ភ្នំពេញ៖ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានដឹកនាំកិច្ចប្រជុំស្ដីពីការកំណត់ព្រំប្រទល់ប្រឡាយ លូ បឹង និងអាងស្ដុកទឹក របស់រដ្ឋ ដើម្បីធ្វើការ គ្រប់គ្រង ឲ្យបានល្អ នៅក្នុងភូមិសាស្ត្ររាជធានីភ្នំពេញ
។ កិច្ចប្រជុំនេះ ដោយមានការចូលរួមពីមន្ត្រីពាក់ពន្ធ័ និងអាជ្ញាធរខណ្ឌទាំង១២ កាលពីថ្ងៃទី១៨ សីហា ឆ្នាំ២០១៧ នៅសាលារាជធានីភ្នំពេញ ។
លោក ឃួង ស្រេង បានបញ្ជាក់ថា៖ នៅក្នុងភូមិសាស្ត្រ រាជធានីភ្នំពេញ មានប្រឡាយសរុប៣៥ខ្សែ ដែលមាន ប្រឡាយខ្លះបានធ្វើជាជញ្ជាំងបេតុងការពាររួចហើយ។ប្រឡាយខ្លះទៀតកំពុងតែដំណើរការស្តារ និងកំណត់ ព្រំប្រទល់ប្រឡាយដោយចាក់ជា ជញ្ជាំងបេតុងដើម្បីងាយស្រួលក្នុងការកំណត់ព្រំប្រឡាយ និងប្រវែងប្រឡាយទាំងអស់ឡើងវិញជៀសវាងការរំលោភបំពាននានា។
លោក ឃួង ស្រេង បានថ្លែងថា៖ការថែរក្សាប្រឡាយទឹក ឬអាងស្តុកទឹកគឺជាភារកិច្ចរបស់យើងទាំងអស់គ្នាទាំងអាជ្ញាធរ និងប្រជាពលរដ្ឋម្នាក់ៗគឺត្រូវចូលរួមថែរក្សាការពារប្រឡាយ និងអាងស្តុកទឹកទាំងអស់គ្នា។ទាំងប្រជាពលរដ្ឋ ក៏ដូចជាអ្នកចូលចិត្តរំលោភបំពានចាក់ដីលប់ប្រឡាយយកធ្វើជាកម្មសិទ្ធផ្ទាល់ខ្លួន ឬចាក់សំរាមចូលប្រឡាយ ចូលប្រពន្ធ័លូល្មមដល់ពេលចេះភ្ញាក់រលឹកចូលរួមថែរក្សាប្រឡាយ,លូ ក្នុងទីក្រុងហើយដើម្បីលើកកំពស់សោភណ្ឌភាព បរិស្ថានក្នុងរាជធានីភ្នំពេញឲ្យបានល្អប្រសើរ។
រដ្ឋបាលរាជធានីភ្នំ ពេញ បានយកចិត្តយ៉ាងខ្លាំងទៅលើការរក្សាការពារ,ការស្តារប្រឡាយ ប្រពន្ធ័លូ រួមទាំងការស្ថាបនាស្ថានីយ៏បូមទឹកថ្មីៗបន្ថែមដើម្បីធានាដល់ការបូមទឹកចេញក្រៅក្រុង អោយបានទាន់ពេលវេលា ៕