ភ្នំពេញ៖ អភិបាលនៃគណៈអភិបាលរាជធានីភ្នំពេញ លោក ឃួង ស្រេង បានបញ្ជាអោយមន្ត្រីពាក់ព័ន្ធទាំងអស់រកតួព្រែកធម្មជាតិនៅសង្កាត់ព្រែកថ្មីនិងសង្កាត់ព្រែកឯង អោយឃើញ ក្រោយពីមានការឃុបឃិតគ្នា ចាក់លុបបំបាត់ធ្វើជាកម្មសិទ្ធិ ដែល បណ្តាលអោយបាត់ប្រឡាយទឹកហូរ រំដោះទឹកចេញយ៉ាងសំខាន់នោះ ហើយបើមន្ត្រីទាំងអស់នេះរកមិនឃើញទេ ល្មមឈប់ពីការងាររបស់ខ្លួនបាន ហើយ ។
លោកឃួង ស្រេង បានប្រមាន ដក់តំណែងមន្ដ្រីជំនាញ ពាក់ព័ន្ធ ក្រោមឱវាទខ្លួនបែបនេះ
កាលពីព្រឹកថ្ងៃទី០៥ កញ្ញា ឆ្នាំ២០១៧ ក្នុងពិធីបើកការដ្ឋានស្ថាបនាផ្លូវ៣៥១ ចាប់ពីផ្លូវជាតិលេខ១ដល់ ផ្លូវជា ស៊ីណាត់ ដោយឆ្លងកាត់សង្កាត់២ គឺសង្កាត់និរោធនិងសង្កាត់ព្រែកប្រា ខណ្ឌច្បារអំពៅ ដែលមានការចូល រួមពី មន្ត្រីក្រោមឱវាទរដ្ឋបាលរាជធានី អាជ្ញាធរមូលដ្ឋាននិងប្រជាពលរដ្ឋជាច្រើនរយនាក់។
លោក ឃួង ស្រេង បានមានប្រសាសន៍ថា ៖ ព្រែកធម្មជាតិមួយនេះស្ថិតក្នុងសង្កាត់ព្រែកថ្មីនិងសង្កាត់ព្រែកឯង ហើយត្រូវបានអ្នកមានលុយឃុបឃិតគ្នា ចាក់លុបបំបាត់ធ្វើជាកម្មសិទ្ធិ ដែល បណ្តាលអោយបាត់ប្រឡាយ រំដោះចេញយ៉ាងសំខាន់ ។ លោកបន្តថា ៖បើមន្ត្រីពាក់ព័ន្ធដូចជាមន្ត្រីសុរិយោដី មន្ត្រីធនធានទឹកជាដើម រកមិនឃើញព្រែកនេះទេ ឈប់ពីការងាររបស់ខ្លួនទៅ មិនដឹងថាធ្វើការងារអីកើតទៀតទេ ។
បើតាមមន្ត្រីមូលដ្ឋាន បានបញ្ជាក់ថា ព្រែកធម្មជាតិមួយនេះស្ថិតក្នុងសង្កាត់ព្រែកថ្មីនិងសង្កាត់ព្រែកឯង ខណ្ឌច្បារអំពៅត្រូវបានឈ្មួញដីពិសសអ្នកស្រីស៊ុយ សុផានរំលោភ ដោយចាក់ដីបំពេញ យកជាកម្មសិទ្ធិផ្ទាល់ខ្លួនជាច្រើនឆ្នាំមកហើយ តាំងពីសង្កាត់ព្រែកថ្មី ស្ថិតនៅក្រោមការគ្រង់គ្រងរបស់រដ្ឋបាលខេត្តកណ្តាល មកម្ល៉េះ ពោលគឺតាំងពីសង្កាត់ទាំងនេះកាត់ចូលមករាជធានីភ្នំពេញមកម្ល៉េះ ប៉ុន្តែលោកអភិបាលរាជធានី បានបញ្ជាឲ្យប្រធានភូមិបាលខណ្ឌសហការជាមួយអាជ្ញាធរខណ្ឌរកព្រែកបាត់ ឲ្យឃើញ។ មន្ត្រីដដែលបន្តថា ព្រែកនេះពិតជាបានដើរតួយ៉ាងសំខាន់ក្នុងការរំដោះទឹកចេញពីសង្កាត់ព្រែកថ្មី ពិសេសសង្កាត់ព្រែកឯង ដោយហូរចូលទំលាក់ទៅទន្លេបាសាក់ ។
ក្រោយការចាក់លុបបំបាត់ព្រែកនេះបានធ្វើអោយសង្កាត់ព្រែកឯងទទួលរងការលិចលង់យ៉ាងធ្ងន់ធ្ងរកន្លងមក ហើយករណីនេះក៏ត្រូវបានប្រជាពលរដ្ឋស្នើសុំយ៉ាងទទូចនៅក្នុងវេទិកាសាធារណៈផងដែរ ដើម្បីជួយរកវិធីយ៉ាងណា រំដោះទឹកចេញពីភូមិដ្ឋានរបស់ពួកគាត់។
ដើម្បីបំពេញទៅតាមសំណូមពរយ៉ាងទទូចរបស់ប្រជាពលរដ្ឋទើប អភិបាលនៃគណៈអភិបាលរាជធានីភ្នំពេញ លោក ឃួង ស្រេងបញ្ជាអោយមន្ត្រីពាក់ព័ន្ធរកតួព្រែកធម្មជាតិនៅសង្កាត់ព្រែកថ្មីនិងសង្កាត់ព្រែកឯងនេះអោយឃើញវិញ ដើម្បីកាយជាមុខទឹករំដោះការលិចលង់របស់ប្រជាពលរដ្ឋ៕
