត្តស្ទឹងត្រែង ឆ្ពោះទៅខេត្តត្បូងឃ្មុំ បើកបរដោយបុរសខាងលើ មានគ្នាបីនាក់ ស្រាប់មកដល់ចំនុចកើតហេតុខាងលើ រថយន្តក៏បានបែកកង់ក្រោយខាងឆ្វេង បណ្ដាលឲ្យក្រឡាប់ធ្លាក់ពីលើផ្លូវជាតិ បង្កឲ្យអ្នកបើកបរ និងអ្នករួមដំណើរម្នាក់ស្លាប់ និងរងរបួសស្រាលម្នាក់ ។
ទន្ទឹមនឹងគ្រោះថ្នាក់ចរាចរណ៍នេះបានកើតឡើង ប្រជាពលរដ្ឋជាច្រើននាក់ បាននាំគ្នាលើកឡើងជាមតិថា រថយន្តប្រភេទស៊ាំយ៉ុងដឹកឈើអារ ប្រភេទក្តា សសរ និងគ្រឿងផ្ទះជាច្រើន សព្វថ្ងៃកំពុងធ្វើចរាណ៍យ៉ាងអនាធិបតេយ្យ និងបើកបរក្នុងល្បឿនលឿន មិនគោរពច្បាប់ចរាចណ៍ ហើយតែងតែបង្កហានីភ័យ និងគ្រោះថ្នាក់ចរាចណ៍ និងបាត់បង់ជីវិតជាញឹកញ៉ាប់ចំពោះអ្នកធ្វើដំណើរថ្មើជើង ជិៈកង់ ម៉ូតូ និងរថយន្តកាលពីពេលកន្លងទៅនេះ ។
បច្ចុប្បន្នសាកសព ត្រូវបានសមត្ថកិច្ច ចុះធ្វើកំណត់ហេតុ ដើម្បីប្រគល់ជូនក្រុមគ្រួសារសពយកទៅធ្វើបុណ្យតាមប្រពៃណី ចំណែកឯរថយន្តវិញ ត្រូវបានសមត្ថកិច្ចស្ទួចយកទៅរក្សាទុកនៅប៉ុស្ដិ៍នគរបាលរដ្ឋបាលឃុំក្បាលដំរី ៕
