ភ្នំពេញ៖ លក្ខខ័ណ្ឌ០៥ចំណុច ដើម្បីក្លាយជាសមាជិក នៃ សមាគម ម្រេច កម្ពុជា គុណភាព តម្លៃ ការវេចខ្ចប់ ឈ្មោះម៉ាក់ និងការផលិតឲ្យតាមស្ដង់ដារទីផ្សារអន្ដរជាតិការដាំដុះ ដំណាំម្រេចនៅក្នុងប្រទេសកម្ពុជា គឺជាប្រពៃណីដែលមានអាយុកាលប្រមាណ ៧០០ ឆ្នាំ មកហើយ។ ខេត្តកំពង់ចាម និងខេត្តកំពត គឺជាតំបន់ចម្ការម្រេចកម្ពុជាដ៏សំខាន់ជាងគេបំផុត ។ ដោយឡែកនៅឆ្នាំ ២០១៦ គឺជាជោគជ័យដ៏ធំមួយសម្រាប់ម្រេចកំពត ដោយសារផលិតផលនេះ ត្រូវបានចុះបញ្ជីនៅលើទីផ្សារ សហភាពអឺរ៉ុបជាផលិតផលសម្គាល់ភូមិសាស្ត្រដែល ត្រូវបានការពារ (PGI)។
លោកស្រីហោ ម៉ាលីន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ឲ្យដឹងបែបនេះ ក្នុងកិច្ចផ្ដល់បទសម្ភាសន៏ជាមួយអ្នកសារព័ត៌មាន កាលពីថ្ងៃទី២៤ សីហានេះថា៖ គុណភាពម្រេចកំពត ត្រូវបានចាត់ចំណាត់ថ្នាក់ល្អដាច់គេនៅទូទាំងពិភពលោក។ នៅឆ្នាំ ២០១៥ ខេត្តកំពតផលិតបានម្រេចកំពតចំនួន៦០តោន ដែលក្នុងនេះ ៧០ ភាគរយត្រូវបាននាំចេញ ភាគច្រើនបំផុត ទៅកាន់ទីផ្សារសហភាពអឺរ៉ុប សហរដ្ឋអាមេរិក និងជប៉ុន។
លោកស្រីបន្ដថា៖ ការចុះបញ្ជីជាផលិតផលសម្គាល់ភូមិសាស្ត្រដែលត្រូវបានការ ពារ បានបន្ថែមគុណតម្លៃទៅលើកេរ្តិ៍ឈ្មោះជា ប្រពៃណីរបស់ម្រេចកំពត។ វាក៏ជួយប្រយុទ្ធប្រឆាំងនឹងផលិតផលក្លែងក្លាយនិងបន្លំម៉ាកសញ្ញា ដែលកំពុងចរាចរនៅក្នុងទីផ្សារសហភាពអឺរ៉ុប និងជួយលើកកម្ពស់លក្ខណៈ សម្បត្តិប្រកួតប្រជែងនៃផលិតផលម្រេចកំពតនៅក្នុងទីផ្សារសហភាពអឺរ៉ុប កម្ពុជា និងនៅលើទីផ្សារផ្សេងទៀត ពីព្រោះផលិតផលនេះ អាចបិទនិមិត្តសញ្ញាគុណភាព PGI ចាប់ពីពេលនេះតទៅ។
ស្ថិតនៅចម្ងាយប្រមាណ៧៥ គីឡូម៉ែត្រខាងត្បូងក្រុងកំពត គឺភូមិអង្គរជ័យ ឃុំដំណាក់កន្ទួតត្បូង ស្រុកកំពង់ត្រាច មានប្រជាជនរស់នៅជាង ៧០០០០ នាក់។ នៅឆ្នាំ ២០០៨ តំបន់នេះលក់ម្រេចបានតែ ៤ តោនប៉ុណ្ណោះ។ ប៉ុន្តែ ក្នុងឆ្នាំ ២០១៦ បន្ទាប់ពីការចុះបញ្ជី PGI រួចមក ការលក់ គឺកើនឡើងដល់ទៅជាង ៦០ តោន ខណៈដែលតម្លៃនៃប្រភេទម្រេច ពណ៌ផ្សេងៗគ្នាបានកើនឡើងប្រហាក់ប្រហែលទ្វេដង៕