មណ្ឌលគិរីៈម៉ូតូពីរគ្រឿងដែលម្ចាស់វាកែច្នៃទុកសម្រាប់ដឹករបស់ធ្ងន់ៗឬអ្នករកស៊ីឈើហៅថាម៉ូតូដែកនោះ បានបុកគ្នាពេញទំហឹងកាលពីម៉ោង០៨យប់ថ្ងៃទី០៦ខែកញ្ញាឆ្នាំ២០១៧ចំណុចក្បែរបង្គោលសីមា ព្រំប្រទល់ស្រុកកែវសីមា ខេត្តមណ្ឌលគិរីនិងស្រុកស្នួល ខេត្តក្រចេះបង្ករឱ្យអ្នកបើកបរទាំងពីរស្លាប់ទាន់ហន់នៅនិងកន្លែង។
ប្រភពពីអ្នកឃើញហេតុការណ៍ប្រាប់ថា នៅមុនពេលកើតហេតុគេបានឃើញម៉ូតូ១គ្រឿងមានដឹកឈើតូចៗប្រហែល១០គ្រាប់ បោះពួយពីទឹកដីស្រុកកែវសីមា ពីទិសខាងកើតមកខាងលិច លុះមកដល់ចំណុចកើតហេតុក៏មានម៉ូតូ១គ្រឿងទៀត បោះពួយពីផ្លូវដី ទិសដៅពីលិចទៅកើត ហើយម៉ូតូទាំងពីរគ្រឿងនោះបានបុកផ្ទុបគ្នា ពេញទំហឹង បោកក្បាលអ្នកបើកបរអត់ពាក់មួកទាំងពីរនាក់និងផ្លូវជាតិ បណ្តាលឱ្យស្លាប់ភ្លាមៗនៅនិងកន្លែងតែម្តង។
នគរបាលស្រុកកែវសីមាឱ្យដឹងថា ជនរងគ្រោះទាំងពីរមានឈ្មោះសេង សុធារ៉ា ភេទប្រុស អាយុ២៥ឆ្នាំ ជនជាតិខ្មែរ មានទីលំនៅភូមិឡាប៉ាខេ ឃុំស្រែខ្ទុម ស្រុកកែវសីមា បានស្លាប់ក្រោយរងរបួសធ្ងន់ត្រង់ក្បាល បាក់ដៃ បាក់ជើង។ចំណែកម្នាក់ទៀតជាជនជាតិចាមឈ្មោះអាន ជី ភេទប្រុស អាយុ៣១ឆ្នាំ មានទីលំនៅភូមិឆ្នែង ឃុំស្រែខ្ទុម ស្រុកកែវសីមា ក៏បានស្លាប់ព្រោះរងរបួសធ្ងន់ធ្ងរដែរ។ទោះជាយ៉ាងណា គេនៅមិនទាន់អាចសន្និដ្ឋាន ពី តើនណា ខុសនណាត្រូវនោះទេ ដោយក្រុមគ្រួសារទាំងពីរកំពុងយកសព ទៅធ្វើបុណ្យតាមប្រពៃណីសិន៕