ខេត្ដរតនគិរី ៖ លោក ចាន់ ស៊ីថុល ដែលជាមេការរបស់មេឈ្មួញ និងជាអ្នកមានអំណាចខាងការដឹកជញ្ជូនឈើឆ្លងដែន ប្រចាំស្រុកអណ្ដូងមាស កំពុងសប្បាយក្នុងការរត់ការដឹកជញ្ជូនឈើប្រណីត ចេញពីដែនអភិរក្ស យកទៅលក់នៅប្រទេសវៀតណាម ដោយសេរីទាំងថ្ងៃទាំងយប់ ដោយគ្នានញញើតនឹងមន្ត្រីសមត្ថកិច្ចជំនាញបន្តិចណាសោះឡើយ មិនដឹងជាមេការរូបនេះមានថៅកែដែល មានឋានៈអំណាចប៉ុណ្ណានោះទេ? បានជាអាចដឹកជញ្ជូនដោយគ្មានការរំខានពីសមត្ថកិច្ចជំនាញ និងសមត្ថកិច្ចនៅក្នុងស្រុកអណ្ដូងមាសនេះបន្តិចសោះបែបនេះ។
ជាក់ស្ដែងនៅរសៀលថ្ងៃទី០៣ ខែកញ្ញា.ឆ្នាំ២០១៧នេះតែម្ដង លោក ថុល បានដឹកឈើប្រណីតពេញរថយន្ដ ហើយមកឈប់កណ្ដាលផ្លូវ ស្ថិតក្នុងចំណុចឃុំ តាលាវ ដោយមិនខ្វល់ និងគ្មានសមត្ថកិច្ចណាហ៊ានមកបង្ក្រាបនោះឡើយ។
ប្រភពពីប្រជាពលរដ្ដក្នុងភូមិបានប្រាប់ឲ្យដឹងថា ជារៀងរាល់ថ្ងៃពួកកាត់ឃើញរថយន្តខាងលើនេះដឹកឈើប្រណិតមិនដែលខាន១ថ្ងៃនោះទេ ហើយបើកលឿនៗណាស់ ធ្វើអោយពួកគាត់មានការបារម្ភពីសុខសុវត្ថិភាពរបស់កូនចៅគាត់ខ្លាំងណាស់ តែបើគាត់ចង់ឈប់វិញគឺគាត់បើកមកឈប់កណ្ដាលផ្លូវចឹងតែម្ដង ហើយមិនដែលឃើញមានសមត្ថកិច្ចមកបង្ក្រាប់ម្ដងណានោះទេ។
ទន្ទឹមនោះពួកគាត់សូមសំណូមពរដល់លោក មេបញ្ជាការកងរាជអាវុធហត្ថ ខេត្ដរតនគិរី និងជំនាញរដ្ឋបាលព្រៃឈើ ខេត្ដមេត្ដា បង្ក្រាបឡានដឹកឈើទាំងនោះម្ដងទៅ ហើយជាពិសេសសូមលោកស្នងការខេត្ដរតនគិរី មេត្ដាចាត់វិធានការទៅលើបុគ្គលខិលខូចដែលយក មួករីអាវប៉ូលីស ដាក់ក្នុងឡានដើម្បីធ្វើជាអំណាចក្នុងការដឹកជញ្ជូនឈើខុសច្បាប់ឆ្លងដែនទៅវៀតណាមបែបនេះផងទាន ព្រោះវាធ្វើអោយប៉ះពាល់ដល់អង្គភាព និងប៉ះពាល់ដល់សមត្ថកិច្ចល្អៗត្រឹមត្រូវ សូមលោកមេត្តាចាត់វិធានការផងទាន៕
