ភ្នំពេញ៖ សម្តេចតេជោ ហ៊ុន សែននាយករដ្ឋមន្ត្រីនៅថ្ងៃទី២៣ ខែសីហា ឆ្នាំ២០១៧ បានថ្លែងថា សម្តេច នឹងបន្តអនុវត្តន៍ «៣សុំ» ដើម្បីធ្វើជាគោលនយោបាយប្រកួតប្រជែងការបោះឆ្នោតនៅឆ្នាំ២០១៨ខាងមុខនេះ ។ ក្នុងឱកាសជួបសំណេះសំណាលជាមួយកម្មករ កម្មការនីជាង១ម៉ឺននាក់ នៅតំបន់សេដ្ឋកិច្ចពិសេសភ្នំពេញ ដែលស្ថិតនៅក្នុងសង្កាត់កំបូល ខណ្ឌពោធិ៍សែនជ័យ រាជធានីភ្នំពេញសម្តេចតេជោ ហ៊ុន សែនដែលជាប្រធានគនបក្សប្រជាចនកម្ពុជា បានបញ្ជាក់ថា កម្មករ កម្មការិនី ជាអ្នកត្រិះរិះពិចារណាខ្លួនឯងចុះពីអត្ថប្រយោជន៍របស់គោលនយោបាយ «៣សុំ» របស់សម្តេច។ គោលនយោបាយ «៣សុំ» របស់សម្តេចតេជោ រួមមាន៖ ទី១- សុំឱ្យបរទេសផ្តល់ជំនួយមកកម្ពុជា ទី២-សុំឱ្យបរទេសមកវិនិយោគនៅកម្ពុជា និងទី៣- សុំឱ្យបរទេសជួយទិញទំនិញពីកម្ពុជា។
ប្រមុខរាជរដ្ឋាភិបាលកម្ពុជា បានបញ្ជាក់ថា ការរីកចម្រើនកន្លងមករបស់កម្ពុជាដែលចាប់តាំងពីបាតដៃទទេរហូតមកដល់មានអ្វីៗដូចសព្វថ្ងៃនេះ គ្មានបាតដៃរបស់គណបក្សប្រឆាំងនោះឡើយ។ គណបក្សប្រឆាំង មិនត្រឹមតែមិនជួយនោះទេ ថែមទាំងរារាំងការអភិវឌ្ឍជាតិក្រោមការដឹកនាំរបស់សម្តេច ដោយអំពាវនាវដល់បរទេស «៣កុំ» ដូចជា៖ កុំផ្តល់ជំនួយដល់កម្ពុជា កុំមកវិនិយោគនៅកម្ពុជា កុំទិញទំនិញពីកម្ពុជា៕