បាត់ដំបង ៖ លោកគ្រូអ្នកគ្រូបុគ្គិលកចំនួន ១៦៧រូបនៃមន្ទីរអប់រំយុវជន និងកីឡាខេត្តបាត់ដំបងបានទទួល គ្រឿងឥស្សរិយយស ការងារក្នុងឆ្នាំសិក្សា២០១០-២០១១ ពីឯកឧត្តម ហង់ ណារ៉ុន រដ្ឋមន្ត្រីក្រសួង អប់រំយុវជន និងកីឡាកាលពីថ្ងៃទី២៦ ខែកក្កដា នៅមន្ទីរអប់រំយុវជន និងកីឡាខេត្តបាត់ដំបង។
ក្នុងមតិស្វាគមន៍ របស់លោក ងី សែត ប្រធានមន្ទីរអប់រំយុវជន និងកីឡាខេត្ត បានគូសបញ្ជាក់ ពីសកម្មភាព វិស័យអប់រំ ក្រោមការខិតខំ បំពេញភារកិច្ចប្រកបដោយការទទួលខុសត្រូវ របស់មន្ត្រី អប់រំ គ្រប់លំដាប់ថ្នាក់ ក្នុងការរួមចំណែកធ្វើឲ្យវិស័យអប់រំ មានការប្រែប្រួលប្រកបដោយគុណភាព និងប្រសិទ្ធភាព ឆ្លើយតបបានទៅនិងគោលដៅ នៃផែនការយុទ្ធសាស្ត្រ វិស័យអប់រំរបស់ក្រសួង ក៏ដូច ជាគោលនយោបាយ របស់រាជរដ្ឋាភិបាល អាណត្តិទី៥ នៃរដ្ឋសភា ដែលបានចាត់ទុកវិស័យអប់រំ ជា វិស័យអាទិភាព ក្នុងការអភវិឌ្ឍន៍សង្គមកម្ពុជា ដោយសម្រេចបានលទ្ធផលជោគជ័យជាបន្តបន្ទាប់ ពិសេសលទ្ធផល នៃការប្រឡងសិស្សពូកែថ្នាក់ជាតិ ថ្នាក់ទី៩ ទទួលបានជ័យលាភី៨នាក់ ស្រី៤នាក់ ទទួលបានមេដាយមាស២ និងប្រាក់១ថ្នាក់ទី១២ ទទួលបានជ័យលាភី ២នាក់។
ឯកឧត្តម ហង់ ជូនណារ៉ុន បានគូសបញ្ជាក់ពីប្រវត្តិខេត្តបាត់ដំបង ដែលជាខេត្តប្រវត្តិសាស្ត្រ របស់ព្រះរាជាណាចក្រកម្ពុជា សំបូរទៅដោយធនធានមនុស្ស មានអ្នកចេះដឹងច្រើន ទាំងអ្នកកវិនិពន្ធ អ្នកចម្រៀងជាដើម និចាត់ទុកជាថ្នាលបណ្តុះបញ្ញាវ័ន្តទៀតផង។ ឯកឧត្តមបានធ្វើការប្រៀបធៀបផង ដែរលើវិស័យអប់រំ ក្នុងកំឡុងពីឆ្នាំ១៩៦៨-១៩៦៩ ដែលមានសិស្សប្រឡង សញ្ញាប័ត្រទុតិយភូមិ ត្រឹម តែជាង ៣ពាន់នាក់ តែបច្ចុប្បន្ននេះ មានសិស្សចូលរួមប្រឡង រហូតដល់ជាង ៨០០០០ នាក់ នេះជា ការ ឆ្លុះបញ្ចាំងឲ្យឃើញ ពីការអភិវឌ្ឍន៍រីកចំរើនលើវិស័យអប់រំ តាំងពីថ្នាក់មត្តេយ្យសិក្សា រហូតដល់ ឧត្តមសិក្សា ។ ឯកឧត្តមបានសុំទោសផងដែរ ចំពោះលោកគ្រូ អ្នកគ្រូដែលក្រសួងត្រូវការកែទម្រង់ ព្រោះនេះជាគោលការ របស់ក្រសួងក្នុងការតម្រូវ លើចំណុចខ្វះខាតកន្លងមក តែបើគិតពីការឡើង ប្រាក់ខែ គឺលោកគ្រូ អ្នកគ្រូបឋមសិក្សា ឡើងច្រើនជាងគេ។ ដើម្បីឆ្លើយតបទៅនិង សមាហរណកម្ម អាស៊ាន ចុងឆ្នាំ២០១៥នេះ រាជរដ្ឋាភិបាលមានគោលការ ពង្រឹងជំនាញដល់យុវជន ហើយជាគោល នយោបាយរបស់ក្រសួងអប់រំ គឺផ្តោតទៅលើការពង្រឹងគុណភាពអប់រំ ដោយសង្កត់ធ្ងន់លើការតម្លើង ប្រាក់ខែគ្រូបង្រៀនជាអាទិភាព នៃយុទ្ធសាស្ត្រពង្រឹង គុណភាពអប់រំ និងការពង្រឹងសមត្ថភាព។
ជាង នេះទៀតការចុះធ្វើអធិការកិច្ច ពង្រឹងការគ្រប់គ្រងដឹកនាំ ទៅតាមមុខវិជ្ជាការវាយតម្លៃលើសកម្មភាព របស់គ្រូ លទ្ធផលសិក្សារបស់សិស្ស ការចូលរួមរបស់មាតាបិតា និងសមាគម នេះជាសសរស្តម្ភ ទី២ នៃការអប់រំ ហើយជាសសរស្តម្ភ បន្ទាប់នៃការកែលំអ វិស័យអប់រំ ពីការកែលំអ សៀវភៅគោល នៃការ សិក្សាឲ្យមានស្តង់ដាល្អប្រសើរ ក៏ដូចជាការកែទម្រង់ ឧត្តមសិក្សា ពិសេស ការពង្រឹងគុណភាព នៃការ អប់រំគឺចាប់តាំងពីថ្នាក់មត្តេយ្យសិក្សាឡើងទៅនេះទើបធានាបានទាំង បរិមាណ និងគុណភាព ៕