ក្រចេះ៖ សហគមន៍កសិកម្មចំនួន១១ ក្នុងចំណោមសហគមន៍កសិកម្មសរុបចំនួន៤១សហគមន៍ ទទួលបានគ្រឿងយន្តកសិកម្មពីក្រសួងតាមរយៈមន្ទីរកសិកម្ម រុក្ខាប្រមាញ និងនេសាទខេត្ត ក្រោមអធិបតីភាពលោកជំទាវ ហោ ម៉ាលីន អនុរដ្ឋលេខាធិកាក្រសួងកសិកម្ម រុក្ខាប្រមាញ់ និងនេសាទ ។
លោក គុយ ហ៊ួត ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា ការផ្ដល់ជូនឧបករណ៍គ្រឿងយន្តកសិកម្មជូនសហគមន៍កសិកម្មនាពេលនោះ គឺធ្វើឡើងក្រោយពីបានធ្វើការពិភាក្សាគ្នារវាងការិយាល័យអភិវឌ្ឍន៍សហគមន៍កសិកម្ម ជាមួយថ្នាក់ដឹកនាំនៃមន្ទីរកសិកម្ម និងបានជ្រើសរើសសហគមន៍កសិកម្មដែលមានសកម្មភាពល្អជាងគេ សម្រាប់ផ្ដល់ជូនគោយន្តកន្ត្រៃ ។
លោក បានបន្តថា សហគមន៍កសិកម្មទាំង១១ រួមមាន ក្រុងក្រចេះមាន១សហគមន៍ ស្រុកចិត្របុរី មាន២សហគមន៍ ស្រុកសំបូរ មាន៤ និងស្រុកស្នួលមានចំនួន ៤សហគមន៍កសិកម្ម ។
ចំពោះគោយន្តដែលបានផ្ដល់ជូនដល់សហគមន៍កសិកម្មទាំង១១នោះ មន្ទីរកសិកម្មបានរៀបចំលក្ខន្តិកៈ ដើម្បីគ្រប់គ្រងប្រើប្រាស់ឲ្យបានល្អ និងមាននិរន្តភាព ជាពិសេសគោយន្តដែលបានផ្ដល់ គឺជាទ្រព្យសម្បត្តិ៍របស់សហគមន៍ ប្រើប្រាស់ជាផលប្រយោជន៍របស់សមូហភាព ហើយត្រូវគ្រប់គ្រង ថែរក្សាឲ្យបានល្អ ។ ហើយមន្ទីរនឹងមានសិទ្ធិក្នុងការដកហូតគោយន្តមកវិញ បើសិនណាមានការប្តឹងផ្ដល់គ្នា ឬ មិនបានប្រើប្រាស់ជាប្រយជន៍សម្រាប់សហគមន៍កសិកម្ម ឬប្រើប្រាស់ខុសលក្ខ័ណ្ឌរបស់សហគមន៍ ។
មានប្រសាសន៍សំណោះសំណាលជាមួយបងប្អូនសហគមន៍កសិកម្មឆ្នើមទាំង១១ សហគមន៍ លោក ជំទាវ ហោ ម៉ាលីន អនុរដ្ឋលេខាធិការ បានជម្រុញឲ្យបងប្អូនសហគន៍កសិកម្មទាំងងស់ត្រូវខិតខំបង្កបង្កើនផលកសិកម្មរបស់ខ្លួនឲ្យអស់លទ្ធភាព តាមដែលអាចធ្វើបាន ដើម្បីរក្សាឲ្យបាននូវភាពខ្លាំងរបស់សហគមន៍នីមួយៗ ចំណែកឯសហគមន៍ដទៃទៀតដែលមិនទាន់ទទួលបានគ្រឿងយន្តកសិកម្មកុំអាលអន់ចិត្ត ត្រូវខិតខំបង្កើនស្នាដៃកសិកម្មរបស់ខ្លួនឲ្យខ្លាំងក្លាឡើង ។ ហើយការផ្ដល់ជូនគ្រឿងយន្តកសិកម្មនេះ និងបន្តផ្ដល់ជូនជាបន្តដល់សហគមន៍ឆ្នើមដទៃទៀត ដែលមានសកម្មភាពល្អ ៕
