ភ្នំពេញ ៖ មន្ត្រីមន្ទីរធម្មការ និងសាសនារាជធានីភ្នំពេញ បានលើកឡើងថា៖ រដូវកាន់បិណ្ឌមកដល់ប្រជាពលរដ្ឋ នៅរាជធានី បានអញ្ជើញទៅវត្តអារាមធ្វើបុណ្យទានដាក់បិណ្ឌ រាប់បាត្រ ក្នុងរដូវបុណ្យភ្ជុំនេះ ដើម្បីពង្រឹងវិស័យព្រះពុទ្ធសាសនាផងនិងដើម្បីឧទ្ទិសកុសលផលបុណ្យជូនដល់ ជីដូនជីតាដែលបានចែកឋានផង ឲ្យពួកគេបានមកទទួលផលបុណ្យពីបងប្អូនកូនចៅ និងបានរួចផុតពីបាបកម្មទាំងឡាយ ។
លោក ផន ដាវី ប្រធានមន្ទីរធម្មការ និងសាសនារាជធានីភ្នំពេញបានភ្នំពេញរីផ័តធ័រឲ្យដឹងនីថ្ងៃទី ០៧ កញ្ញានេះ ថា ពីធីបុណ្យកាន់បិណ្យ ឬបុណ្យភ្ជុំបិណ្ឌ គឺជាបុណ្យមួយធំជាងគេ ក្នុងចំណោមបុណ្យទាំងឡាយ នៃប្រពៃណីវប្បធម៌ទំនៀមទម្លាប់អ្នកកាន់ព្រះពុទ្ធសាសនា របស់បងប្អូនប្រជាជនខ្មែរ ។
បុណ្យនេះ មានរយៈពេល១៤ ថ្ងៃ ចាប់ពីថ្ងៃទី ១រោច រហូតដល់ថ្ងៃទី១៥រោច ខែភទ្របទ ហើយសម្រាប់ឆ្នាំនេះ ពិធីបុណ្យចាប់ផ្តើមពីថ្ងៃទី០៦ ដល់ថ្ងទី២១ ខែកញ្ញា ឆ្នាំ២០១៧ គឺដល់ថ្ងៃបុណ្យភ្ជុំធំតែម្តង ។
លោក ប្រធាមមន្ទីរបន្តថា ការអំពាវនាវដល់ប្រជាពលរដ្ឋ អញ្ជើញទៅវត្តអារាមធ្វើបុណ្យទានដាក់បិណ្ឌរាប់បាត្រនៅក្នុងរដូវកាន់បិណ្ឌឲ្យបានគ្រប់ៗគ្នានេះ ក្នងុគោលបំណង ដើម្បី ពង្រឹងវិស័យព្រះពុទ្ធសាសនាឲ្យកាន់តែមានភាពជឿជាក់ ពីពុទ្ធសាសននិកផងនិងដើម្បីឧទ្ទិសកុសលផលបុណ្យ ជូនដល់ ជីដូនជីតាដែលបានចែកឋានផង ឲ្យអ្នកទាំងនោះមកទទួលផលបុណ្យពីបងប្អូនកូនចៅនិងឲ្យបានរួចចាកផុតពីកម្មពៀរវេរាទាំងឡាយផង។
លោកប្រធានមន្ទីរបានបញ្ជាក់ថា រដូវនេះ គឺជារដូវដែលបងប្ងូនខ្មែរយើង ជួបជុំគ្នាដើម្បីរំលឹកដល់ដួងវិញ្ញាណក្ខន្ទ របស់បុព្វការរីជន មានមាតា បីតា ជីដូនជីតាសាច់សារលោហិតដែលបានចែកឋានទៅកាន់លោកខាងមុខ ធ្វើយ៉ាងណាឧទ្ទឹសកុសល្យ ឲ្យដួងវិញ្ញាណក្ខន្នអស់លោកទាំងនោះ ក្រែងលោផ្លាំងផ្លាត់ទៅកើតកន្លែងមិនសមរម្យ សុំឲ្យបរមី ព្រះពុទ្ធព្រះធម៌ព្រះសង្ឃ ជួយយិតយោងសណ្តោងដួងវិញ្ញាណពួកគេទាំងនោះ ឲ្យទៅកាន់ភពដែលសមគួរ និងមកទទួលបុណ្យផ្សេងៗពីបងប្អូន គ្រួសារសាច់ញាតិគ្រប់ៗគ្នា ព្រោះថានេះជារដូវដែលគេដោះលែងនូវដួងវិញ្ញាណក្ខន្ន ដែលមាន ប្រេត ជាដើម។
លោកបន្តឲ្យដឹងទៀតថា ជារៀងរាល់ឆ្នាំនៅពេលដល់ថ្ងៃខែប្រារព្ធពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិសណ្តានទាំងអស់ ទោះនៅទីជិតឬទីឆ្ងាយតែងតែស្កាត់ធ្វើដំណើរទៅជួបជុំគ្នាជាពិសេសឪពុកម្ដាយ នៅស្រុកកណើត ដើម្បី បានរៀបចំម្ហូបអាហារ បាយសម្លរ ចង្ហាន់យកទៅប្រគេនព្រះសង្ឃដែលគង់នៅវត្តអារាម។ ទាំងនេះ គឺជាទម្លាប់មួយដែលគេនិយមធ្វើតៗគ្នារបស់ជនជាតិខ្មែរជាយូរមកហើយ។
សូមបញ្ជាក់ថា៖ បច្ចុប្បន្នរាជធានីភ្នំពេញមានវត្តអារាមចំនួន១៥០ វត្ត និងមានព្រះសង្ឃគង់ស្នាក់អាស្រ័យចំនួន ៨៤២៧អង្គ៕