មណ្ឌលគិរី៖ ចាប់ពីវេលាម៉ោង៧៖០០នាទី ព្រឹកថ្ងៃច័ន្ទទី២១ខែសីហាឆ្នាំ២០១៦ នៅសាលាវិទ្យាល័យ ហ៊ុន សែន មណ្ឌលគិរី បានបើកទ្វារបន្ទប់ ប្រលងដើម្បីអោយបេក្ខជន បេក្ខនារី បានចូលរូមប្រកួតប្រជែងចំណេះដឹង ក្រោម ការយាមកាមយ៉ាងតឹងរឹងបំផុតពីកងកំលាំងសមត្ថកិច្ច និង មន្ត្រីអង្គភាពប្រឆាំងអំពើពុករលួយក្រុមសហភាពសហព័ន្ធ យុវជនកម្ពុជា និង ក្រុមយុវជនស្ម័គ្រចិត្ត ចូលរួមអង្កេតការផងដែរ។
សម្រាប់ការបើកទ្វារប្រលងនៅថ្ងៃដំបូង lលោក យឹម លុច្ស អភិបាលរងខេត្តមណ្ឌលគិរី ក៏បានអញ្ជើញចូលរួមកាត់វិញ្ញាសារប្រលងបាក់ឌុប នៅវិទ្យាល័យហ៊ុនសែន មណ្ឌលគិរី ។ លោក ទឹម សង្វាត ប្រធានមន្ទីរអប់រំយុវជន និងកីឡាខេត្ត បានឲ្យដឹងថា ការប្រលងសញ្ញាប័ត្រមធ្យមសិក្សា ទុតិយភូមិឆ្នាំនេះ មានរយៈពេល២ថ្ងៃ ត្រូវបានបែកចែកជាពីរមណ្ឌលប្រលង មានថ្នាក់វិទ្យសាស្ត្រ និងថ្នាក់វិទ្យាសាស្ត្រ សង្គម ហើយបេក្ខជនទាំងអស់មកពីវិទ្យាល័យក្រុង/ស្រុក ទាំង៥ទូទាំងខេត្ត ចំនួន៣២០នាក់ ស្រី១៦៨នាក់ស្មើនឹង ១៤បន្ទប់ប្រលង។
ឯកឧត្តមហង្សជួនណារ៉ុនរដ្ឋមន្ត្រីក្រសួងអប់រំយុវជន និង កីឡា ធ្លាប់បានបញ្ជាក់ថា សិស្សនឹងធ្លាក់ដោយ ស្វ័យប្រវត្តិ ប្រសិនបើ ពួកគេធ្វើល្មើសលក្ខខណ្ឌមួយចំនួន ដែលក្រសួងបានកំណត់ ដូចជា៖ លួចយកសៀវភៅ សំណៅឯកសារ លូចចម្លង ប្រើទូរស័ព្ទនិងឧបករណ៍អេឡិចត្រូនិកផ្សេងៗនៅក្នុងមណ្ឌលប្រឡង និងបើសិនពិនិត្យឃើញថា សន្លឹកកិច្ចរបស់ បេក្ខ ជន អង្គុយ ជិតគ្នា មានខ្លឹមសារដូចគ្នា រកឃើញថាលួចចម្លងគ្នា ឬសន្លឹក កិច្ចមានខ្លឹមសារដូចគ្នា ទាំងស្រុងទៅនឹង សំណៅឯកសារដែលសរសេរទុកមុនឬដូចទៅនឹងឯកសារបង្ហោះតាមហ្វេសប៊ុកជាដើម។
ការផ្តល់សន្លឹកកិច្ចការទៅមិត្តភក្តិចម្លងបោះ ឯកសារទៅក្រៅបន្ទប់ប្រឡង ធ្វើជាមេខ្លោង ក្នុងការប្រមូលលុយឲ្យគ្រូ យកអាវុធជាតិផ្ទុះចូលក្នុងបន្ទប់ ប្រឡង ឲ្យអ្នកដទៃប្រឡងជំនួស ឬ ធ្វើឲ្យខូចខាតឧបករណ៍ សម្ភារៈក្នុងបន្ទប់ប្រឡង និងធ្វើឲ្យខូចសណ្តាប់ធ្នាប់ របៀបរៀបរយ ឬធ្វើជាក្លិបរៀបចំចម្លើយ និងបង្ករបួសស្នាម ទៅលើមន្ត្រីអនុរក្ស រាល់ ចំណុចទាំងអស់ខាលើត្រូវធ្លាក់ ដោយស្វ័យប្រវត្តិហើយត្រូវប្រឈមមុខនិងច្បាប់។ លោក យឹម លុច្ស អភិបាលរងខេត្ត បានអំពាវនាវឲ្យបេក្ខជនប្រឡងនិងលោកគ្រូ អ្នកគ្រូ ជាអនុរក្ស ទាំងអស់ ចូលរួមគោរពនូវ លក្ខខណ្ឌ ដែលបានដាក់ចេញឲ្យបានខ្ជាប់ខ្ជួន ដើម្បីនាំមកនូវលទ្ធផលនៃការប្រឡង មួយ ដ៏ល្អប្រសើរ។
សូមបញ្ជាក់ដែរថា៖នៅព្រឹក ថ្ងៃទី២១ ខែសីហានេះ ទ្វារមណ្ឌលប្រឡងចំនួន១៧៩មណ្ឌល ស្មើនឹង៤,០៩៣បន្ទប់ នៅទូទាំងប្រទេស បានបើកទទួលស្វាគមន៍ បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ចំណេះទូទៅ និងបំពេញវិជ្ជា ចំនួន១០១,៤១០នាក់ (ស្រី ៥០,០៤៩នាក់) ហើយ។ នៅរាជធានីភ្នំពេញ លោករដ្ឋមន្ត្រីក្រសួងអប់រំ លោក ហង់ ជួនណារ៉ុន និងលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញចូលរួមសម្ពោធបើកហិបវិញ្ញាសា នៅវិទ្យាល័យព្រះស៉ីសុវត្ថិ។
