ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានចេញបញ្ជាយ៉ាងដាច់ខាត ដោយមិនអនុញ្ញាតិអោយរថយន្តកុងទីន័រ រថយន្តក្រឡុកស៊ីម៉ង់ត៌ រថយន្តដឹកដី និងរថយន្តដឹកទំនិញធុនធនផ្សេង ទៀត ធ្វើចរាចរលើមហាវិថី៣ខ្សែនៅកណ្តាល រាជធានីភ្នំពេញ នោះគឺមហាវិថីសុីសុវត្ថិ មហាវិថីព្រះមុនីវង្សនិងមហាវិថីព្រះសីហនុ ដែលវានឹងបង្កអោយកកស្ទះចរាចរនិងបង្កអោយបាត់បង់សណ្តាប់ធ្នាប់ សោភ័ណ្ឌភាពយ៉ាងធ្ងន់ធ្ងរ។
ការចេញបញ្ជាយ៉ាងដាច់ខាតបែបនេះរបស់លោក ឃួង ស្រេងត្រូវបានធ្វើឡើងក្នុងឱកាសដែលលោកបានអញ្ជើញជាអធិបតីភាពក្នុងពិធីសំណេះសំ ណាលជាមួយ ក្រុមអ្នកបើកបររថយន្តក្រុងនិងរថយន្តដឹកធុនធ្ងន់ក្នុងរាជធានីភ្នំពេញ នៅមន្ទីរសាធារណការនិងដឹកជញ្ជូនរាជធានីភ្នំពេញ កាលពីរសៀលថ្ងៃទី០១ កញ្ញាឆ្នាំ២០១៧។
លោក ឃួង ស្រេងបានមានប្រសាសន៍ លើកឡើងថា ៖ លោកស្ទើរតែស្រក់ទឹកភ្នែក ខណៈ
ដែលលោកបានឃើញរថយន្តកុងទីន័រឆ្លងកាត់ផ្លូវខាងលើ ដោយទង្វើរបែបនេះ វាមិនគួរកើតឡើងសោះឡើយ ។
លោកថា ចាប់ពីពេលនេៈតទៅអាជ្ញាធររាជធានីភ្នំពេញ មិនអនុញ្ញាតិអោយរថយន្តកុងទីន័រ រថយន្តក្រឡុកស៊ីម៉ង់ត៌ រថយន្តដឹកដី និងរថយន្តដឹកទំនិញធុនធ្ងន់ផ្សេងទៀត ធ្វើចរាចរលើមហាវិថីស៊ីសុវត្ថិ មហាវិថីព្រះមុនីវង្សនិងមហាវិថីព្រះសីហនុឡើយ ហើយបើនៅតែមានទៀតអាជ្ញាធរនឹងមានវិធានការយ៉ាងធ្ងន់ធ្ងរបំផុត ដោយមិនយោគយល់នោះទេ។
លោកអភិបាលរាជធានីបន្តថា ឃ្លាំងលក់រថយន្តនៅកណ្តាលក្រុងវាពិតជាមែនហើយ តែមិនអោយរថយន្តដឹកកុងទីន័រ ចូលកណ្តាលក្រុងទេ បើមិនអនុវត្តតាមទេ ឃ្លាំងទាំងនោះ បើចង់អោយអាជ្ញាធររាជធានីបិទ គឺអាចបិទបានភ្លាម។
លោកឃួង ស្រេង ក៏បង្ហាញពី វិធានការថ្មីៗទៀតចំពោះការដ្ឋានសាងសង់ និងរណ្តៅដីផងដែរ ដោយលោកបញ្ជាក់យ៉ាងច្បាស់ថា ចំពោះការដ្ឋានសំណង់ផ្សេងៗ ការដ្ឋានរណ្តៅដី គ្រប់រថយន្តដឹកជញ្ជូនទាំងអស់ដាច់ខាតត្រូវតែលាងកង់រថយន្តអោយបានស្អាតទើបអោយធ្វើចរាចរបាន ។ បើមិនដូច្នោះទេ រដ្ឋបាលរាជធានីភ្នំពេញមិនអនុញ្ញាតិអោយធ្វើចរាចរដាច់ខាត់ ។
ប៉ុន្តែទោះបីជាយ៉ាងណាក្តីលោកឃួង ស្រេងក៏បានបញ្ជាក់ផងដែរថា មុននៃការអនុវត្តការងារនេះ ក្នុងមានរដ្ឋបាលរាជធានីភ្នំពេញនឹងចេញជាសេចក្តីជូនដំណឹងរួមនិងការណែនាំជាមុនសិន មុននឹងឈានដល់ការអនុវត្តវិធានការក្តៅ៕
