ក្រចេះ ៖សមត្ថកិច្ចនគរបាលបានឃាត់ខ្លួនបុរស២នាក់ពីបទលួចម៉ូតូមួយគ្រឿងយកទៅលាក់ទុកនៅក្បែរចម្ការប្រជាពលរដ្ឋចម្ងាយប្រមាណ២.០០០ម៉ែត្រពីកន្លែងធ្វើសកម្មភាព។ហេតុការណ៍ខ្លួនជនសង្ស័យបានធ្វើឡើងនៅចំណុចចម្ការដំទ្បូងខាងត្បូងភូមិអញ្ចាញឃុំស្រែចារ ស្រុកស្នួលខេត្តក្រចេះកាលពីថ្ងៃទី ៣១ខែសីហាឆ្នាំ២០១៧។
មន្ត្រីសមត្ថកិច្ចបានឲ្យដឹងថាជនសង្ស័យឈ្មោះ យ៉ាន់ អុល ភេទប្រុស អាយុ៣២ឆ្នាំ ជាតិខ្មែរនិងឈ្មោះម៉ៅ រីម ហៅ ខ្និក ភេទប្រុស អាយុ២៨ឆ្នាំ ជាតិខ្មែរអ្នកទាំងពីរ រស់នៅភូមិប្រិយ៍ ឃុំទៀក ស្រុកមេមត់ ខេត្តត្បូងឃ្មុំ ។ជននេះបានធ្វើ សកម្មភាព លួចម៉ូតូរបស់ជនរងគ្រោះឈ្មោះ ភឿន ភា ភេទប្រុស អាយុ៣៧ឆ្នាំ ជាតិខ្មែរ រស់នៅស្រុកស្នួល ខេត្តក្រចេះ។
ម៉ូតូនោះម៉ាក ណេវ ពណ៌ក្រហម សេរីឆ្នាំ២០១២ ត្រូវជនសង្ស័យលួចរួចជិះយកទៅលាក់ទុកនៅក្បែរចម្ការប្រជាពលរដ្ឋ ចម្ងាយប្រមាណ ២.០០០ម៉ែត្រពីកន្លែងលួច។ ភ្លាមៗនោះម្ចាស់ម៉ូតូនិងប្រជាពលរដ្ឋរួមជាមួយកម្លាំងប៉ុស្តិ៍នគរបាលរដ្ឋបាលស្រែចារ បានតាមររកឃើញម៉ូតូវិញ នៅវេលាថ្ងៃត្រង់ថ្ងៃដដែល។
បន្ទាប់ពីនោះកម្លាំងសមត្ថកិច្ចបានបន្តតាមរកមុខសញ្ញាឈានដល់ការឃាត់ខ្លួន ជនសង្ស័យ២ នាក់បានខណៈពេលដែរជនសង្ស័យយកម៉ូតូលាក់ទុករួចដើរត្រទ្បប់មកក្នុងភូមិវិញហើយកម្លាំងក៏នាំខ្លួនមកអធិការដ្ឋាននគរបាលស្រុកតែម្តង ។ តាមចម្លើយរបស់ជនសង្ស័យទាំង២នាក់បានឱ្យដឹងថា: ខ្លួនពិតជាបានលួចយកម៉ូតូរបស់ជនរងគ្រោះឈ្មោះ ភឿន ភា ពិតប្រាកដមែន ។
បច្ចុប្បន្នជនសង្ស័យទាំង២នាក់ត្រូវបានឃុំខ្លួនជាបណ្នោះអាសន្ននៅអធិការដ្ឋាននគរបាលស្រុកស្នួល ដើម្បីកសាងសំណុំបញ្ជូនទៅការិយាល័យជំនាញ ចាក់ការបន្ត៕
