ភ្នំពេញ ៖ ស្ថានទូតអាមេរិកប្រចាំនៅកម្ពុជាបានទទួលរងការព្រមានថានឹងមានបាតុកម្មប្រឆាំងបើនៅតែលូកដៃចូលកិច្ចការកម្ពុជា។ការព្រមាននេះបានកើតឡើងក្រោយពេលដែលក្រសួងការបរទេសកម្ពុជានៅថ្ងៃទី២៣សីហាបានប្រកាសបិទអង្គការវិទ្យាស្ថានជាតិប្រជាធិបតេយ្យអាមេរិក(NDI)និងបណ្តេញបុគ្គលឹកអង្គការនេះចេញឲ្យផុតពីស្រុកខ្មែរក្នុងរយៈ៧ថ្ងៃ ហើយស្ថានទូតអាមេរិកនៅស្រុកខ្មែរចេញសំណេរប្រតិកម្មកាន់ជើង។
ប្រតិកម្មរបស់ស្ថានទូតអាមេរិកប្រចាំនៅភ្នំពេញត្រូវបានបង្ហោះក្នុងហ្វេសប៊ុកស្ថានទូតដែលមានចំណងជើងថា «តើប្រទេសកម្ពុជាមានការប្តេជ្ញាចិត្តចំពោះលទ្ធិប្រជាធិបតេយ្យ ដែរឬទេ? អ្នកជាអ្នកសម្រេចិត្ត» ឬ «Is Cambodia committed to democracy? You decide» ។
លោក ប៉ាន់ ខែមប៊ុនថនប្រធានក្រុមសម្ពន្ធយុវជនស្រលាញ់សន្តិភាពដែលធ្លាប់បានដឹកនាំធ្វើបាតុកម្មដោយជោគជ័យទម្លាក់លោកកឹមសុខាបច្ចុប្បជាប្រធានគណបក្សសង្គ្រោះជាតិចេញពីអនុប្រធានរដ្ឋសភា បានប្រាប់កាសែតទាំងកណ្តាលអាធ្រាត ថ្ងៃទី២៣សីហាឈានចូលថ្ងៃទី២៤ ខែសីហា ឆ្នាំ២០១៧ថា «ជម្រាបទៅស្ថានទូតអាមេរិក ប្រចាំនៅកម្ពុជា, យើងជាក្រុមសម្ពន្ធយុវជនស្រលាញ់សន្តិភាព សូមបញ្ជាក់ថា បានជាយើងដាក់ថា ស្រលាញ់សន្តិភាព ព្រោះតែយើងមិនចង់បាត់បង់សន្តិភាពដែលកំពុងមានបច្ចុប្បន្ន សូមរំព្ញកថា ក្នុងទំព័រប្រវត្តិសាស្ត្រខ្មែរអាមេរិកធ្លាប់បានបង្កវិនាសកម្ម មកលើទឹកដី១នេះម្តងរួចមកហើយ កាលពីទសវត្ស៧០ រណ្តៅគ្រាប់នៅបន្សល់ទុកដល់បច្ចុប្បន្ននៅឡើយ ហេតុដូច្នេះហើយសូមស្ថានទូតអាមេរិកកុំលូកដៃ រហូតហួសព្រំដែនភារកិច្ចចំពោះការងាដឹកនាំរបស់កម្ពុជា បើសិនជាស្ថានទូតអាមេរិកនៅតែបន្តលូកដៃមិនបញ្ឈប់នោះទេ សម្ពន្ធយុវជនស្រលាញ់សន្តិភាព គ្រប់សាខាទូទាំងប្រទេស នឹងប្រើសិទ្ធស្របច្បាប់ ដើម្បីបង្ហាញពីទឹកចិត្តស្រលាញ់សន្តិភាព ការពារសន្តិភាពរបស់កម្ពុជា នៅចំពោះមុខស្ថានទូតអាមេរិក ជាក់ជាមិនខាន»។
នៅព្រឹកថ្ងៃទី២៤ ខែសីហា ឆ្នាំ២០១៧នេះ លោក គឹម សន្តិភាព អ្នកនាំពាក្យក្រសួងយុត្តិធម៌បានថ្លែងប្រតិកម្មទៅកាន់ស្ថានទូតអាមេរិកផងដែរថា៖ «បើគ្មានការគោរពច្បាប់ សូមកុំនិយាយពីប្រជាធិបតេយ្យ! អ្នកនៅលើទឹកដីកម្ពុជា អ្នកត្រូវតែគោរពច្បាប់កម្ពុជា! សូមកុំភ្លេចថា កម្ពុជាជារដ្ឋអធិបតេយ្យ! សមាគម ឬអង្គការមិនមែនរដ្ឋាភិបាលបរទេស អាចធ្វើសកម្មភាពបានលុះណាតែមានការចុះបញ្ជីជាមុន ហើយការចុះបញ្ជីនេះត្រូវធ្វើនៅក្រសួងការបរទេស មិនមែនជាមួយស្ថាប័ន ផ្សេងឡើយ យោងតាមច្បាប់ NGO កម្ពុជា!»។
មន្ត្រីជាន់ខ្ពស់រាជរដ្ឋាភិបាល បានលួចទម្លាយប្រាប់កាសែតថា ការធ្វើបាតុកម្មតវ៉ាប្រឆាំង នឹងស្ថានទូតអាមេរិក អាចនឹងកើតមានឡើងនៅភ្នំពេញដោយក្រុមអ្នកជាតិនិយម និងអ្នកគាំទ្ររាជរដ្ឋាភិបាលដូចកាលទស្សវត្ស៦០ ព្រោះតែទង្វើរបស់អាមេរិកលូកលាន់ចូលដែនអធិបតេយ្យរបស់កម្ពុជា។
សូមបញ្ជាក់ដែរថា កាលពីអំឡុងឆ្នាំ១៩៦៨អ្នកដែលគាំទ្រសម្តេចព្រះនរោត្តមសីហនុដែលចូលចិត្តប្រទេសចិនបាននាំគ្នាធ្វើបាតុកម្មបណ្តេញស្ថានទូតអាមេរិកចេញពីស្រុកខ្មែរដោយចោទថាស្ថានទូតអាមេរិកជំនាន់នោះគាំទ្រលោកស៊ឹមវ៉ាតំណាងរាស្ត្រគណបក្សប្រឆាំង(គណបក្សប្រជាធិបតេយ្យ)។ក្រោយមកក៏កើតរដ្ឋប្រហារនិងសង្គ្រាមទៅ។
សេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ ចុះថថ្ងៃទី២៣ ខែសីហាបានបញ្ជាក់ថា មូលដ្ឋានដែលឈានដល់ការសម្រេចឱ្យបិទវិទ្យាស្ថាននេះ គឺអនុលោមទៅតាមច្បាប់ស្តីពីសមាគមនិងអង្គការ មិនមែនរដ្ឋាភិបាលនៅកម្ពុជា។ ក្រសួងអះអាងថា ចាប់តាំងពីច្បាប់នេះ ចូលជាធរមាន កាលពីខែសីហា ឆ្នាំ២០១៥ អង្គការ NDI បានធ្វើប្រតិបត្តិការ នៅក្នុងប្រទេសកម្ពុជា ដោយមិនបានចុះបញ្ជីជាមួយក្រសួងការបរទេស និងសហប្រតិបត្តិការអន្តរជាតិ រហូតដល់អង្គការនេះបានដាក់ពាក្យស្នើចុះបញ្ជីនៅថ្ងៃទី២១ ខែមិថុនា ឆ្នាំ២០១៦។
អំឡុងពេលរង់ចាំការសម្រេចរបស់ក្រសួង លើពាក្យស្នើសុំនេះ អង្គការ NDI នៅតែបន្តសកម្មភាពរបស់ខ្លួនដោយ គ្មានគិតគូរអំពីការគោរពច្បាប់សោះឡើយ។ប៉ុន្តែអង្គការ NDIបានឲ្យដឹងថាNDIបានដាក់ពាក្យសុំនៅក្រសួងការបរទេសកម្ពុជាតាំងពីខែមិថុនាឆ្នាំ២០១៦មកម្លេះតែក្រសួងការទេសមិនតបនិងមិនពន្យល់ដែលផ្ទុយពីការកំណត់ត្រឹមតែ៤០ថ្ងៃ ៕
