មណ្ឌលគិរី៖ រដ្ឋមន្ត្រីក្រសួងយុត្តិធម៌ ឯកឧត្ដម អង្គ វង្ស វឌ្ឍានា បានស្នើឲ្យព្រះរាជអជ្ញាដែលទើបចូលកាន់តំណែងថ្មីនៃសាលា ដំបូងខេត្តមណ្ឌលគិរី សូមពិនិត្យឡើងវិញចំពោះបញ្ហាបទល្មើសព្រៃឈើ ព្រោះបើយោងតាមរបាយបូកសរុបការងាររបស់អយ្យការអមសាលាដំបូងខេត្តមណ្ឌលគិរីកន្លងមកឃើញថា បទល្មើសព្រៃឈើនៅមានចំនួនច្រើននៅឡើយ អាស្រ័យហេតុនេះលោកព្រះ រាជអាជ្ញាថ្មី ត្រូវសហការជាមួយអាជ្ញាធរខេត្តបង្ក្រាប និងទប់ស្កាត់បទល្មើសព្រៃឈើដែលកើតមានឡើងដដែលៗនេះឲ្យមានប្រសិ ទ្ធភាព ។
ឯកឧត្ដមរដ្ឋមន្ត្រីក្រសួងយុត្តិធម៌លើកឡើងបែបនេះ ក្នុងពិធីប្រកាសតែងតាំងចូលកាន់មុខតំណែងព្រះរាជអាជ្ញានៃអយ្យ ការអមសាលាដំបូងខេត្តមណ្ឌលគិរី ដោយលោក ឡុង ហុកម៉េង អតីតព្រះរាជអាជ្ញារងអមសាលាដំបូងខេត្តកណ្ដាល ត្រូវចូលកា ន់តំណែងថ្មីជាព្រះរាជអាជ្ញាអមសាលាដំបូងខេត្តមណ្ឌលគិរី ក្នុងនោះលោក ឃុត សុភាង អតីតព្រះរាជអាជ្ញាអមសាលាដំបូងខេត្ត មណ្ឌលគិរី ត្រូវផ្ទេរភារកិច្ចទៅជាព្រះរាជអាជ្ញាអមសាលាឧទ្ធរណ៍ ។
ឯកឧត្ដម អង្គ វង្ស វឌ្ឍានា បានលើកឡើងបន្តទៀតថា ការផ្ទេរតំណែងរបស់ព្រះរាជអជ្ញាខេត្តមណ្ឌលគិរី គឺជាដំណើរការ ផ្លាស់ប្ដូរធម្មតានៅក្នុងមុខងារជាចៅក្រម ឬព្រះរាជអាជ្ញា ហើយជាផ្នែកមួយនៃការកែទម្រង់ក្នុងវិស័យយុត្តិធម៌ ព្រោះក្រសួងយុត្តិធ ម៌តែងតែបានយកចិត្តទុកដាក់ និងតាមដានជាប្រចាំនៅដំណើរការប្រព្រឹត្តទៅនៃសាលាដំបូង និងអយ្យការអមសាលាដំបូងគ្រប់ ជាន់ថ្នាក់ ក្នុងគោលដៅជម្រុញឲ្យមានការកែលំអរ និងបង្កើនប្រសិទ្ធភាពការផ្ដល់សេវាយុត្តិធម៌ឲ្យកាន់តែមានលក្ខណៈល្អប្រសើរ ជាលំដាប់ ។
ក្នុងឱកាសនោះដែរ លោក ឡុង ហុកម៉េង ដែលទើបទទួលតំណែងថ្មីជាព្រះរាជអាជ្ញាអមសាលាដំបូងខេត្តមណ្ឌលគិរី ក៏បានប្ដេជ្ញាថា នឹងដោះស្រាយរឿងក្ដីនានាក្នុងសាលាដំបូងឲ្យបានឆាប់រហ័ស និងសមស្របទៅតាមផ្លូវច្បាប់ ហើយលោកនឹងខិត ខំធ្វើយ៉ាងណាឲ្យមានសាមគ្គីភាពកាន់តែល្អប្រសើរថែមទៀត រវាងស្ថាប័នអយ្យការ និងស្ថាប័នអង្គភាពនានាជុំវិញខេត្ត ។ លោក បន្តថា លោកនឹងព្យាយាមខិតខំអនុវត្តនូវវិធានការចាំបាច់ទាំងឡាយសំដៅបង្កើនប្រសិទ្ធភាព ការទប់ស្កាត់ និងបង្ក្រាបបទល្មើស ព្រៃឈើគ្រប់ប្រភេទ និងបន្តដឹកនាំតម្រង់ទិសដៅការងាររបស់អយ្យការអមសាលាដំបូងខេត្តមណ្ឌលគិរីឲ្យសម្រេចបានលទ្ធផល កាន់តែល្អប្រសើរថែមទៀត ៕
