បន្ទាយមានជ័យ ៖ នៅក្នុងសង្វៀនជល់មាន់មួយកន្លែងស្ថិតនៅភូមិក្បាលស្ពាន១សង្កាត់និងក្រុងប៉ោយប៉ែតខេត្តបន្ទាយមាន័យ កាលពីរសៀលថ្ងៃទី១៧សីហា២០១៧កើតមានជម្លោះទាស់សម្តី រវាងអ្នកលេងល្បែងជល់មាន់ដូចគ្នា។ ភាគីម្ខាងមកពីខេត្តកំពង់ចាម និងម្ខាងទៀតជាក្រុមញៀនល្បែងនៅក្រុងប៉ោយប៉ែតមានមន្ត្រីប៉េអឹមជាអ្នកកាងធើ្វជាខ្នងបង្អែកឲ្យ ។
ប្រភពពីវង់ល្បែងមានជល់បានឲ្យដឹងមកថា ទីតាំងសង្វៀនជល់មាន់ខាងលើ ត្រូវបានមេបញ្ជាការរងប៉េអឹមខេត្តបន្ទាយមានជ័យម្នាក់ ឈ្មោះ វណ្ណ លីហ៊ោ និងមន្ត្រីនគរបាលក្រុងប៉ោយប៉ែតម្នាក់ទៀត ឈ្មោះ អ៊ុយ អ៊ូ ដែលគេស្គាល់ថា អ៊ូ ខងកៅ ហៅអ៊ូ នាគទិព្វជាម្ចាស់ម៉ៅការសង្វៀនបានបើកលេងបំពានគោលនយោបាយភូមិមានសុវត្ថិភាពដែលជាគោលការណ៏ អាទិភាពរបស់ គណបក្សប្រជាជនកម្ពុជា។
ដោយសាជាប់ភារកិច្ចការពារសង្វៀនមេបញ្ជាការរងប៉េអឹមម្នាក់នេះមិនដែលបានទៅបំពេញភារកិច្ចរបស់ខ្លួននៅទីបញ្ជាការកងរាជ អាវុធហត្ថឡើយ ពោលគឺមួយថ្ងៃៗ គេឃើញតែនៅប្រចាំការតែនិងសង្វៀនមាន់ និងដើរលេងល្បែងបៀរអាប៉ោង ។ ចំណែកមន្ត្រីនគរបាលម្នាក់ទៀតនោះ ក៏មិនដែលទៅគោរពទង់ជាតិ គឺគេឃើញតែនៅបាញ់អាប៉ោងក្នុងសង្វៀនមាន់។ សំនួរសួរថា ហេតុអ្វីបានជា អគ្គស្នងការនគរបាលចាតិ និងក្រសួងការពារជាតិ ចូលចិត្តជ្រើសរើសយកមន្ត្រី ដែលពូកែខាងល្បែងស៊ីសងបែបនេះទៅវិញ ?
រឿងដែលមន្ត្រីតូចតាចឆ្ងល់នៅត្រង់ថា៖ក្រុមអ្នកចេះលេងល្បែងស៊ីសងទាំងនោះលោកធំបំពាក់សក្ត័ជ្រែកៗស្មា ចំណែកអ្នកធើ្វការបំរើជាតិវិញសក្តិក្រិនឡើងមិនរួចទេ?! ។
ពាក់ពន្ធ័និងជម្លោះក្នុងសង្វៀនមានចជល់ខុសច្បាប់នៅក្រុងប៉ោយប៉ែតកាលពីម្សិលមិញ ប្រភពមួយបានលើកឡើងថា មុនកើតជម្លោះគឺភាគីម្ខាង ទំនងមកពីចម្ងាយបានមកលេងល្បែងភ្នាល់មាន់ជន់នៅក្រុងប៉ោយប៉ែត ហើយមួយក្រុមទៀតគឺជាអ្នកលេងភ្នាល់នៅក្រុងប៉ោយប៉ែត។
ពួកគេបានព្រមព្រៀងគ្នាលេងតាមលក្ខណៈរបស់ម្ចាស់សង្វៀន ដោយម្នាក់ៗចាក់លុយខ្លះ៥០០ដុល្លារអាមេរិក និងខ្លះទៀតច្រើនជាង៥០០ដុល្លារក៏មាន។ បន្ទាប់ពីបានចាក់លុយរួច មាន់ភាគីម្ខាងឈ្នះ ហើយបើតាមលក្ខន្តិកៈ សាច់ប្រាក់ត្រូវបានធ្លាក់លើដៃអ្នកឈ្នះ។ ប៉ុន្តែនៅសង្វៀនមាន់ខាងលើនេះ បែជាអ្នកលេងឈ្នះគេ មិនត្រឹមតែមិនឲ្យ លុយទេ ថែមទាំង ត្រូវបានគេគំរាម កំហែងយកសមត្ថកិច្ចប្រុងចាប់ខ្លួនទៀតផង ។
ប្រភពបានបន្ថែមថា ភ្លាមៗ នោះគេ បានឃើញ មេបញ្ជាការរងកងរាជអាវុធហត្ថ ខេត្តបន្ទាយមានជ័យ ឈ្មោះ វណ្ណ លី ហ៊ោ ជាអ្នកចេញមុខកាង ដោយបង្គាប់ឲ្យអ្នកឈ្នះដកប្រាក់សងទៅឲ្យអ្នកដែលចាញ់វិញទៀតផង ។ នៅព្រឹកថ្ងៃទី១៨សីហា២០១៧ អង្គភាពសារព័ត៌មានយើង មិនទាន់អាចសុំឲ្យលោក វណ្ណ លីហ៊ោ អធិប្បាយបាននៅឡើយទេ ជុំវិញមូលហេតុ ដែលលោកបើកសង្វៀនជល់មាន់រំលោភនិងគោលនយោបាយភូមិឃុំមានសុវត្ថភាព បានយ៉ាងណានោះទេ ? ។
ចំណែកលោក អ៊ុយ អ៊ួ ដែលគេដឹងថា មានភាគហ៊ុនដែរនោះ បាននិយាយយកតែរួចខ្លួន ដោយបដិសេធគ្រប់រឿង ដូចជាមិនដឹងខ្យល់អ្វីទាំងអស់ ហើយថែមទាំងនិយាយថា លោក កុក មីន ប្អូនប្រុសបង្កើតឧកញ៉ា កុក អាន ជាថៅកៅធំកាងបនល្បែងនោះទៅវិញ? ។
ពាក់ពន្ធ័បនល្បែងជល់មាន់ ជ្រកក្រោមស្លាកកាស៊ីណូ របស់ឧកញ៉ា កុក អាន នេះ សព្វថ្ងៃបានបំពារបំពាននិងច្បាប់ស្តីពីការបើកបនល្បែងកសស៊ីណូ មិនតែប៉ុណ្ណោះ ពួកគេបាននាំគ្នាជាន់ឈ្លីអនុសាសន៏ ដ៏ថ្លៃថ្លារបស់លោក នាយករដ្ឋមន្ត្រីកម្ពុជា គឺសម្តេច អគ្គមហាសេនាបតិ តេជោ ហ៊ុន សែន ដែលសម្តេចបានហាមគ្រប់កាស៊ីណូ ទាំងអស់ មិនអនុញាតឲ្យពលរដ្ឋខ្មែរចូលលេងជាដាច់ខាត ។
ប៉ុន្តែនៅទីតាំងសង្វៀនមាន់ខាងលើ នេះសុទ្ធសឹងតែពលរដ្ឋខ្មែរជាអ្នកមកលេងល្បែងភ្នាល់មាន់ចាក់លុយរាប់ម៉ឺនដុល្លារ ក្នុងមួយគូៗ ចំណែកលោក ស្នងការនគរបាល ខេត្តបន្ទាយមានជ័យ បែជាឈរឱបដៃធើ្វដូចជាមិនដឹងខ្យល់អ្វីទាំងអស់ ទុកឲ្យគោលនយោបាយភូមិឃុំមានសុវត្ថិភាពដាក់ចេញដោយសម្តេចក្រឡាហោមសខេងអស់តម្លៃនៅក្រុងប៉ោយប៉ែត ដែលធ្វើឲ្យគេសង្ស័យថាលោកឧត្តមសេនីយ៍ស្នងការ៣ជំនាន់សើមមាត់សើមកហើយមើលទៅ ៕