ភ្នំពេញ៖ លោក សឹង គិរី សមាជិកគណៈកម្មាធិការនាយកនៃគណបក្សខ្មែររួបរួមជាតិ និងជា ត្រូវបានជ្រើសតាំងឲ្យធ្វើជាប្រធានស្តីទី ដើម្បីដឹកនាំគណបក្សខ្មែររួបរួមជាតិបណ្តោះអាសន្នក្នុងពេលដែលលោកញឹកប៊ុនឆៃកំពុងជាប់ឃុំឃាំងក្នុងពន្ធនាគារក្រោមបទចោទថាពាកពន្ធ័រឿងគ្រឿងញៀន។ លោក អ៊ុំ សុមន្ថា ដែលជាសមាជិកគណៈកម្មាធិការ
អចិន្ត្រៃយ៍នៃគណបក្សខ្មែររួបរួមជាតិ ត្រូវបានជ្រើសតាំងជាអគ្គលេខាធិការផងដែរ។
លោក រុណ មាត្រា អ្នកនាំពាក្យគណបក្សខ្មែររួបរួមជាតិបានឲ្យកាសែតដឹង ថា ក្រៅពីជ្រើសតាំងប្រធានស្តីទី គណបក្សខ្មែររួបរួមជាតិ ក៏បានកែសម្រួលរចនាសម្ព័ន្ធខ្លះទៀតដែរ ដូចជាអគ្គលេខាធិការដ្ឋាន ជាដើម ដើម្បីពង្រឹងផ្ទៃក្នុងឡើងវិញ។
លោក រុណ មាត្រាអះអាងថា៖
គណបក្សខ្មែររួបរួមជាតិ នឹងបន្តជីវិតនយោបាយរបស់ខ្លួនទៅមុនទៀត ទោះជួបការលំបាក់ផ្សេងៗ រួមទាំងការបាត់បង់វត្តមានលោក ញឹក ប៊ុនឆៃ ដែលជាស្ថាបនិកក៏ដោយចុះ។ លោក និយាយដូច្នេះថា៖«យើង នៅតែបន្តទៅមុខ។ ហើយយើង ក៏នៅតែចូលរួមការបោះឆ្នោតថ្នាក់ជាតិ ក្នុងឆ្នាំ២0១៨ ដែរ»។
ការជ្រើសតាំងប្រធានស្តីទីនិងការកែសម្រួលរចនាសម្ព័ន្ធនេះ គឺធ្វើឡើងបន្ទាប់ពីលោក ញឹក ប៊ុនឆៃ ចេញលិខិតពីពន្ធនាគារ ដើម្បីផ្តល់សិទ្ធិអំណាចទាំងស្រុងទៅឲ្យស្ថាបនិកនិងមន្ត្រីគ្រប់រូប សម្រេចលើវាសនាគណបក្សខ្មែររួបរួមជាតិ។
ក្នុងលិខិតចុះហត្ថលេខាដោយញឹកប៊ុនឆៃពីក្នុងគុកហើយ ផ្សាយកាលពីថ្ងៃទី១៦ សីហានេះ បានសរសេរដូច្នេះថា៖« ខ្ញុំសូមគោរពសម្ដែងជូននូវការសារភាពកំហុស ទាំងស្រុងដោយស្មោះស្ម័គ្រ និងសុទ្ធចិត្ត ដែលបានប្រព្រឹត្តមិនគប្បីចំពោះសម្ដេច ហ៊ុន សែន ប្រធានគណបក្សប្រជាជនកម្ពុជា និងគណបក្សប្រជាជនកម្ពុជា ដែលជាផលវិបាក នាំមកនូវការខូចខាតប្រយោជន៍របស់គណបក្សខ្មែររួបរួមជាតិ ដែលសមាជិកទាំងអស់បានកសាងរួមគ្នា»។
បន្ថែមពីលើការទទួលកំហុសនេះ លោក ញឹក ប៊ុនឆៃ បានប្រាប់ឲ្យសមាជិកគណបក្សទាំងអស់ ពិចារណាសម្រេចលើជោគវាសនាគណបក្សតាមបែបប្រជាធិបតេយ្យ ដោយត្រូវជឿជាក់លើការដឹកនាំរបស់សម្ដេចនាយករដ្ឋមន្ត្រី ហ៊ុន សែន ផងដែរ។«ខ្ញុំសូមឲ្យអ្នកគាំទ្រគណបក្សខ្មែររួបរួមជាតិ កុំងាករេទៅតាមការអូសទាញ ឬឃោសនាបំភ័ន្តមតិចង់ធ្វើការផ្លាស់ប្ដូរឲ្យសោះ ពីព្រោះបច្ចុប្បន្ននេះរាជរដ្ឋាភិបាលខិតខំធ្វើការកែទម្រង់គ្រប់បែបយ៉ាង ដើម្បីសេចក្តីសុខប្រជាពលរដ្ឋខ្មែរ និងកំពុងដើរលើផ្លូវត្រូវ»។ នេះជាការលើកឡើងរបស់លោក ញឹក ប៊ុនឆៃ ។
ប្រធានគណបក្សខ្មែររួបរួមជាតិ លោក ញឹក ប៊ុនឆៃ ត្រូវបានព្រះមហាក្សត្របញ្ចប់តំណែងទីប្រឹក្សារដ្ឋាភិបាល ដែលមានឋានៈស្មើឧបនាយករដ្ឋមន្ត្រី កាលពីថ្ងៃ៩ មិថុនាកន្លងមក តាមសំណើរបស់សម្ដេចនាយករដ្ឋមន្ត្រី ហ៊ុន សែន ក្រោយពីមានព័ត៌មានថាលោក ញឹក ប៊ុនឆៃ បានទូរស័ព្ទសន្ទនាជាមួយអនុប្រធានគណបក្សសង្គ្រោះជាតិ លោក អេង ឆៃអ៊ាង។
