ប្រទេសថៃ ៖ មានសេចក្តីរាយការណ៍ថា លោក ស្រីយីងឡាក់ ស៊ីណាវ៉ាត្រាអតីនាយករដ្ឋមន្ត្រីថៃគេចចេញពីប្រទេសថៃបាត់ហើយ។ពតិមាននេះបានកើតឡើងក្រោយពេលដែលតុលាការកំពូលរបស់ថៃនៅថ្ងៃទី២៥សីហា ចេញដីកាឲ្យចាប់ខ្លួនលោកស្រីយីងឡាក់ ដោយសារលោកស្រីមិនទៅកាន់តុលាការដើម្បីស្តាប់ការប្រកាសសាលក្រមបើទោះជា មេធាវី របស់លោកស្រីបញ្ជាក់ថា លោកស្រី ឈឺមិនអាចមកបាន ។
នាយករដ្ឋមន្ត្រីដេលកើតចេញពីរដ្ឋប្រហារយោធាទម្លាក់រដ្ឋាភិបាលលោកស្រី យីងឡាក់ លោក ប្រាយូទ្ធចាន់អូចា បានបញ្ជាឲ្យទាហ៊ានតាមករកលោកស្រីយីងឡាក់ តែមិនទាន់ឃើញលោកស្រីឡើយ។ នាយករដ្ឋមន្ត្រីថៃលោកប្រាយុទ្ធ ចាន់អូចា និយាយទៅកាន់ក្រុមអ្នកសារព័ត៌មានថា «ខ្ញុំទើបតែទទួលបានព័ត៌មានស្តីពីអវត្តមានរបស់លោកស្រីយីងឡាក់នៅក្នុងតុលាការ។
ខ្ញុំបានចេញបញ្ជាឲ្យមន្ត្រីគ្រប់គ្រងតាមច្រកព្រំដែនធ្វើការត្រួតពិនិត្យឲ្យ បានល្អិតល្អន់» ។ មតិសាធារណៈបានលើកឡើងថា លោក ស្រីយីងឡាក់អាចចាកចេញពីប្រទេសដូច អ្វីដែលសារព័ត៌មានបានចុះផ្សាយ។
តុលាការកំពូលថៃបានចេញដីកាចាប់ខ្លួនអតីតនាយករដ្ឋមន្ត្រី លោកស្រី យីងឡាក់ ប៉ុន្តែបែរជាពន្យារ ពេលប្រកាសសាលក្រមទៅលើការចោទប្រកាន់ប្រឆាំងនឹងលោកស្រីថាធ្វើឲ្យរដ្ឋខាតលុយ នៅក្នុងកម្មវិធីជួយទិញស្រូវពី កសិករទៅដល់ថ្ងៃទី២៧ ខែកញ្ញា។ លោកស្រី យីងឡាក់ នឹងជាប់ពន្ធនាគារ ១០ឆ្នាំ បើសិនជាសាលក្រមតុលាការគាំទ្រ ការចោទប្រកាន់ប្អូនស្រីបង្កើតលោក ថាក់ ស៊ីន រូបនេះមែននោះ ។
រដ្ឋាភិបាលយោធាថៃបច្ចុប្បន្នបានចោទប្រកាន់លោកស្រីយីងឡាក់ថា បានធ្វើឱ្យខាតបង់ថវិការដ្ឋដល់ទៅ៨ពាន់លានដុល្លារ ដោយសារតែកម្មវិធីប្រមូលទិញស្រូវពី កសិករថៃក្នុងតម្លៃថ្លៃក៏ប៉ុន្តែអតីតនាយក រដ្ឋមន្ត្រីរូបនេះបានដិសេធការចោទប្រកាន់ទាំងឡាយដោយអះអាងថា វាគ្រាន់តែ ចេតនានយោបាយចង់ធ្វើបាបលោកស្រីតែប៉ុណ្ណោះ។
ការចំណាយប្រាក់ដើម្បីជួយទិញស្រូវអង្កររបស់ពលរដ្ឋក្នុងតម្លៃថ្លៃមិនមែនជា កំហុសរបស់លោកស្រីយីងឡាក់ឡើយ គឺមុនពេលអនុវត្តត្រូវឆ្លងកាត់ការសម្រេចពី រដ្ឋសភាជាមុន ។
ទាំងនោះហើយជាហេតុដែលនាំឲ្យលោកស្រីយីងឡាក់មិនព្រមទទួលយកការចោទប្រកាន់ខាងលើ ដោយមិនត្រូវទម្លាក់កំហុសទាំងប៉ុន្មានមកលើលោកស្រីតែម្នាក់ឯងនោះឡើយ។ ដោយឡែក នៅព្រឹកថ្ងៃទី២៥ សីហា មុនការប្រកាស សាលក្រមនេះដែរ ក្រុមអ្នកគាំទ្រលោកស្រីយីងឡាក់ បានប្រមូលផ្ដុំគ្នានៅខាងមុខ តុលាការកំពូល ខណៈប៉ូលិស៤.០០០ នាក់ត្រូវបានគេដាក់ពង្រាយ បើទោះជាលោកស្រីបានអំពាវនាវឱ្យអ្នកគ្រាំទ្ររបស់ខ្លួនកុំប្រមូលផ្ដុំគ្នា ឬក៏ធ្វើដំណើរមកកាន់ ទីក្រុងបាងកកដើម្បីតវ៉ាក៏ដោយ ។
មិនទាន់មានរបាយការណ៍ស្តីពីការទៅឆែកឆេរផ្ទះរបស់លោកស្រីយីងឡាក់ នៅឡើយទេថា តើលោកស្រីបាត់ខ្លួនចេញពីផ្ទះមែន ឬយ៉ាងណា។ បើពិតជាមិនឃើញ នៅផ្ទះ ឬនៅមន្ទីរពេទ្យដូចការលើកឡើងនោះ គឺលោកស្រីពិតជាបានគេចខ្លួនទៅក្រៅប្រទេសមែនហើយ ។ មានការវាយតម្លៃថា រដ្ឋាភិបាល ថៃនឹងមិនអនុញ្ញាតឲ្យត្រកូលស៊ីណាវ៉ាត្រាមាន ក្នុងឆាកនយោបាយថៃទៀតឡើយ ដោយ សារតែការដឹកនាំរបស់ត្រកូលស៊ីណាវ៉ាត្រាកន្លងមក បានធ្វើឲ្យប៉ះពាល់ដល់ក្រុមអភិជននៅក្នុងប្រទេសថៃ ។
ប្រវត្តិសង្ខេបរបស់លោកស្រី យីងឡាក់ លោកស្រី យីងឡាក់ បានឡើងកាន់តំណែងជានាយករដ្ឋមន្ត្រីស្ត្រីដំបូង នៅរាជាណាចក្រថៃ នៅពេលលោកស្រីដឹកនាំគណបក្សភឿថៃ ទទួលបានជ័យជម្នះនៅក្នុងការបោះឆ្នោតសភាក្នុងខែកក្កដា ឆ្នាំ២០១១ បន្ទាប់ពីប្រទេសថៃបានធ្លាក់ក្នុងវិបត្តិនយោបាយដ៏បង្ហូរឈាមមួយ នៅដើមឆ្នាំ២០១០ ដែលបណ្ដាលឲ្យមនុស្សយ៉ាងតិចណាស់ជិត១០០នាក់បានស្លាប់ និងជាង១០០០នាក់បានរងរបួស។
ក្នុងស្ថានភាពកើតចេញពីគ្រួសារពាណិជ្ជករ ដែលមានប្រាក់ស្ដុកស្ដម្ភ លោកស្រីយីងឡាក់ គឺជាកូនស្រីពៅទី៩ នៃត្រកូលស៊ីណាវ៉ាត្រា។ លោកស្រីបច្ចុប្បន្ននេះ មានអាយុ៥០ឆ្នាំ ហើយមានកូនប្រុសម្នាក់គត់។
លោកស្រី ជាប់បរិញ្ញាប័ត្រវិទ្យាសាស្ត្រនយោបាយ និងអនុបណ្ឌិតនៅសាកលវិទ្យាល័យរដ្ឋ Kentucky សហរដ្ឋអាមេរិក។
លោកស្រី បានហក់ចូលក្នុងនយោបាយរាជាណាចក្រថៃភ្លាមៗ បន្ទាប់ពីបងប្រុសរបស់លោកស្រី លោកថាក់ស៊ីន ត្រូវបានបណ្ដេញចេញពីអំណាចដោយរដ្ឋប្រហារខែកញ្ញា ឆ្នាំ២០០៦។នៅពេលដែលស្ថានភាពនយោបាយនៅទីក្រុងបាងកក នៅឆ្នាំ២០១០ ឡើងកម្តៅយ៉ាងខ្លាំង លោកស្រីយីងឡាក់ ត្រូវបានគណបក្សភឿថៃ តែងតាំងជាប្រធានគណបក្ស ហើយជាបេក្ខជននាយករដ្ឋមន្ត្រីរបស់គណបក្សនេះ។
ក្នុងឋានៈជាប្រធានគណបក្ស លោកស្រីយីងឡាក់ បានស្ដារមុខមាត់បងប្រុសរបស់លោកស្រីឡើងវិញ ដោយលោកស្រី បានបន្តកាន់តំណែងជានាយករដ្ឋមន្ត្រីស្ត្រីដំបូងនៃរាជាណាចក្រថៃឆ្នាំ២០១១។ប៉ុន្តែនៅឆ្នាំ២០១៤ លោកស្រី យីងឡាក់ បានរបូតអំណាចជានាយករដ្ឋមន្ត្រីស្ត្រីដំបូងនៃរាជាណាចក្រថៃ នៅក្រោមអំណាចរបស់តុលាការរដ្ឋធម្មនុញ្ញ ដែលបានសម្រេចជាឯកច្ឆន្ទបណ្ដេញលោកស្រីចេញពីអំណាច នៅថ្ងៃនេះ នៅក្រោមបទចោទលោកស្រី ពីបទបំពានអំណាចរដ្ឋ នៅពេលដែលលោកស្រី បានផ្ទេរតំណែងប្រធានក្រុមប្រឹក្សាសន្តិសុខជាតិថៃម្នាក់ ដោយមិនឆ្លងកាត់ការអនុម័តពីព្រឹទ្ធសភា។ តែយ៉ាងហោចណាស់ លោកស្រី បានដឹកនាំរាជរដ្ឋាភិបាលថៃបានជិតបីឆ្នាំ មុននឹងលោកស្រី ត្រូវបានបណ្ដេញចេញពីអំណាចនៅថ្ងៃនេះ។
មានកត្តាមួយចំនួន ដែលធ្វើឲ្យលោកស្រីយិងឡាក់ស្ថិតក្នុងស្ថានភាពប្រឈមមកដល់ពេលនេះ៖
ទី១. កើតចេញពីការតាំងចិត្តរបស់លោកស្រី និងគណបក្សភឿថៃ ធ្វើសេចក្ដីព្រៀងច្បាប់លើកលែងទោសបងប្រុសរបស់ខ្លួន គឺលោកថាក់ស៊ីន ដែលករណីនេះ ធ្វើឲ្យក្រុមប្រឆាំង ដើរធ្វើបាតុកម្មតាមដងផ្លូវ ដើម្បីបង្ខំឲ្យទុកសេចក្ដីព្រៀងច្បាប់នេះជាមោឃៈ។
ទី២. ករណីនេះបានបណ្ដាលឲ្យក្រុមអាវលឿង ឬគណបក្សប្រឆាំងរបស់អាភីស៊ីត ងើបឡើងតវ៉ា បណ្ដេញលោកស្រីចេញពីអំណាច ដោយចោទថា បងលោកស្រីគឺលោកថាក់ស៊ីន គឺជាអ្នកនៅពីក្រោយនៃការផ្ដួចផ្ដើមគំនិត លើកលែងទោសដ៏ចម្រូងចម្រាស់នេះ។
ទី៣. ផ្ដើមចេញពីហេតុផលនេះ ធ្វើឲ្យលោកស្រីសម្រេចរំលាយរដ្ឋសភា ខណៈដែលតំណាងរាស្ត្រគណបក្សប្រជាធិបតេយ្យរបស់លោកអាភីស៊ីត ជិត២០០នាក់ បានបោះបង់សុពលភាពរបស់ខ្លួនចោល ហើយពេលនោះធ្វើឲ្យសភាថៃទាំងមូល ដែលមានសមាជិក៥០០រូប ដំណើរការប្រជុំលែងបាន។
លោកស្រីយីងឡាក់ ប្រញាប់រំលាយរដ្ឋសភាជាបន្ទាន់ ហើយប្រកាសបោះឆ្នោតនៅថ្ងៃទី២ ខែកុម្ភៈ ឆ្នាំ២០១៤ តែជាអកុសលលទ្ធផលបោះឆ្នោតដែលមិនមានបក្សប្រឆាំងចូលរួមប្រកួតនោះ ត្រូវទុកជាមោឃៈ បើទោះជាលោកស្រីបានឈ្នះយ៉ាងភ្លូកទឹកភ្លូកដី ក្នុងការបោះឆ្នោតនោះក៏ដោយ។
លោកស្រី នៅមានការប្រឈមខាងផ្លូវច្បាប់ចំនួន២ គឺករណីលោកស្រីបណ្ដោយឲ្យមានអំពើពុករលួយ នៅក្នុងគម្រោងទិញស្រូវ និងទីពីរករណីលោកស្រីត្រូវបានចោទពីបទរំលោភរដ្ឋធម្មនុញ្ញ ដែលលោកស្រីប្រើប្រាស់តួនាទីរបស់ខ្លួនជានាយករដ្ឋមន្ត្រីចាំផ្ទះ ដកហូតតំណែងប្រធានសន្តិសុខជាតិ ដោយភាពចម្រូងចម្រាស់។
ពេលនេះជោគវាសនារបស់លោកស្រីយីងឡាក់ ស្ថិតក្នុងស្ថានភាពមួយដែលអ្នកវិភាគមើលឃើញថា លោកស្រីអាចនឹងបាត់បង់ឱកាសឈរជាបេក្ខជននាយករដ្ឋមន្ត្រីទៀតផង សម្រាប់ការបោះឆ្នោត ខាងមុខនេះ ព្រោះតែលោកស្រីត្រូវប្រឈមមុខនឹងការចោទប្រកាន់ ករណីព្រហ្មទណ្ឌ ដែលនាំឲ្យលោកស្រីត្រូវបានឃាឃាំង ធ្វើនយោបាយរយៈពេល៥ទៅ១០ឆ្នាំ។
