បាងកក ៖ សាលក្រមមួយដែលរង់ចាំជាយូរមកហើយដើម្បីកាត់ទោសអតីតនាយករដ្ឋមន្ត្រីថៃលោកស្រីយីងឡាក់ស៊ីណាវ៉ាត្រានៅក្នុងសប្តាហ៍នេះអាចបង្កឲ្យមានភាពតានតឹងហើយទំនងជាមានផលប៉ះពាល់យ៉ាងខ្លាំងនៅក្នុងប្រទេសនេះដែលបែកបាក់គ្នា ខាងនយោបាយ។
យោធាកំពុងកាន់អំណាចបាននិយាយថា អ្នកគាំទ្រលោកស្រីយីងឡាក់ជាង៣,០០០នាក់អាចបង្ហាញខ្លួននៅឯតុលាការនៅថ្ងៃសុក្រនេះនៅក្នុងអ្វីដែលជាការជួបជុំនយោបាយដ៏ធំបំផុតមួយចាប់តាំងពីរដ្ឋាភិបាលរបស់លោកស្រីត្រូវបានបណ្តេញចេញនៅក្នុងរដ្ឋប្រហារឆ្នាំ២០១៤។
ប៉ូលិសរាប់ពាន់នាក់នឹងត្រៀមលក្ខណៈដើម្បីដោះស្រាយបញ្ហាដែលបានក្លាយទៅជាចំណុចសំខាន់នៃនយោបាយថៃក្នុងរយៈពេលមួយទសវត្សរឺច្រើនជាងនេះកន្លងមក។
លោកស្រីយីងឡាក់ត្រូវបានគេចោទប្រកាន់ពីបទធ្វេសប្រហែសក្នុងការដោះស្រាយបញ្ហាឧបត្ថម្ភធនស្រូវទឹកប្រាក់រាប់ពាន់លានដុល្លារដែលរដ្ឋាភិបាលទិញស្រូវពីកសិករក្នុងតម្លៃខ្ពស់។បញ្ហានោះបាននាំឲ្យមានស្តុកគ្រាប់ធញ្ញជាតិដែលខូចខាត បង្ខូចទ្រង់ទ្រាយតម្លៃទីផ្សារពិភពលោកនិងធ្វើឲ្យប្រទេសថៃបាត់បង់តំណែងជាអ្នកនាំចេញកំពូលរបស់ពិភពលោក។ រដ្ឋាភិបាលបាននិយាយថា ការខាតបង់គឺស្មើនឹងទឹកប្រាក់៨ពាន់លានដុល្លារអាមេរិក។
លោកស្រីយីងឡាក់បានបដិសេធការធ្វើខុសហើយបាននិយាយថាលោកស្រីគឺជាជនរងគ្រោះនៃការបៀតបៀននយោបាយ។ លោកស្រីនឹងត្រូវប្រឈមមុខនឹងការជាប់ពន្ធនាគាររហូតដល់ទៅ១០ឆ្នាំប្រសិនបើរកឃើញថាមានកំហុសឆ្គង។ក្រុមសកម្មជនគណបក្សប្រឆាំងបាននិយាយថា សាលក្រមនេះនឹងជំរុញឲ្យមានកំហឹងប្រឆាំង រដ្ឋាភិបាលហើយអាចបង្កឲ្យមានការតវ៉ាតូចៗប្រឆាំងនឹងការហាមឃាត់របស់រដ្ឋាភិបាលជាពិសេសនៅភាគខាងជើងនិងភាគឦសានប្រទេសដែលមានការគាំទ្រដល់ត្រកូលស៊ីណាវ៉ាត្រា។
អតីតមហាសេដ្ឋីទូរគមនាគមន៍លោកថាក់ស៊ីនស៊ីណាវ៉ាត្រាដែលត្រូវបានផ្ដួលរំលំនៅក្នុងរដ្ឋប្រហារឆ្នាំ២០០៦និងរស់នៅស្ងៀមស្ងាត់ក្នុងការនិរទេសខ្លួនដើម្បីជៀសវាងការកាត់ទោសឆ្នាំ២០០៨ចំពោះអំពើពុករលួយដែលលោកបានលើកឡើងថាជាហេតុផលនយោបាយគឺមិនបានធ្វើអត្ថាធិប្បាយជាសាធារណៈទេលើករណីរបស់ប្អូនស្រីគាត់។
លោក Trakool Meechai អតីតសាស្ត្រាចារ្យវិទ្យាសាស្ត្រនយោបាយនៃសាកលវិទ្យាល័យ Chulalongkorn ក្នុងទីក្រុងបាងកកបាននិយាយថា ការតវ៉ាជាបន្តបន្ទាប់ក្នុងការឆ្លើយតបទៅនឹងការផ្តន្ទាទោសលោកស្រីយីងឡាក់ហាក់ដូចជាមិនអាចធ្វើទៅរួចទេដោយសារតែក្រុមយោធាបានគ្រប់គ្រង៕
