ថ្មីៗនេះ ប្រជាពលរដ្ឋរស់នៅតំបន់ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង បានអោយដឹងថា ៖ លោក អ៊ុយ ប៊ុនធន មន្ត្រីបរិស្ថានទទួលបន្ទុកការពារអភិរក្ស ធនធានធម្មជាតិ តំបន់បឹងទន្លេសាប បាននិងកំពុងកាក់កបខ្លាំងណាស់ ក្នុងការប្រមូលលាភសក្ការៈ ។ ក្រុមប្រជានេសាទរកស៊ីដាក់របាំងអូសអួន និងជន ព្រមទាំងទូកឌុក ទិញត្រី យ៉ាងច្រើនសន្ធឹកសន្ធាប់ ។
ប្រភពពីមន្ត្រីតូចតាចម្នាក់នៅក្នុងអង្គភាពបរិស្ថានបខេត្ត សុំមិនបញ្ចេញឈ្មោះ នៅក្នុងអង្គភាពបរិស្ថានបានអោយដឹងថា ជាយូរឆ្នាំមកហើយ ដែលបុគ្គលរូបនេះតែងតែដឹកនាំកម្លាំងរបស់អង្គភាពបរិស្ថានការពារអភិរក្សធនធានធម្មជាតិបឹងទន្លេសាប ដែលមានស្នាកការឈរជើងនៅឃុំឆ្នុកទ្រូ ចុះបង្ក្រាបបទល្មើសនេសាទដែលមានដូចជា របាំងសាច់អួន លប ណរ៉ាវ ជាច្រើនកន្លែងប៉ុន្តែការបង្ក្រាបនេះគឺគ្រាន់តែធ្វើរបៀបគោះទឹកបង្អើលត្រីអោយចូលស៊ងប៉ុណ្ណោះ ។ មកដល់បច្ចុប្បន្ននេះ ឈ្មោះនេះលែងដឹកនាំកម្លាំងបង្ក្រាបហើយ គេបែរជាប្រើល្បិចទៅយកលុយស្ងាត់ៗតែ២នាក់ ដៃគូរបស់គេដែលជាប្រធានក្រុម ឈ្មោះ សោម កុសល ដែលមានបេសកកម្មកាន់អាវុធទៅប្រមូលយកលុយ ពីក្រុមអ្នករកស៊ីនេសាទខាងលើ ដោយប្រើកាណូតបាឡាស្មាច់ ពេលកូនចៅសួរ បុគ្គលទាំង២ខាងលើឆ្លើយថាទៅរកត្រីស៊ី ប៉ុន្តែការទៅរកត្រីស៊ីនេះ គឺបានទៅបាត់មួយថ្ងៃវាល់ល្ងាច រហូតដល់យប់មិនឃើញវិលមកវិញផង ប៉ុន្តែបើតាមគេដឹងគឺមិនមែនទៅរកត្រីនោះទេ តាមពិត គឺគេទៅប្រមូលលុយស្ងាត់ៗនៅគ្រប់តំបន់។
ប្រភពខាងលើនេះ បានបញ្ជាក់អោយដឹងទៀតថា បុគ្គលទាំងពីររូបខាងលើ បានទៅប្រមូលលុយពីអ្នករកស៊ីដាក់របាំងនៅប្រឡាយមាស បានចំនួន១លាន៨៩ម៉ឺន នៅគន្លង១០០ បាន៨០ម៉ឺន នៅព្រែកថ្លាន់៥០ម៉ឺន និងនៅកន្លែងផ្សេងៗទៀតដូចជាផ្លូវទូក កំពង់អួរ សេះស្លាប់ គន្ធរ និងក្រចាប់ ដែលមានរបាំងរាប់រយ បុគ្គលខាងលើបានយកលុយក្នុង១របាំង រដូវបិទ ២០ម៉ឺនរៀល រដូវបើកយក១៥ម៉ឺនរៀល មិនតែប៉ុណ្ណោះ ទូកនេសាទដូចជា ទូកអូសអួន ទូករុញជន ដែលនៅក្នុងខេត្តកំពង់ឆ្នាំង មានប្រមាណ១០គ្រឿង ក៍បុគ្គលរូបនេះបានយកលុយរួចហើយដែរ និងទូកអូសអួន២ទូកនៅឃុំឆ្នុកទ្រូ បុគ្គលរូបនេះយកមួយទុកប្រមាណ៤០ម៉ឺនរៀល ចំណែកទូកឌុកទិញត្រី ដែលមានរាប់សិបក្បាលទូកក្នុងខេត្តកំពង់ឆ្នាំងបុគ្គលរូបនេះក៍ប្រមូលលុយរួចអស់ហើយដែរ ។
ប្រភពបានបញ្ជាក់បន្ថែមទៀតថា លោក អ៊ុយ ប៊ុនធន នូវបានប្រព្រឹត្តអំពើពុករលួយ ដោយត្រូវរ៉ូវជាមួយម្ចាស់អាជីវកម្មផលិតបាឡាស្មាច់ ដែលមានឈ្មោះសាន ជាថៅកែលក់ប្រេង នៅឃុំឆ្នុកទ្រូ ជាម្ចាស់អាជីវកម្មផលិតបាឡាស្មាច់ ដែលមានលោកឈិន គឹមឃន នៅពីក្រោយខ្នង ដែលម្ចាស់អាជីវកម្មនេះបានសូកប៉ាន់ ទូកបាឡាស្មាច់មួយគ្រឿង អោយទៅលោក អ៊ុយ ប៊ុនធន ទៅប្រើការក្នុងអង្គភាព ហើយ លោក អ៊ុយ ប៊ុនធន បានយកទូនបាឡានេះទៅលក់យកលុយស៊ីដាច់កូនចៅ ក្នុងអង្គភាព ។ មិនតែប៉ុណ្ណោះម្ចាស់អាជីវកម្មបាឡាស្មាច់នេះ បានសូកប៉ាន់បាឡាស្មាច់ទៅអោយអង្គភាពដទៃជាច្រើនទៀតផងដែរ ដូចជា មេឃុំឆ្នុកទ្រូ១គ្រឿង មេប៉ុស្តិ៍ឆ្នុកទ្រូ១គ្រឿង នាយស្នាក់ការសន្តិសុខអ.ហ១គ្រឿង ផងដែរ ។
ប្រជាពលរដ្ឋម្នាក់ដែលជាឈ្មួញរកស៊ីប្រមូលទិញត្រីបានប្រាប់អ្នកយកពត៌មានយើងថា រូបគាត់ត្រូវចំណាយលុយបង់អោយសមត្ថកិច្ចពាក់ព័ន្ធក្នុងមួយរដូវៗទាំងរដូវបើក និង រដូវបិទ ត្រូវបង់លុយអោយសមត្ថកិច្ចពាក់ព័ន្ធ៤ជំនាញ គឺជំនាញជលផល បរិស្ថាន ប៉ូលីសសេដ្ឋកិច្ច និង ប៉េអ៊ឹម ក្នុង១ជំនាញៗ៤០ម៉ឺនរៀល ជាថ្នូរនឹងការធ្វើមិនដឹង មិនលឺ ដេកលក់មិនបង្ក្រាប ។
ទាក់ទិននឹងសេចក្តីរាយការណ៍របស់ប្រជាពលរដ្ឋខាងលើនេះ សារព័ត៌មានដំណឹងភ្នំពេញ មិនទាន់អាចស្វែងរកការ បំភ្លឺពីឈ្មោះ អ៊ុយ ប៊ុនធន និង សោម កុសល បាននៅឡើយទេ ព្រោះគ្មានលេខទូរស័ព្ទទាក់ទង ។
ប្រជាពលរដ្ឋបានសំណូមពរដល់រដ្ឋមន្ត្រីក្រសួងបរិស្ថាន ដែលទើបនឹងឡើងថ្មី គឺលោក បណ្ឌិត សាយ សំអាល់ មេត្តាជួយត្រួតពិនិត្យ និងដុះក្អែល បុគ្គល អ៊ុយ ប៊ុនធន និងសោម កុសល នេះចេញម្តងទៅ ដើម្បីចូលរួមអនុវត្ត នូវ កំណែទម្រង់ ស៊ីជម្រៅ របស់រដ្ឋាភិបាល អាណត្តិទី ៥ នេះក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន អោយមានប្រសិត្ធភាព និងទទួលបានជោគជ័យ ៕
