មណ្ឌលគិរី ៖ ឯកឧត្តម អេង ប៊ុនហ៊ាង អភិបាលខេត្តមណ្ឌលគិរី និងមន្ត្រីរាជការជុំវិញខេត្ត បាន នាំយកទៀនព្រះវស្សា និងទេយ្យទានរបស់ខេត្ត មកប្រគេនដល់វត្តចំនួន២២ នៅទូទាំង ក្រុង/ស្រុកទាំង៥ របស់ខេត្ត ពិធីនេះឡើងនៅក្នុងវត្តសែនមនោរម្យ ស្ថិតនៅក្រុងសែន មនោរម្យ កាលពីព្រឹកថ្ងៃទី២៩ ខែកក្កដានេះ។
ឯកឧត្តម អេង ប៊ុនហ៊ាង បានមានប្រសាសន៍ថា វិស័យព្រះពុទ្ធសាសនា បច្ចុប្បន្ននេះ មានការរីកចម្រើន គួរឲ្យកត់សំគាល់ ដើម្បីរួមចំណែក ក្នុងវិស័យពុទ្ធសាសនា ជាមួយរាជរដ្ឋាភិបាល ។ ជារៀងរាល់ឆ្នាំ ឯកឧត្តម និងមន្ត្រីរាជការក្នុងខេត្ត តែងតែនាំទេយ្យវត្ថុ និងទៀនវស្សា ប្រគេនជូនព្រះសង្ឃ ដែលកំពុងគង់ចាំព្រះវស្សា ក្នុងវត្តនីមួយៗក្នុងទូទាំងខេត្តមណ្ឌលគិរី ដែលស្របទៅតាមជំនឿប្រពៃណី របស់ប្រជាជនខ្មែរ ដែលជាអ្នកកាន់ព្រះពុទ្ធសាសនាតាំងពីដើមរៀងមក។
ឯកឧត្តមបានបន្តទៀតថា ពាក់ព័ន្ធទៅនឹងប្រពៃណីដ៏ល្អរបស់ប្រជាជាតិខ្មែរ ដែលជានិច្ចកាលតែងផ្សារភ្ជាប់ជាមួយនឹងព្រះពុទ្ធសាសនានៅក្នុងរដូវ ចូលព្រះ វស្សានេះ ព្រះ សង្ឃត្រូវគង់ចាំព្រះវស្សានៅក្នុងវត្ត ហើយមិនអាចចេញទៅបិណ្ឌបាត្រនៅក្រៅវត្តបានទេ ដូច្នេះពុទ្ធបរិស័ទ្ធត្រូវយកចង្ហាន់ និងសម្ភារៈនានា មកប្រគេនព្រះសង្ឃ ក្នុងរយៈពេលនេះ ។ ទេយ្យទានដែលបានយកមកប្រគេននាឱកាសនោះ ក្នុងមួយវត្តៗ ទទួលបានបច្ច័យ ២០ម៉ឺនរៀល ទៀនព្រះវស្សា១គូ អង្ករ១បេ ស្ករស ទឹកដោះគោ ទឹកក្រូច ទឹកបរិសុទ្ធ២កេស និង មី១កេស ទឹកត្រី១យូរ និង ទឹកស៊ីអ៊ីវ១យូរ និងបានប្រគេនបច្ច័យដល់យាយជី តាជី ក្នុងម្នាក់ៗ ទទួលបាន ១ ម៉ឺនរៀលផងដែរ ៕
ធី រតនា ដំណឹងភ្នំពេញ
